¿Chaninchanchikchu bendicionkuna chaskisqanchikta?

JEHOVÁ DIOSMI israelitakunata Egiptopi sirviente kasqankumanta libraykurqa. ¡Mayna kusisqachá tarikurqaku libre kaspanku Diosta servisqankumantaqa! (Exo. 14:29–15:1, 20, 21.) Ichaqa qonqayllamantam quejakuyta qallaykurqaku. Jehová Dios paykunarayku rurasqanta yuyarinankumantaqa chunniqpi sasachakuypi tarikusqankumantam quejakurqaku. Chaymi Diospa chaynataq Moisespa contranpi nirqaku: “¿Imapaqtaq Egipto nacionmanta horqomuwarqankiku kay chunniqpi wañunaykupaqqa? Manam mikuypas nitaq yakupas kanchu. Amirunikuñam kay mana gustasqayku mikuytapas”, nispa (Num. 21:5).

Pachak watakuna pasaruptinmi, David kaynata Diosman takirqa: “Kuyakuynikipimá confiakullachkani, salvawasqaykipimá kusikullachkani. Tayta Diosnillaymanmá ñoqa takillasaq. Favornillanmantamá ñoqa takillasaq”, nispa (Sal. 13:5, 6). Davidqa manam qonqarqachu Dios achka kutipi kuyakuyninta qawachisqantaqa. Aswanqa sapa kutim chaykunapi yuyaymanarqa (Sal. 103:2). Kunanpas Jehová Diosqa achka kutipim yanapawarqanchik ichaqa qonqaruchwanmi. Mana chayna kananpaqmi yuyarinanchik Diospa bendicionkuna qowasqanchikta.

‘Diosqariki sumaqllaña amigom’

Salmos qellqaqmi takirqa: “Tayta Diosqariki sumaqllaña amigopas hinamya respetaqninpaqqa”, nispa (Sal. 25:14). ¡Mayna sumaqmi ñoqanchikpaq Diospa amigon kay atisqanchikqa! Ichaqa sapa punchaw imapas rurayninchikkunam, Taytanchikman asuykunapaq harkawanchikman. Chayna kaptinqa piensananchikmi Dioswan amistadninchik imapi tukunanmanta. Jehová Dios amistadninchik kasqanraykum confiananchikta suyan hinaspa munantaqmi imayna sientekusqanchikta willakunanchiktapas (Pro. 3:5, 6; Fili. 4:6, 7). Hinaptinqa, ancha allinmi imayna mañakusqanchikta qawakuyninchikqa.

Mozollaraq Paul cristianom imayna mañakusqanmanta yuyaymanaspan cuentata qokurqa, mañakuynin aswan allin kananpaq kallpanchakunanmanta.a Ninmi: “Ñoqaqa hina nisqallaytam sapa kuti mañakurqani”, nispa. Payqa Índice de las publicaciones Watch Tower qellqapim orakuymanta maskarqa hinaspam cuentata qokurqa yaqa 180 oracionkuna Bibliapi kasqanta. Chay mañakuypim Diospa serviqninkuna tukuy sonqonkuwan mañakusqankuta qawachinku. Paulmi nin: “Chayna mañakusqankupi yuyaymanaspaymi yacharurqani necesitasqaytapuni mañakunaypaq, chaymi yanapawarqa sonqomanta mañakunaypaq. Kunanqa munanim mañakuspay Diosman asuykuytaqa”, nispa.

‘Imam horapi mikunapaq’

Jehová Diosqa bendeciwanchiktaqmi Bibliapi cheqap yachachikuykunata qowaspanchik. Chayraykuchá ‘sonqonchikpi kusisqa kasqanchikrayku’ kusisqa takinchik (Isa. 65:13, 14). Ichaqa cuidakunanchikmi cheqap yachasqanchikkunata mana allinkunawan yanqacharuyta. Ejemplopaq, cheqap yachachikuypa contranpi kaqkunapa nisqankunata uyarispaqa, iskayrayaruchwanmi hinaspa ‘confianza sirvientewan’ Jehová Dios ‘imam horapi mikuchiwasqanchiktam’ otaq iñiyninchikpi allin kanapaq yachachikuykunatam qepancharuchwan (Mat. 24:45-47).

Chaynam pasarqa achka wataña Diosta serviq Andres cristianota. Paymi Internet nisqapi Diospa llaqtanta saqeruqkunapa nisqankunata leerurqa mana imanananta piensaspan. Ninmi: “Cheqap yachachikuyman rikchakuq kasqanta qawaspaymi astawan leeyta munarqani. Astawan leespaymi Jehová Diospa llaqtanta saqeruyta munarqani. Ichaqa Jehová Diospa testigonkunapa contranpi nisqankunamanta allinta yuyaymanaspaymi cuentata qokurqani pantay yachachiq hinaspa sacre kasqankuta. Cheqapman rikchakuq nisqankunaqa manam imam kaqchu karqa. Chaymi kaqmanta qellqanchikkunata leeyta qallaykurqani hinaspa huñunakuykunaman riytapas. Hinaptinmi chaylla cuentata qokurqani tiempoyta usuchisqaymanta”, nispa. Andresqa congregacionmanmi kutimurqa.

