Jehova Diosqa llakipayakuqmi hinaspa pampachakuykuqmi

ÑAWPAQ VIDAY:

Montreal sutiyuq llaqtapim nacerqani. Suqta killayuq kachkaptiymi taytay wañukurqa, hinaptinmi mamay uywawarqaku pusaq warmakunata. Wakcham karqaniku, vecinoykunapas wakcham karqaku.

Suwakunapa chawpimpim wiñarqani, chaymi ñuqapas suwakuq kani, hukkunawanmi maqanakuq kani, hinaspapas drogakuqmi kani. 10 wataypi kachkaspaymi chuchumika warmikunapaq hinaspa maymi yachasqaypi suwakuqkunapaq llamkayta qallaykurqani.

14 wataypiqa yachaysapañam rikurirurqani runakunata engañaspay. Huk kutipim achkasuta relojkunata, anillokunata, pulserakunata rantirurqani hinaspam runakunaman rantikurqani “qurimanta ruwasqam” nispay mercadokunapi, carrokunapa sayananpi, callekunapi. Chaymi huk punchawlla rantikururqani 10.000 dolares nisqan qullqiman.

Ñuqaqa mana kasukuq warmakunata correginanku wasipim karqani. Chaymi 15 wataypi kachkaspay qarqurachikurqani chay wasimanta. Hinaptinmi mana maypipas puñunay kaptin puñuq kani callekunapi, plazakunapi, wakinpiñataq warmamasiykunapa wasinpi.

Achka kutipim policiakunapa makinman chayarqani, ichaqa manam carcelawarqachu mana suwakuspay rantikusqayrayku. Runakunata engañasqallaymantam multata pagachiwaq. Ñuqaqa manam pitapas-maytapas manchakuqchu kani, chaymi llamkarqani qullqi prestaq runakunapaqpas. Wakinpiqa balayuqmi puriq kani.

BIBLIAM VIDAYTA CAMBIARURQA:

17 wataypim chayllaraq bibliamanta uyarirqani. Uywanakurqanim huk sipaswan, chay sipasmi bibliamanta Jehova Diospa testigonkunawan yachayta qallaykurqa. Chaymi Diospa kamachikuyninkuna sasa hina ñuqapaq kaptin chay sipasta saqiruspay huk sipaswanña ripukurqani.

Chay sipaspas Jehova Diospa testigonkunawanmi bibliamanta yachayta qallaykurqa, hinaspam pacienciakuq, kuyapayakuq warmiña rikurirurqa. Chaymi huk kutipi huñunakuyninman rinaypaq niykuwaptin rirqani, hinaptinmi chaypi runakunaqa sumaq kuyakuq sunquyuq runakuna kasqa. Chayna kuyakuq runakunataqa manam haykapipas rikurqanichu. Ñuqaqa wiñarqani mana kuyasqam, mamaypas manam kuyakuqchu karqa. Hinaptinmi bibliata estudianaypay niykuwaptinku chaylla “arí” niykurqani.

Iskay amistadniykunawanmi suwakunaykupaq tantiakurqaniku. Ñuqam debekurqani pukllasqaymanta 50.000 dolar qullqita, ichaqa bibliata estudiayta qallaykusqayraykum suwakuqqa manaña rirqaniñachu. Chay iskay runakunam ichaqa hinalla suwakunankupaq tantiarurqaku hinaptinmi hapiruspan huknintaqa sipirusqaku, huknintañataq carcelman churarusqaku. Ñuqañataqmi anchata Jehova Diosta agradecekurqani chaynapi mana tarikusqayrayku.

Bibliapim 1 Corintios 6:10 nin: “Dios kamachiptinqa manataqmi kanqachu: Suwakunapas, imatapas llumpayta munapayaqkunapas, sinkakuqkunapas, runamasin insultaqkunapas nitaq engañowan qichuqkunapas”, nispa. Chayta leeruptiymi wiqiypas atiparuwarqa hinaspam cuentata qukurqani vidayta cambianaypaq (Romanos 12:2). Ñuqaqa llumpay maqakuq runam karqani, vidaypas manam vidachu karqa.

Yacharurqanitaqmi Jehova Diosqa llakipayakuq hinaspa pampachakuq kasqanta (Isaias 1:18). Chaymi tukuy sunquymanta Jehova Diosta mañakurqani mana allin kawsasqayta hinaspa vicioykunata saqinaypaq. Chaymi taytanchikpa yanapakuyninwan pisi-pisimanta cambiarqani hinaspaymi uywanakusqay sipaswan casarakurqani.

24 wataypaqa ñam 3 churiyuqña karqani, paykunata uywanaypaqmi llamkapakunay karqa. Manamá ñuqaqa escuelamanpas rirqanichu, chaymi mana ima llamkapakuypipas atirqanichu hinaspaymi kaqmanta Jehova Diosta mañakurqani llamkayta tarinaypaq. Llamkaq maskasqaypim runakuna tapuwaq imapi llamkasqaymanta, hinaptinmi mana ima niyta atiqchu kani. Wakinpiqa willakurqanim “bibliatam estudiachkani allin runa kanaypaq” nispay. Chaynata niptiypas manam chaskiwaqchu. Huk kutipim llamkapakunaypaq tapuwaqniy runaman willakurqani imayna kasqayta hinaspa bibliamanta estudiasqaymantapas. Paymi niwarqa: “Imanasqaya llamkanaykipaq chaskikiman, hinatayá chaskisqayki”, nispa. Chaywanmi cuentata qukurqani Jehova Dios yanapawasqanta. Chaymanta qipallamanmi Jehova Diospa testigon kanaykupaq warmichaypiwan iskayniyku bautizakurqaniku.

IMAKUNAPIM YANAPAWARQA:

Wañusqañach kachkayman karqa Diospa yachachikuyninkunata mana kasukuspayqa chaynataq Jesusta mana qatipakuspayqa. Kunanqa kusisqam kawsakuniku warmichaywan hinaspa churiykunawan, sunquypipas hawkam tarikuni. Manam iskayrayanichu Jehova Dios pampachaykuwasqanmantapas.

14 watañam tukuy tiempoywan Jehova Diosta servichkani, kunanmi kallpanchakuchkani Jehova Diosmanta runakunaman yachachinaypaq. Warmichaypas qaynakunallam ñuqa hinaña tukuy tiemponwan Diosta servichkan. Kunankamam 22 llamkaqmasiy runakunata yanaparuni Jehova Diospa testigon kanankupaq. Kunankunapas hinallaraqmi hatun rantipakuna wasikunamanpas richkani icha manam runakunata engañanaypaqchu, aswanqa bibliamanta yachachinaypaqmi. Yachachinim kay pachata Dios kamachimuptinqa manaña suwakunapas kananmanta (Salmos 37:10, 11).