Qampas haykapillapas paykuna hinachá piensarqanki. Ichapas bibliata ñawinchachkaspayki imaraykupas saqirurqanki. Achka runakunam biblia ñawinchaytaqa mana munankuchu. Ichaqa yachachikuyninkuna vidanchikpi yanapawasqanchikta yachaspaqa ñawinchachwanmi, ¿aw? Ñawinchachwantaqmi imaynata bibliata ñawinchanapaq yanapakuykuna kasqanmanta yachaspapas ¿aw? Chaykunamantayá yachaykusun.

Biblia ñawinchaq runakunam willakunku biblia ñawinchayninkuqa allinninkupaq kasqanmanta.

20 masnin watanpi kaq Ezekielmi nin: “Ñawpaqtaqa mana riqsisqay ñanninta purichkaq hinam tarikurqani, kunanmi ichaqa bibliapa yachachikuyninkunawan riqsisqay ñanninta purichkaq hinaña tarikuni. Bibliaqa yanapawanchikmi”, nispa.

Yaqa 20 watayuq Frieda sutiyuq warmipas ninmi: “Imachallamantapas piñakuruqmi kani, kunanmi ichaqa mana chaynañachu kani bibliata ñawinchasqayrayku. Amistadniykunapas achkallañam”, nispa.

50 masnin watayuq Eunice sutiyuq warmipas ninmi: “Biblia ñawinchasqaymi yanapawachkan aswan allin warmi kanaypaq”, nispa.

Paykuna hina chaynataq wara-waranqantin runakuna hinam qampas bibliata ñawinchaspaykiqa aswan allin kawsakuwaq (Isaias 48:17, 18). Bibliapa nisqanqa Diospa yachachisqanmi, chaymi ñawinchayninchikqa yanapawasun allinta tanteanapaq, allin amistadkunata tarinapaq, hawkalla kawsakunapaq hinaspa Diosmanta imam kaqta yachanapaq, chaymi aswan allinqa. Diosqa allinnillanchikpaqmi yachachiwanchik, chaymi kasukuspanchikqa allin kawsakusunchik.

Chaynaqa, kunanmantapachayá ñawinchasun. Qatiqninpim yachasun imaynata bibliata ñawinchayta qallarinamanta.

¿Imakunatam ruwananchik bibliata ñawinchaspa yanapachikunapaq? Chaymantayá yachasun.

Allin sitiopi ñawinchay. Mana chaqwapa kasqanpi, allin achkipa kasqanpi hinaspa sumaq sitiopi ñawinchay mana chaylla amirunaykipaq.

Sunquchaykita kicharispa ñawinchay. Bibliaqa taytanchik Diospa quwasqanchikmi. Imaynam warmachakuna imamantapas yachayta munaspankuqa taytanta uyarinku, chaynam bibliata ñawinchaspapas uyarichkaq hina Diosmanta yachananchik. Amayá runakunapa nisqankuwanqa apachikuychu, aswanqa saqikuyá Dios yachachisunaykita (Salmo 25:4).

Ñawinchanaykipaqqa Diosta mañakuy. Bibliaqa Diospa palabranmi, chaymi entiendenapaqqa Diospa yanapakuyninta necesitanchik, mañakuptinchikqa chuya espiritunwanmi utaq atiyninwanmi yanapawasun (Lucas 11:13). Chuya espiritupa yanapakuyninwanqa atisunmi Diospa imayna piensasqanta hinaspa sasa entiendena kaqkunamanta yachayta (1 Corintios 2:10).

Kallpanchakuy ñawinchasqaykita entiendenaykipaq. Yuyaymanaspa ñawinchay hinaspa ñawinchasqaykiman hina tapukuy: “Bibliapi willakusqanman hinaqa, ¿imaynam chay runaqa karqa? ¿Imaynatam yachasqaykunata ruwayman churayman?”, nispa.

Amayá yanqallaqa ñawinchaychu. Biblia ñawinchayta mana amirunaykipaqqa kallpanchakuy imapas yanapasuqniki kaqta yachanaykipaq. Kallpanchakuwaqmi Diosta astawan riqsinaykipaq, imayna allin runa, allin qusa utaq allin warmi kanaykipaq. Chaypaqmi chaykunamanta rimaq bibliapa yachachikuyninkunata ñawinchanayki.a

Kay pichqa yachachikuykunaman hina ruwaspaykiqa munankim biblia ñawinchaytaqa, ichaqa ¿imaraqtaq yanapasunkiman mana amispa bibliata ñawinchanaykipaq? Qatiqninpiyá chaymanta yachaykusun.

Biblia ñawinchayta saqiruyniki utaq mana saqiruynikiqa qanmantam kanqa. Yachaykusunyá mana amirunaykipaq imakuna yanapasunaykimanta.

Allin bibliata akllay. Sichum mana chaylla entiendekuq bibliata ñawinchaspaykiqa chayllam amirunki, chaymi akllanayki allin entiendekuq, sunquykiman chayaq hinaspa Diosmanta imam kaqta yachachiq bibliata.a

Computadorata utaq ima aparatotapas servichikuy. Kunanqa bibliaqa kachkanñam computadorakunapi, celularkunapi hinaspa huk aparatokunapipas. Chay aparatokunapiqa achka bibliakunatam ñawinchayta atichwan wakin bibliakunawan tupachispa. Bibliaqa kachkantaqmi grabasqapas. Chaymi achka runakuna uyarinku carropi rispanku, pachata taqsaspanku hinaspa imatapas ruwaspanku. Qamqa, ¿ñawinchaytachu munawaq icha grabasqa uyariytachu?

