¿Qullqichu apamun ñakariykunata?

¿Ima nintaq bibliaqa?

Bibliaqa manam ninchu tukuy ñakariykunata qullqi apamusqantaqa. Runakunaqa piensankum qullqiwan kuska ñakariykuna rikurimusqanmanta. Chaymi ninkuraq: “Qullqiraykum mana allinkunaqa rikurirqa”, nispa. ¿Chaynatachu biblia nin? Manam. Bibliaqa nin: “Qullqilla kuyayqa tukuy mana allin ruwaykunapa qallariyninmi”, nispam (1 Timoteo 6:10).

¿Bibliaqa ima nintaq qullqimanta?

Bibliapim niwanchik qullqita allinta servichikuptinchikqa yanapawananchikmanta (Eclesiastes 7:12 a). Chaymantapas qukuykuq hinaspa qullqinkuwan yanapakuqkunamantam bibliapiqa allinta riman (Proverbios 11:25).

Ichaqa bibliaqa niwanchikmi qullqillaman mana qukurunanchikmanta. Hebreos 13:5 nin: “Amayá qullqilla maskaymanqa qukuruychikchu, aswanqa imam kapusuqnikichikwanyá hawka kawsakuychik”, nispa. Chaymi mana qullqilla maskaymanqa qukurunanchikchu. Mikunanchik, pachanchik, wasinchik kaptinqa kapuqllanchikwanmi kawsakunanchik (1 Timoteo 6:8).

**¿Imanasqataq qullqita mana kuyananchikchu?**

Qullqillaman llumpayta qukuruq runaqa manam wiñay kawsaytaqa haypanqachu (Efesios 5:5). Qullqillata llumpayta kuyayqa taytacha-mamacha yupaychay hinam (Colosenses 3:5). Chaymantapas llumpayta qullqita kuyaq runakunaqa Diostapas qipanchankum. Chaymantapas bibliapim nin: “Chaylla apuyaruy munaqqa castigasqapunim kanqa”, nispa (Proverbios 28:20). Chaymi wakin runakunaqa qullqita kuyaruspanku runamasinta suwanku hinaspa wañuchinku.

Chaymantapas qullqi kuyaymanta rimaspanqa bibliaqa ninraqmi: “Apuyaylla munaqkunaqa tentachikunkum hinaspam tuqllaman wichiykunku, munapayankutaqmi mana valeq hinaspa mana allin kaqkunatapas, chaykunaqa wañuyllaman hinaspa mana allinllamanmi apurawman apakun”, nispa (1 Timoteo 6:9).

¿Imanasqataq allin kanman bibliapa nisqanta kasukuy?

Jehova Diosta kasukusqanchikraykum mana allinkunataqa mana ruwanchikchu qullqita tarinapaqqa. Allin kaqta ruwananchikpaq kallpanchakuptinchikqa Diosqa manam qunqawasunchu, kikin Diosmi niwanchik: “Manapunim ñuqaqa haykapipas qunqasqaykichu nitaqmi saqisqaykichu”, nispa (Hebreos 13:5, 6). Chaymantapas niwanchiktaqmi: ‘Confianzapaq runaqa ancha bendecisqam kanqa’, nispa (Proverbios 28:20).

Qullqimanta bibliapa ima nisqankuna

Eclesiastes 7:12: ‘Kapuqniyuqkunataqa qullqinmi defienden’.

¿Ima ninantaq? Qullqita allinta servichikuptinchikqa yanapawachwanmi.

Lucas 12:15: “Runapa vidanqariki tukuy imayuq kaptinpas manam kapuqninkunamantachu kanqa”.

¿Ima ninantaq? Vidanchikmi aswan allin qullqimantaqa manam qullqichu quwasun wiñay kawsaytaqa.

1 Timoteo 6:10: “Qullqilla kuyayqa tukuy mana allin ruwaykunapa qallariyninmi. Wakinmi qullqita kuyaruspanku iñisqanmantapas karunchakurunku, hinaspam tuksichikuchkaq hina llumpayta ñakarinku”.

¿Ima ninantaq? Achka runakunam qullqita kuyaruspanku casado vidankupipas rakinakuykunaman chayanku, wakinqa unquykunatam tarinku llumpayta llamkasqankurayku.

Hebreos 13:5: “Amayá qullqilla maskaymanqa qukuruychikchu, aswanqa imam kapusuqnikichikwanyá hawka kawsakuychik”.

¿Ima ninantaq? Qullqillaman qukuruymantaqa kapuqllanchikwan kawsakuymi aswan allinqa.

Mateo 19:24: “Diospa munaychakuyninman apu runapa yaykunanmantaqa camelloraqchá agujapa rinrinta yaykurunman”.

¿Ima ninantaq? Jesusqa apu runatapas qatiqnin kananpaqmi nirqa ichaqa tukuy kapuqninta anchata kuyaspam mana qatikurqachu. Chaymi kapuqninchikta Diosmanta astawan kuyaspaqa wiñay kawsaytaqa mana haypasunchu.

a Kay qillqapi ñawpaq testamentoqa Chuya Qellqa sutiyuq bibliamantam kachkan.