Aswan allinta mañakunapaqyá kallpanchakusun

1. ¿Imata ruwananchikpaqmi Jehova Diosqa niwanchik? (Qawaytaq fotokunatapas).

¿PITATAQ mañakunanchik ima sasachakuypipas kaspa utaq imatapas allinta tantiakunapaq yanapaykuwananchikpaq? Jehova Diosninchiktam. Kikinmi mañakunanchikpaq niwanchik. Sapa kuti paywan rimananchikta munasqantam yachanchik bibliapi “Diostayá tukuy tiempo mañakuychik” niwasqanchikwan (1 Tes. 5:17). Chaymi paytaqa mañakuchwan mana recelaspa chaynapi imatapas allinta tantiakunapaq (Prov. 3:5, 6). Chaymantapas, achka kutikama mañakuptinchikpas Diosqa manam niwachwanchu “chayllataña qamqa, achka kutikamañam mañakaramuwanki” nispaqa.

2. ¿Imamantam kay yachachikuypi yachasun?

² Jehova Diosninchiktam anchata agradecekunchik imapaqpas mañakunanchikpaq niwasqanchikmanta. Wakinpim ichaqa tukuy ima ruwayniyuq kasqanchikrayku tiemponchik mana haypawachwanchu Jehova Diosta mañakunapaqqa. Ichapas cuentata qukunchik aswan sumaqta mañakunamanta. Chaypaqmi yanapawanchik bibliapi sumaq yachachikuykuna. Kay yachachikuypim yachasun Jesus hina Diosta mañakunamanta hinaspa imaynata chaypaq tiempochakunamanta. Yachasuntaqmi Diosta mañakuyninchik aswan sumaq kananpaq pichqa ruwaykunamantapas.

JESUSQA TAYTANTA MAÑAKUNANPAQMI TIEMPOCHAKUQ

3. ¿Imatam Jesusqa yacharqa?

³ Jesusqa allintam yacharqa mañakunanchikta Jehova Dios anchata munasqanta. Jesusqa hanaq pachapi kaspanmi qawarqa kay pachapi Diosta serviqkuna mañakamuptin taytan uyariykuspa yanapaykusqanta. Paykunamanta wakinmi karqa Ana, David, Elias (1 Sam. 1:10, 11, 20; 1 Rey. 19:4-6; Sal. 32:5). Chaymi Jesusqa qatiqninkunata nirqa mana recelaspa tukuy tiempo Jehova Diosta mañakunankupaq (Mat. 7:7-11).

4. ¿Imaynatam Jesusqa taytanta mañakuq? ¿Imaynatam ñuqanchikpas qatipakuchwan?

⁴ Jesusqa sapa kutim taytanta mañakuq, chayqa qatiqninkunapaqmi qatipakunankupaq hina karqa. Achka runakunawan kaspanpas chaynataq tukuy ima ruwayniyuq kaspanpas Jesusqa tiempochakuqmi taytanta mañakunanpaq (Mar. 6:31, 45, 46). Chaymi payqa tutapaytaraq hatarispan sapanpi taytanta mañakuq (Mar. 1:35). Huk kutipim Jesusqa tukuy tuta taytanta mañakurqa yanapaykunanpaq, chaynapi allinta tantiananpaq (Luc. 6:12, 13). Wañukunan tutapas Jesusqa achka kutitam taytanta mañakurqa, chay kutipi Diosta kasukuynin llumpay sasa kananta yachaspan (Mat. 26:39, 42, 44).

5. ¿Imatam Jesus hina ruwananchik?

⁵ Jesusmantam yachanchik tukuy ima ruwayniyuq kaspapas Diosninchikta mañakunapaq tiempochakunamanta. Jesus hinam ñuqanchikpas tutapayta hatarispa Diosta mañakuchwan, utaq manaraq puñuykuchkaspa. Chayta ruwaspam Jehova Diosninchikta agradecekuchkanchik mañakunanchikpaq niwasqanchikmanta. Rimarisunchik iñiqmasinchik Lynemanta, payqa ancha kusisqam tarikurqa Diosninchik mañakuyta atinanmanta yacharuspan. Paymi nin: “Jehova Diosninchikta imay horapas mañakuptiy uyariwananmanta yacharuspaymi allin amistadniypaqña hapirqani. Chaymi munarqani sapa kuti aswan sumaqta mañakuyta”, nispa. Pay hinachá ñuqanchikpas piensanchik. Kunanñataqyá yachaykusun Jehova Diosta mañakuspa pichqa ancha allin kaqkuna ruwaykunamanta.

