Diosmanta yachayninchikqa ancha allinmi

DIOSMANTAQA manam sumaqtachu runakunaqa yachanku. Ichaqa waranqantin runakunaman Diosmanta imam kaqta yachasqankumantapacha kusisqaña kawsakunku.

Kikin Jehova Diosmi paymanta yachaykunanchikta munan. Chaymi Bibliapi kaynata nin: “Sutikiqa Tayta Dioslla kasqantayá yachachunku. Kay pachapa altonpiqa qamlla kasqaykitayá yachachunku”, nispa. Diosqa yachanmi paymanta yachaspa allin kawsakunanchikta. Payqa niwanchikraqmi: ‘Yupaychasqayki Tayta Diosmi ñuqaqa kani. Allinnikipaq yachachiqnikim kani’, nispa. Chaynaqa imaynatataq yanapawachwan Diosmanta yachayqa (Salmo 83:18; Isaias 48:17).a

Paymanta yachayninchikqa yanapawanchikmi ima sasachakuyninchiktapas atipanapaq, hinaspa kay tiempopipas chaynataq hamuq tiempopipas kusisqa kawsakunapaq. Chaymantapas Diosmanta imam kaqta yachasqanchikqa yanapawanchikmi runakuna hina imapas pasakusqanwan mana hukmanyananchikpaq. ¿Imakunawantaq runakunaqa hukmanyanku?

¿Yachanchikchu imapaq kawsakusqanchikta?

Kay tiemponchikpi yachaysapa runakuna tukuy imata ruwaruptinkupas runakunaqa hinallam tapukunku: “¿Imata ruwananchikpaqtaq kawsakunchik? ¿Imapitaq tukusunchik?”, nispanku. Chaykunamanta mana sumaqta yachaspankum runakunaqa llakisqa kawsakunku. Alemania nacionpim chaykunamanta achka runakunata tapuptinku yaqa llapanku nirqaku mana yachasqankuta. ¿Llaqtaykipipas chaynatachu runakuna ninku?

Imapaq kawsakusqankuta mana yachaspankuqa manam kusisqachu kawsakunku. Chaymi kusisqa kawsakuyta munaspanku runakunaqa qukurunku qullqi maskayman hinaspa allin educakuyman. Chaykunawanpas mana kusisqa kaspankum wakinkuqa wañuchikuyman chayanku. Chaynam pasarqa huk sipas warmiwan. Huk ancha riqsisqa periodicom willawanchik payqa qullqisapa runapa churin kasqanta. Tukuy imayuq kachkaspanpas, payqa mana piniyuq mana mayniyuq kasqanta piensaspanmi llakisqa tarikurqa. Manam ima ruwasqanwanpas kusisqachu kawsakurqa, chaymi wañurachikurqa. Ichapas yachasqayki lawpi qampas uyarirqanki pipas chayna wañurachikuqmanta.

Runakunam ninku: “Yachaysapa runakunam kunanqa tukuy imamanta yachachiyta atiwanchik”, nispanku. Ichaqa manamá chaynachu. Ancha riqsisqa qillqapas kaynatam nin: “Yachaysapa runakunaqa manam Diosmantaqa yachachiyta atiwanchikchu. Tukuy imamanta yacharuspankupas manam hawka kawsakunanchikpaqqa yanapawanchikchu”, nispa. Arí, yachaysapa runakunam kunanqa sumaqta willawanchik kay pachapi tukuy ima imayna kasqanmanta, ichaqa manamá yachankuchu imapaq kawsakusqanchiktaqa nitaq imapi tukunanchiktapas. Sichum paykuna tukuy kaykunamanta yachanankuta suyaspaqa manam haykapipas yachaytaqa atichwanchu. Ichaqa huk ancha riqsisqa periodicopa nisqanman hinam llapallanchik necesitanchik pipas yachaykachiwananchikta.

Unanchawaqninchik Jehova Diosllam yanapaytaqa atiwachwan. Payllam yachan imapaq kay allpa pachapi kasqanchikta. Bibliam willawanchik kay allpa pachapi kusisqa kawsakunanchikpaq unanchawasqanchikmanta. Chaymantapas payqa munarqam runakunapas pay hina allin ruwaq, yachayniyuq hinaspa kuyakuqllaña kananchikta. Jehova Dios imayna kawsakunanchikpaq unanchawasqanchikmanta yachaykusqanchikmi yanapawanchik kusisqa kawsakunanchikpaq (Genesis 1:26-28).

¿Imataq yanapawachwan?