Huk qillqakunawanpas yanapachikuy. Bibliamanta rimaq qillqakunata ñawinchaynikim yanapasunki bibliata astawan entiendenaykipaq. Kachkanmi mapayuq qillqakuna, chay qillqakunapim bibliapa rimasqan llaqtakuna kachkan, chay mapakunaqa yanapasunkim maypi imapas pasakusqanta allinta yachanaykipaq. Chaymantapas, kay qillqapi hinaspa jw.org/es nisqapi “Enseñanzas bíblicas” niqpi rikurimuq yachachikuykunam yanapasunki ñawinchasqaykita allinta entiendenaykipaq.

Yachay munasqaykimanta ñawinchay. Qallariyninmanta tukuyninkama biblia ñawinchayta amirunapaq hinata qawaspaykiqa yachay munasqaykimanta ñawinchay. Bibliapa willakusqan runakunamanta yachayta munaspaykiqa ñawinchay chay runakunamanta bibliapa willakusqanta. Chaypaqqa yanapasunkimanmi “Bibliapa willakusqan runakunamanta astawan yachay” niq yachachikuy. Ñawinchawaqtaqmi qallariyninmanta tukuyninkama imakuna pasakusqanmanta yachanaykipaqpas. Kallpanchakuyá mayqinman hinapas ñawinchanaykipaq.

Bibliapiqa manam wakin qillqakunapi hinachu runakunapa yachachisqan kachkan, aswanmi Diospa yachachikuyninkuna kachkan (2 Timoteo 3:16). Yachachikuyninkunaqa allintam yanapasunkiman. Chayna kasqanmantam kikin bibliapas nin: ‘Diospa palabranqa kawsachkanmi hinaspapas atiyniyuqmi’, nispa (Hebreos 4:12). Bibliaqa yanapasunkim allin kawsakunaykipaq hinaspa Diosmanta chaynataq willakusqankunamantapas yachanaykipaq (1 Timoteo 4:8; Santiago 4:8).

Allin kawsakunanchikpaqmi yanapawanchik. Bibliapiqa kachkanmi tukuy imapaq yachachikuykuna.

• Hukkunawan allinlla kawsakunapaq (Efesios 4:31, 32; 5:22, 25, 28, 33).

• Mana chaylla unqurunapaq hinaspa imayna kusisqa kanapaq (Salmo 37:8; Proverbios 17:22).

• Imakunata mana ruwanamanta (1 Corintios 6:9, 10).

• Qullqimanta (Proverbios 10:4; 28:19; Efesios 4:28).a

Asia lawpi yachaq chayllaraq casarasqa Vicentem warmichanpiwan willakunku biblia casado vidankupi yanapasqanmanta. Paykunaqa qallariypiqa sasachakuqkus allinta rimanakunankupaq hinaspa entiendenakunankupaqpas. Bibliata ñawinchaspanku hinaspa ruwayman churasqankumantapachas ichaqa allinña kawsakunku, Vicentem willakun: “Bibliapi yachachikuykunam yanapawarqa sasachakuyniykuta kuyakuyllawan allichanaykupaq”, nispa. Warmichanpas ninmi: “Bibliapi yachachikuykunata ñawinchasqaykuqa anchatam yanapawarqaku, kunanqa kusisqam kachkani hukllataña piensasqaykurayku”, nispa.

Diosninchikmanta yachanapaqmi yanapawanchik. Vicenteqa ninraqmi: “Bibliata ñawinchaspay Diosninchikmanta yachasqayraykum payman astawan asuykuni”, nispa. Vicentepa willakusqanman hinaqa, bibliaqa yanapawanchiktaqmi Diosmanta allinta yachananchikpaqpas. Ñawinchaspanchikqa allinmi kawsakusun hinaspapas Diospa amistadninmi kasun. Yachasuntaqmi, Diosninchikqa hamuq tiempopi wiñaypaq allin kawsakunamanta willawasqanchikmantapas (1 Timoteo 6:19). Tukuy chaynataqa manamá ima qillqapas yanapawanchikmanchu.

Bibliata ñawinchaspaykiqa qampas allinmi kawsakunki hinaspapas taytanchik Diosmantam astawan yachanki. Ichaqa ñawinchaspaykiqa manamá lliwtachu chayllaqa entienderunki. Chayna kaptinqa, qatipakunaykim ñawpaq tiempopi kawsaq Etiopia nacionpi kamachikuq runata. Paypas bibliata ñawinchaspanqa manam lliwtachu entienderqa. Chaymi Jesuspa qatiqnin Felipe “¿entiendenkichu chay leesqaykipa ima ninanta?” nispa tapuptin, chay runa nirqa: “¿Imaynataq entiendeyman mana pipas yachaykachiwaptinqa?”, nispa.b Chaymi Felipe yachachiptin payqa kusisqallaña uyarirqa (Hechos 8:30, 31, 34). Qampas bibliamanta astawan yachayta munaspaykiqa Jehova Diospa testigonkunata tapukuy utaq huñunakusqanku wasiman riy. Mañakuwaqmi internetpi jw.org/quy nisqantakamapas, qillqawaqtaqmi kay qillqapa iskay paginanpi rikurimuq direccionmanpas. Manaraq bibliayki kaptinqa, kallpanchaykikum bibliayki kananpaq hinaspa ñawinchaspa yachachikuyninkunata kasukunaykipaqpas.