‘Iñiqmasinchikkuna’

Kuyanakuspa chaynataq huñulla Diospa llaqtanpi kasqanchikqa sumaq bendicionmi (Sal. 133:1). Chaychá Pedroqa kaynata qellqarqa: “Kuyaychik iñiqmasikichikkunata”, nispa (1 Ped. 2:17). Diospa llaqtanpi kaptinchikmi kapuwanchik wawqe-paninchikkuna, turi-ñañanchikkuna chaynataq tayta-mamanchikkunapas, hinaspam kuyakuynintawan yanapakuyninta chaskinchik (Mar. 10:29, 30).

Ichaqa iñiqmasinchikkunawanqa imamantapas piñanakuymi kanman. Ejemplopaq, imayna kasqanmantam sientikuruchwan hinaspa contranpipas rimachwan. Chayna kaptinqa yuyarinanchikmi serviqninkuna pantaq kaptinkupas Jehová Dios ancha kuyasqanta. Yuyarisun, sichu nisun: “‘Manam ñoqaqa huchayoqchu kani’ nispaqa, kikinchikmi engañakuchkanchik, Diospa cheqap yachachikuyninqa manaraqmi ñoqanchikpichu kachkan” (1 Juan 1:8). Aswanqa ‘aguantanakuspayá pampachanakuychik’ niq consejotam kasukunanchik (Col. 3:13).

Sipasllaraq Ana cristianam yacharurqa iñiqmasinchikkunamanta karunchakuy mana allin kasqanta. Jesuspa willakusqanpi chinkasqa churi kutimusqanman hinam, Diospa llaqtanmanta karunchakururqa hinaspam cuentata qokuruspan kutimurqa (Luc. 15:11-24). ¿Imatam yacharurqa? Ninmi: “Kutimusqaymantapacham lliw iñiqmasiykunata astawan kuyani. Ñawpaqpiqa chayllam contrankupi rimaq kani, kunanmi ichaqa manaña imaraykupas paykunamantaqa karunchakusaqchu. Congregacionpiqa Dioswan hinaspa iñiqmasinchikkunawanmi hawkayayta tarinchik. Manamá imaraykupas karunchakunanchikchu”, nispa.

Agradecekusun bendicionkunamanta

Diospa gobiernon runakunapa sasachakuyninta allichananmanta suyakuyqa mana tupachiy atinam. Chay gobierno imakuna rurananmanta chayllaraq uyarispaqa, ¡anchatamá agradecekurqanchik! Ñoqanchikqa rikchakunchikmi Jesuspa willakusqanpi ‘ancha precioyoq perlasta’ rantinanpaq tukuy kapuqninta rantikuruq negocianteman (Mat. 13:45, 46). ¿Perlasninta chaninchayta saqerurqachu? Chaymantaqa Jesusqa manam imatapas nirqachu. Ñoqanchikpas manam haykapipas saqenanchikchu Diospa qowasqanchik suyakuymanta agradecekuytaqa (1 Tes. 5:8; Heb. 6:19).

Piensarisun 60 wata masnintaña Diosta serviq Juana cristianapi. Paymi nin: “Diospa Gobiernon imakuna rurananmanta mana qonqanaypaqmi yanapawan runakunaman willasqay. Chay Gobierno imam kasqanmanta runakuna entiendeptinkum kusisqa tarikuni. Chaymantapas Bibliapa yachachisqan runakunapa vidanta cambiasqanta qawaspaymi, piensani: ‘¡Mayna sumaq yachachikuykunatam willachkanchik!’”, nispa.

Hinaptinqa anchatam Diosta agradecekunanchik bendicionkuna qowasqanchikmanta. Chaywanpas kaykunawanmi sasachakunchik: onqoykunawan, yuyaqyaywan, llumpay llakiwan, contranchikpi churakuptinku, familianchik wañukuptin hinaspa qollqemantapas. Ichaqa, yachanchikmi tukuy kaykuna pasaruqlla kasqanta. Mosoq pachapiqa Diospa Gobiernonmi tukuy ñakariykunata chinkachinqa hinaspam Dioswan amistadninchikpi chaynataq tukuy imapipas bendicionkunata chaskisun (Apo. 21:4).

Chaykamaqa, Salmos qellqaq hinayá Diosta agradecekusun kunan bendicionkuna chaskisqanchikmanta, paymi nirqa: ‘Yupaychasqay Dios Taytalláy, achka-achkallañam milagrokunapas rurallasqaykiqa. Achka-achkallañam favorniykupipas tanteallasqaykiqa. Manam pipas yupaytaqa atinmanchu rurasqaykitaqa. Manach willaytapas atiymanchu rurallasqaykimantaqa’, nispa (Sal. 40:5).

[Willakuy]

[18 kaq paginapi dibujo]

Jehová Diosqa yanapawanchikmi sasachakuykunata aguantanapaq