Imapaq kawsakusqanchikmanta utaq imapi tukunanchikmanta mana sumaqta yachaspaqa llakisqam tarikunchik. Ichaqa bibliam niwanchik Jehova Diosta sumaqta riqsispalla kusisqa kawsakunanchikmanta. Chaymi Jesucristo nirqa: “Wiñay kawsayqa kanqa sapallan chiqap Dios kasqaykita riqsiqkunapaqmi hinaspa kachamusqayki Jesucristotapas riqsiqkunapaqmi”, nispa. Chaymantapas kallpanchakunanchikmi kuyakuq kananchikpaq hinaspa Diospa munasqanman hina kawsakunanchikpaq, chaynapi Dios kamachimuptin chaypi kananchikpaq. Kaykuna ruwaymi yanapawasunchik kay tiempopipas hinaspa hamuq tiempopipas kusisqa kawsakunanchikpaq (Juan 17:3; Eclesiastes 12:13).

Hans sutiyuq runapas Dios kasqanta yachaspanpas manam Diospa munasqanman hinachu kawsakurqa.b Payqa Drogakuyllapi, warmikunawan kakuyllapi, hinaspa imapas mana allin ruwaykunallapim kakuq. Chaymi pay nin: “Tukuy munasqayta ruwaspaypas manam kusisqachu karqani”, nispa. 25 watanpi kachkaspanmi Hansqa bibliawan Diosmanta yachayta qallaykurqa. Jehova Diosmanta sumaqta yachaykuspanmi hinaspa kusisqa kawsakunanchikta Dios munasqanta yachaykuspanmi Hansqa mana allin ruwasqankunata saqispan bautizakurqa, Jehova Diospa Testigon kananpaq. Payqa chunka watañam tukuy tiemponwan Jehova Diosta servichkan. Paymi nin: “Jehova Diosta serviyqa imamantapas aswan allinmi. Diosmanta yachasqaymi anchata yanapawan kusisqa kawsakunaypaq”, nispa.

Runakunataqa manamá imapaq kawsakusqanchikmanta mana yachayllankuchu llakichin. Runakunataqa llakichintaqmi kay pachapi tukuy mana allinkuna pasakusqanpas.

¿Imanasqataq llakikuna qatiwanchik?

Runakunaqa llakipi tarikuspankum ninku: “Imanasqataq ñuqata kay pasallawan”, nispa. Chaymi chaymanta sumaqta mana yachaykuspanku Diospaqña piñakurunku. Chaynam tarikurqa Bruni sutiyuq warmipas.

Paymi nin: “Qaynakunallam Susanne sutiyuq warmachay wañukapullawan. Chaymi chay llaki qatiwasqanmanta willakuptiy huk cura niwarqa: “Diosmi wawaykitaqa apakun hanaq pachapi angelnin kananpaq”, nispa. “Wawaypa wañukusqanwanmi llumpa llumpay-llakisqa kaspay muspaypi hina tarikullarqani, chaymi Diospaqpas piñakururqani”, nispa. Chayna llakisqam payqa tarikullarqa unay watakuna. Bruni sutiyuq warmichaqa ninraqmi: “Jehova Diospa Testigonmi bibliawan yachachiwarqa. Niwarqam waway wañukusqanmantaqa Jehova Diosqa mana huchayuq kasqanta hinaspa pantaq runa kasqanchikrayku unquspa wañusqanchikta. Yacharurqanitaqmi curapa niwasqanqa yanqa kasqanta. Wawayqa puñuchkaq hinallam kachkan Jehova Diospa kawsarichinan punchaw chayamunankama. Chaymantapas yacharurqanitaqmi: Jehova Diosqa runakunataqa unanchawarqanchik manam ñakarinanchikpaqchu, aswanqa kay pachapi kusisqa wiñaypaq kawsakunanchikpaqmi. ¡Chay punchawqa chayaykamuchkanñam! Jehova Dios imayna kasqanta yachaykuspaymi astawan kuyani, chaymi tukuy ima llakiykunapas manaña hukmanyachiwanñachu”, nispa (Salmo 37:29; Hechos 24:15; Romanos 5:12).

Guerrakuna kaptin, muchuy kaptin utaq ima llakipas kaptinmi wara-waranqantin runakuna sasachakuypi tarikullanku. Bruni sutiyuq warmichaqa bibliata estudiaspanmi yacharurqa Jehova Diosqa tukuy ñakariykunamanta mana huchayuq kasqanta, runakuna ñakarinanta mana munasqanmanta hinaspa manapas unaymanta mana allinkunata chinkachinanmanta. Kay tiemponchikpi tukuy mana allinkuna astawan yapakusqanta qawaspanchikmi sutillata cuentata qukunchik ‘tukupay punchawkunapiña’ kasqanchikta. Manapas unaymantam Jehova Diospa niwasqanchikkuna ña cumplikunqaña (2 Timoteo 3:1-5; Mateo 24:7, 8).

¿Imaynatam Diosmanta yachachwan?