DIOSTA MAÑAKUSPA PICHQA ANCHA ALLIN KAQKUNA RUWAYMANTA

6. ¿Imatam nin Apocalipsis 4:10, 11 nisqapi Jehova Diosmanta?

⁶ Diostayá hatunchasun. Apostol Juanmi musquypi hina rikururqa hanaq pachapi 24 kamachiqkunata. Paykunaqa Jehova Diostas yupaychachkasqaku. Paykunas Jehova Diosta hatunchaspanku nisqaku: ‘Qamllam kanki llapallanpa hatunchananqa hinaspa yupaychananqa’, nispa (leey Apocalipsis 4:10, 11). Angelkunapas sapa kutim Jehova Diostaqa hatunchanku. Hanaq pachapi Dioswan kuska kasqankuraykum paykunaqa allinta riqsinku Diosninchik imayna kasqanta. Tukuy ima ruwasqanpim angelkunaqa cuentata qukunku Diosqa sumaq sunquyuq kasqanta. Chaymi sunqumanta hatunchayta munanku (Job 38:4-7).

7. ¿Imaynatam Jehova Diosta mañakuspa hatunchachwan?

⁷ Ñuqanchikpas Jehova Diosta mañakuspam payta hatunchananchik. Chaypaqqa ninanchikmi imanasqa kuyasqanchikta hinaspa respetasqanchikta. Bibliata leespaqa kallpanchakusunyá yuyaymananapaq, chaynapi Diosninchik imayna kasqanta yachanapaq (Job 37:23; Rom. 11:33). Chaymantam imayna kasqanta yacharuspa imayna tarikusqanchikta ninanchik. Jehova Diostaqa hatunchachwantaqmi ñuqanchikta utaq mayqin iñiqmasinchiktapas yanapaykusqanmanta yacharuspa. Payqa sapakamatam qawamuwachkanchik imayna tarikusqanchikta yachananpaq chaynataq waqaychaykuwananchikpaq (1 Sam. 1:27; 2:1, 2).

8. ¿Imakunamantam Jehova Diosta agradecekuchwan? (Rimarimuytaq 1 Tesalonicenses 5:18 nisqanmantapas).

⁸ Jehova Diostayá agradecekusun. Diosninchikta mañakuspaqa tukuy imamantam agradecekuchwan (leey 1 Tesalonicenses 5:18). Tukuy allin kaqkuna chaskisqanchikqa Jehova Diosmantam hamun, chaymi tukuy chaykunamanta agradecekunanchik (Sant. 1:17). Paytaqa agradecekuchwanmi kay allpa pachanchikta suma-sumaqta unanchasqanmanta, tukuy imata sumaqta unanchasqanmanta, vida quwasqanchikmanta, ayllunchikmanta, amistadninchikkunamanta hinaspa hamuq tiempopi imakuna ruwananmanta sumaqta willawasqanchikmanta. Chaymantapas anchatam agradecekunchik amistadnin kanapaq akllaykuwasqanchikmanta.

9. ¿Imanasqam agradecekuyta qunqaruchwan?

⁹ ¿Imakunaraykutaq sapakama Jehova Diosta agradecekuchwan? Wakinpiqa manam chayllachu cuentata qukusun imakunamanta Diosta agradecekunapaq. Chayqa pasawachwan mana agradecekuq runakunapa chawpinpi kawsasqanchikraykum. Runakunaqa imankupas kapusqankumanta agradecekunankumantaqa imapas munasqankutam astawan mañakunku. Paykuna hina kaspaqa imapas munasqanchikta quwanallanchikpaqmi mañakuchwan hinaspam agradecekuyta qunqaruchwan. Chay mana pasaruwananchikpaqqa kallpanchakunanchikmi agradecekuq kanapaq. Chaynapi Jehova Diosninchikta mañakuspa tukuy ima quwasqanchikmanta agradecekunapaq (Luc. 6:45).

