“Hamuq punchawpi imayna kawsakunaymantam yuyaymanayta qallaykurqani”

ÑAWPAQ VIDAY

Australia nacionpa Warialda (Nueva Gales del Sur) sutiyuq llaqtachanpim wiñarqani. Kay llaqtachapiqa achka ovejakuna hinaspa vacakunam kan, hinaspapas achka kawsaykunata chaynataq verdurakunatam tarpunku. Chaymantapas hawkam kawsakuniku, manam suwakuypas nitaq wañuchinakuypas kanchu.

Ñuqam chunka wawqi-paniykunamanta mayor kani, chaymi 13 watachaymanta llamkayta qallaykurqani aylluyta yanapanaypaq. Chakrapim llamkapakurqani, manam escuelaytapas tukurqanichu. 15 wataypiqa ñam allin llamkakuqña karqani hinaspapas chukaro caballokunatam mansaq kani.

Chakrapi kasqay hinaspa llamkapakusqayqa gustawaqmi. Chaypim tutankuna ninapa waqtanpi tiyaykuspay killatawan lucerokunata qawaq kani, chakrapi kawsaykunapa miskillaña asnarisqanpas anchatam gustawaq. Chayna sumaqllaña imapas kasqanmi piensachiwarqa chaykunaqa mana kikillanmanta rikurisqanta. Ichaqa wakin llamkaqmasiykunam mana allinkunata rimaqku hinaspapas llumpaytam cigarrota pitaqku chaymi ñuqapas paykunata qatipakurqani.

18 wataypim Sydney sutiyuq llaqtaman ripukurqani chaypim militar kayta munarqani, ichaqa estudiayta mana tukusqayraykum mana chaskiwarqakuchu. Chay llaqtapim llamkayta qallaykurqani, hinaspaymi huk wata chaypi qipakurqani. Chay llaqtapitaqmi chayraq Jehova Diospa testigonkunata riqsirurqani hinaspam huñunakuyninkuman rinaypaq invitawarqaku, chaypim cuentata qukurqani paykunaqa Diosmanta chiqapta yachachisqankuta.

Chaymantam manapas unaymanta Goondiwindi llaqtachaman ripukurqani hinaspam chaypi yacharqani. Hina chaypitaqmi llamkayta qallaykurqani hinaspapas casarakurqani, ichaqa llakikuypaqmi sinkakuyta qallaykurqani.

Manapas unaymantam iskay churiykuna karurqa, chaymi yuyaymanayta qallaykurqani imayna kawsakunaymanta. Hinaspaymi yuyarirurqani Sydney llaqtapi kaspay huñunakuyman rispay ima yachasqayta.

Huk kutipim Willakuq qillqata tarirurqani, chaypim kasqa Australia nacionpi betel wasipa direccionnin, hinaspaymi cartata qillqarqani yanapawanankupaq. Hinaptinmi huk testigo watukamuwarqa, payqa kuyakuyllawanmi bibliamanta yachachiwarqa.

VIDAY CAMBIANAYPAQMI BIBLIA YANAPAWARQA

Bibliata estudiasqayman hinam cuentata qukurqani mana allinpi kawsasqayta. Bibliapi 2 Corintios 7:1 nisqanmi sunquyman chayarurqa chaypim nin: “Chuyanchakuychikyá aychanchikta hinaspa yuyayninchikta qanrachaq kaqkunamanta”, nispa.

Chaymi kallpanchakurqani cigarrota manaña pitanaypaq hinaspa llumpayta manaña tomanaypaq. Chaykuna saqiyqa sasam karqa, ichaqa tantiakururqanim Diospa munasqanman hina kawsakunaypaq. Chaypaqmi anchata yanapawarqa Romanos 12:2 nisqan, chaypim nin: “Amayá kay tiempopi runakunapa imayna kawsasqankutaqa qatipakuychikchu, aswanqa ñawpaqta imayna kasqaykichikta saqispayá yuyaynikichikta musuqyachiychik”, nispa. Chaywanmi cuentata qukurqani Diospa munasqanman hina kawsakunaypaqqa ñawpaq vidayta saqinaymanta, chaymi Diospa yanapakuyninwan tukuy chaykunata atiparqani.

Chaywanpas aswan sasam karqa mana allin rimaykunata saqiyniyqa. Yacharqanim Efesios 4:29 nisqanta, chaypim nin: “Amayá simikichikmantaqa mana allin rimaykunaqa lluqsichunchu”, nispa. Chaywanpas manam atirqanichu chaykunata chaylla saqiytaqa. Ichaqa anchatam yanapawarqa Isaias 40:26 nisqanpi yuyaymanayniy, chaypim lucerokunamanta rimaspan kaynata nin: “Cielotayá qawariychik, ¿pitaq lucerokunata unancharqa? Soldadokunata hina sapakamata yupaspan lluqsichimuqmi, sapakamatam sutinmanta qayan. Payqa kallpasapam, payqa tukuy atiyniyuqmi, chayraykum sapakama maymi kananpi kachkan”, nispa. Chaynaqa sichu Dios hanaq pachatawan qawasqay lucerokunata atiyninwan unanchaspanqa ñuqatapas atiyninwanmi yanapawanqa mana allin rimaykunata saqinaypaq, chaynapi payta kusichinaypaq. Chaymi Diosta mañakuspay kallpanchakurqani mana allin rimaykunata manaña rimanaypaq.

BENDICIONKUNA CHASKISQAYMANTA

Chakrapi llamkasqaypiqa manam achkachu runakunaqa kaq, chaymi mana anchachu rimaq kani. Ichaqa anchatam agradecekuni Jehova Diospa testigonkunapa huñunakuyninkupi allinta rimanaypaq yachaykachiwasqankumanta. Aswanraqmi yacharqani Diosmanta sumaq willakuyta runakunaman willakunaypaqqa (Mateo 6:9, 10; 24:14).

Pasaq watakunallapim punta apaq kanaypaq niykuwarqaku. Ñuqapaqqa iñiqmasiykunata yanapayqa ancha allinmi.

Anchatam Jehova Diosta agradecekuni mana educacionniyuq kachkaptiypas payta riqsinaypaq yanapaykuwasqanmanta (Isaias 54:13). Proverbios 10:22 nisqanmantam mana iskayrayanichu, chaypim nin: “Jehova Diospa bendecisqan runaqa allin kaqkunatam achkanpi chaskin”, nispa.