Hanswan Bruni sutiyuq warmichaqa qallariypiqa manam Diosmantaqa sumaqtachu yacharqaku. Paypi iñispankupas manam imayna kasqantaqa yacharqakuchu. Bibliamanta yachayta qallaykuspankum ichaqa yacharurqaku imapaq kawsasqanchikmanta, imapi tukunanchikmanta hinaspam hawkaña kawsakurqaku. Chaymantapas hamuq tiempopi kusisqa kawsakunamantam yacharurqaku. Paykuna hinam achka runakuna Jehova Diosmanta yacharuspanku kusisqaña kawsakunku.

Bibliapim Diosmanta willawanchik. Niwanchiktaqmi Dios imayna kawsakunanchikta munasqantapas, chaymi bibliata estudiananchik. Chaytam ruwarqaku Pablopa tiemponpi Berea llaqtapi iñiqkunapas. Lucas Sutiyuq bibliata qillqaqpas paykunamantam kayta nirqa: “Paykunaqa munayllawanñam Diospa palabranta chaskikurqaku hinaspam willasqanku chiqap kasqanta yachayta munaspanku Diospa qillqanta sapa punchaw allintapuni estudiaqku”, nispa (Hechos 17:10, 11).

Pablopa tiempopi iñiqkunaqa huñunakuqkutaqmi Diosmanta yachanankupaq (Hechos 2:41, 42, 46; 1 Corintios 1:1, 2; Galatas 1:1, 2; 2 Tesalonicenses 1:1). Chaynam kunan tiempopipas Jehova Diospa testigonkunaqa huñunakunku Diosmanta yachanankupaq chaynapi kusisqa Diosta servinankupaq. Jehova Diospa testigonkunaqa Diosta servisqankuraykum kuyakuq, llakipayakuq, sumaq sunqu kanku. Paykunawan huñunakuynikiqa yanapasunkim qampas chayna kanaykipaq hinaspa Diosmanta astawan yachanaykipaq (Hebreos 10:24, 25).

¿Jehova Diosta riqsinapaqqa anchatachu kallpanchakunanchik? Arí, kallpanchakunanchikmi. Runakunaqa anchatam kallpanchakunku vidankupi imatapas tarinankupaq. Chaynatam kallpanchakunku llallinakuypi kallpaq runakuna. Chaypaq rimaykusunchik Jean-Claude Killy sutiyuq runamanta. Paymi nin imayna kallpanchakusqanmanta: “Chunka wata ñawpaqmantaraqmi kallpanay punchawpaq anchata kallpanchakurqani. Sapa punchawmi chaypi umayuq karqani hinaspam tukuyta ruwarqani allinta kallpanaypaq”, nispa. Chaynatam kallpanchakurqa chunka minutolla kallpanan kachkaptinpas. Jehova Diosmanta yachananchikpaqqa astawanraqmi kallpanchakunanchik chayqa yanapawasunmi kusisqa wiñaypaq kawsakunanchikpaq.

Hinallayá Jehova Diosmanta yachasun

Llapallanchikmi kusisqa kawsakuyta munanchik. Imayna kawsakuynikiwan mana kusisqa kaspaykiqa, hinaspa imarayku tukuy sasachakuykuna kasqanmanta yachayta munaspaykiqa, kallpanchakuy bibliata estudiaspa Diosmanta yachanaykipaq. Jehova Diosmanta yachaynikiqa yanapasunkim kusisqa wiñaypaq kawsakunaykipaq.

¿Haykapipas lliwta Diosmanta yacharuchwanchu? Manam. Achka wataña Diosta serviqkunapas hinallam Diosmanta yachachkanku. Jehova Diosmanta yachaykuspam kusisqa kawsakusun, hinaspapas paymanmi asuykusun. Ñuqanchikpas apostol Pablo hinayá nisun. Kaynatam nirqa: “Achka-achkam Diospa bendicionninqa, ancha-anchataqmi yachayninwan yuyayninpas. ¿Pitaq lliwta yachanman Diospa tantiasqankunataqa? ¿Pitaq lliwta yachanman Diospa imapas ruwasqankunataqa? ¿Pimá Jehova Diospa yuyaynintaqa riqsinman? ¿Pimá paytaqa ninman imam ruwanantaqa?”, nispa (Romanos 11:33, 34).

[Willakuy]

[Willakuy]

Runakunaqa hinallam tapukunku imapaq kawsakusqanchikta hinaspa imapi tukunanchikta.

[Willakuy]

“Jehova Dios imayna kasqanta yachaykuspaymi astawan kuyarqani”

[Willakuy]

“Jehova Diosta serviyqa imamantapas aswan allinmi. Diosmanta yachasqaymi anchata yanapawan kusisqa kawsakunaypaq”