10. ¿Imaynatam huk iñiqmasinchikta agradecekuq kasqan yanaparqa? (Qawaytaq fototapas).

¹⁰ Agradecekuq kaspaqa ima sasachakuypi tarikuspapas manam llumpaytaqa hukmanyasunchu. 2015 watapi 15 eneropaq lluqsimuq Willakuq qillqapim rimarqa Kyung-sook sutiyuq iñiqmasinchikmanta. Paytam doctorkuna niykurqaku pulmonninpi cancer unquy kasqanrayku manaña unayta kawsananmanta. Paymi nin: ‘Unqusqaymanta yacharuspaymi muspaypi hina tarikurqani, wañunaymanta piensaspaymi manchakurqani’, nispa. ¿Imataq yanaparqa mana llumpayta hukmanyananpaq? Hina kikinmi willakurqa sapa tuta manaraq puñuq richkaspan wasinpa altosninman rispan Jehova Diosta mañakusqanmanta, hinaspa chay punchaw pichqa allin kaqkuna pasasqanmanta Diosta agradecekusqanta. Chayta ruwasqansi anchata yanapasqa hawkalla kananpaq hinaspa Jehova Diosta anchata kuyasqanta ninanpaqpas. Payqa kikinmi qawarqa ima sasachakuypipas tarikuptinchikqa Diosninchik imaynata yanapaykuwasqanchikta. Cuentatataqmi qukurqa imapas sasachakuykunamantaqa bendicionkunata aswan achkata chaskisqanchikmanta. Iñiqmasinchik Kyung-sook hinam ñuqanchikpas ima sasachakuypi kaspapas utaq unquspapas Diosninchikta agradecekunanchik tukuy ima quwasqanchikmanta. Chayta ruwaspaqa kallpanchasqam tarikusun ima sasachakuytapas hawkalla aguantanapaq.

11. ¿Imanasqataq Jesuspa qatiqninkunaqa mana manchakuq kananku karqa?

¹¹ Jehova Diostayá mañakusun paymanta willakuspa mana manchakuq kanapaq. Hanaq pachaman manaraq kutikuchkaspanmi Jesusqa qatiqninkunata kaynata yuyarichirqa: ‘Ñuqamantam willakunkichik Jerusalenpi, enteron Judeapi, Samariapi chaynataq kay pachapa cantonkama’, nispa (Hech. 1:8; Luc. 24:46-48). Chaymanta qipallamanmi Judea religionpi umalliqkuna Pedrotawan Juanta presocharurqaku hinaspam hatun corteman pusarqaku. Chay runakunam amenazaspanku nirqaku Diosmanta amaña willakunankupaq (Hech. 4:18, 21). ¿Imatam Pedrowan Juanqa ruwarqa?

12. Hechos 4:29, 31 nisqanman hinaqa, ¿imatam Pedrowan Juanqa ruwarqaku?

¹² Hatun cortepi kachkaspankum Pedrowan Juanqa kaynata nirqaku: “Sichu Diospa qawasqanman hina pay uyarinamantaqa qamkunata uyariy allin kaptinqa, chayqa qamkunamantañayá kachun. Ñuqaykum ichaqa mana upallaymankuchu rikusqaykumantawan uyarisqaykumanta willakuytaqa”, nispanku (Hech. 4:19, 20). Judea religionpi umalliqkuna Pedrotawan Juanta kachaykuruptinkum paykunaqa Jesuspa wakin qatiqninkunawan tupaykurqaku, hinaspankum llapallanku kuska Jehova Diosta mañakurqaku paypa munayninta hinalla ruwanankupaq. Kaynata nispam mañakurqaku: ‘Serviqnikikunatayá kallpanchawayku mana manchakuspa palabraykimanta hinalla rimanaykupaq’, nispa. Jehova Diosqa uyariykurqamá chayna mañakusqankutaqa (leey Hechos 4:29, 31).

13. ¿Imatam yachanchikman iñiqmasinchik Jin-yukmanta?

¹³ Autoridadkuna Diosmanta willakunanchikta harkakuwaptinchikqa ñuqanchikpas Jesuspa qatiqninkuna hinam ruwananchik. Chaytam ruwarqa iñiqmasinchik Jin-yukpas, paytam carcelman aparurqaku guerraman riyta mana munasqanrayku. Chaypim paytaqa kamachirqaku castigasqa presomasinkunaman ima necesitasqankutapas apananpaq. Chay iñiqmasinchikqa chay presokunawanqa imapas necesitasqallankumantam rimanan karqa. Bibliamantam ichaqa mana rimapayananchu karqa. Chaymi payqa Jehova Diosta mañakurqa mana manchakuq hinaspa allin tantiuyuq kananpaq, chaynapi imay ratupas Diosmanta willakunanpaq (Hech. 5:29). Paymi willakun: “Jehova Diosmi mañakusqayta uyariykullawarqa. Payqa mana manchakuq kanaypaq hinaspa imatapas yachaywan ruwanaypaqmi yanapaykuwarqa. Chaymi presomasiykunaman bibliamanta sapa kuti yachachiyta qallaykurqani yaqa pichqa minutolla. Tutanñataqmi cartakunata ruwaq kani paqarintin presomasiykunaman qunaypaq”, nispa. Iñiqmasinchik Jin-yuk hinam ñuqanchikpas mana iskayrayanchikchu hinalla willakunapaq Diosninchik yanapawananchikmantaqa. Chaymi mañakuchwan mana manchakuq kanapaq hinaspa imatapas yachaywan ruwanapaq.

14. ¿Imatam ruwananchik sasachakuyninchikta atipanapaq? (Rimarimuytaq Salmos 37:3, 5 nisqanmantapas).

¹⁴ Jehova Diostayá mañakusun sasachakuyninchikpi yanapaykuwananchikpaq. Wakiqninchikmi llakisqa tarikunchik kuyasqa ayllunchik wañukusqanrayku, Diosmanta willakunanchikta gobierno harkakusqanrayku utaq imawanpas unqusqanchikrayku, imamantapas llakikusqanchikrayku utaq familianchikmantapas. Covid unquy rikuriramusqanraykum chaynataq guerrakuna kasqanraykum astawanraq sasachakunchik. Chaymi Jehova Diosninchikman tukuy ima sasachakuyninchikta mana pakaykuspa willakunanchik. Paymanqa kuyasqa amistadninchikman hinam tukuy imamanta willakuchwan. Payqariki yanapaykuwasunpunim, chaymantaqa manam iskayrayanachu (leey Salmos 37:3, 5).

15. ¿Imaynatam Diosta mañakuyqa yanapawanchik sasachakuypi tarikuptinchik? Willarimuy iñiqmasinchik Kristinmanta.

¹⁵ Mana amiruspa Jehova Diosta mañakuyqa yanapawanchikmi ima sasachakuypipas kaspa hinalla aguantanapaq (Rom. 12:12). Diosninchikqa yachanmi ima sasachakuypipas tarikusqanchiktaqa. Chaymi ‘yanapaykuwananchikpaq qayakusqanchikta uyariykuwanchik’ (Sal. 145:18, 19). Chayna kasqanmantam willawanchik 29 watanpi kaq iñiqmasinchik Kristin. Payqa precursoram. Paysi qunqayllamanta unquyta qallaykusqa, chaywansi llumpay hukmanyasqa tarikullasqa. Chaymanta qipallamantaqsi mamantapas doctorkuna tarirusqa mana hampiy atina unquyta. Kristinmi willakun: “Jehova Diostam waqa-waqarispa sapa punchaw mañakullaq kani, hinalla aguantanaypaq kallpata quwananpaq. Hinaspapas manam saqiqchu kani huñunakuykunam riyta chaynataq sapallaypi Diosmanta aswan yachaytapas”, nispa. Payqa ninraqmi: “Diosninchikta tukuy sunqumanta mañakusqaymi yanapawarqa chayna sasachakuykunapi tarikuptiy. Jehova Dios mana haykapipas saqiwasqanta yachasqaytaqmi sunquytapas tiyaykachirqa. Manamá chayllachu unqusqaymantaqa allinyarqani, ichaqa Jehova Dios mañakusqayta uyariykuwasqanwanmi sunquypi hawka tarikurqani”, nispa. Amayá qunqasunchu “Jehova Diosqa yachanmi sasachakuykunamanta serviqninkuna libraytaqa” nispa bibliapi nisqantaqa (2 Ped. 2:9).

16. ¿Imanasqataq Diosta mañakunanchik tentacionkunaman mana wichiykunapaq?

¹⁶ Jehova Diostayá mañakusun tentacionkunaman mana wichiykunapaq. Pantaq kasqanchikraykum sapa punchaw kallpanchakunanchik tentacionkunaman mana wichiykunapaq. Satanasqariki munachkanmi imaynanpapas mana allin ruwaykunaman wichiykunanchikta, chaymi tukuy imata rikurirachin. Internetpipas mana allin kusirikuykunatam rikurirachin. Chaykunawan kusirikuspaqa mana allin munaykunapiñam piensachwan. Chayqa Jehova Diosmantam karuncharuwachwan, hinaspapas hatun huchamanmi wichiykuchwan (Mar. 7:21-23; Sant. 1:14, 15).

17. Diosta mañakuspapas, ¿imataraqmi ruwananchik tentacionkunaman mana wichiykunapaq? (Qawaytaq fotokunatapas).

¹⁷ Tentacionkunaman mana wichiykunapaqqa Jehova Diosllam yanapawanchikman. Chaymi Jesuspas Diosta imayna mañakunapaq yachachisqanpi nirqa: “Amayá saqiychu tentasqa kanaykutaqa, aswanqa satanasmantayá libraykullawayku”, nispa (Mat. 6:13). Jehova Diosqa munachkanmi yanapaykuwayninchikta, chaypaqqa mañakunanchikmi. Ichaqa manataqmi mañayllachu-mañakunanchik, aswanqa tentacionkunaman mana wichiykunapaqmi kikinchikpas tukuyta ruwananchik. Chaymi mana leenanchikchu nitaq uyarinanchikchu satanaspa rikurichisqan kaqkunataqa (Sal. 97:10). Chaymantapas, Jehova Diospa munasqanman hina piensanapaqqa biblianchiktam leenanchik, estudiananchik, huñunakuykunaman rinanchik chaynataq Diosmanta willakunanchik. Chaykunata ruwaspaqa manam hawa runakuna hinaqa piensasunchu. Chaymantapas Jehova Diosqa niwanchikmi: ‘Manam saqisqaykichikchu mana aguantay atinaykichikkama sasachakuypi kanaykichiktaqa’, nispa (1 Cor. 10:12, 13).

18. ¿Imatam llapanchik ruwananchik?

¹⁸ Kay tukupay tiempopi Diosman sunqu kanapaqqa astawanmi Diosninchikta mañakunanchik. Kikinmi niwanchik ‘sunqunchikta payman kicharinapaq’ (Sal. 62: 8). Chayraykum llapallanchik tiempochakunanchik sapa punchaw Diosta sunqumanta mañakunapaq. Mañakuchwanmi hatunchanapaq, tukuy ima quwasqanchikmanta agradecekunapaq, mana manchakuspa paymanta willakunapaq, sasachakuyninchikpi yanapaykuwananchikpaq chaynataq tentacionkunaman mana wichiykunapaqpas. Chaynaqa, amayá imapas harkawasunchu Diosninchikta hinalla mañakunapaqqa. Ichaqa, ¿imaynatam yachachwan mañakusqanchikta Diosninchik uyarimuwasqanchikta? Hawantam chaymanta yachasunchik.