Señorpa cenan

Jesusqa mana hatun tukuq kaymantam apostolninkunaman chakinkuta mayllaspan yachachirqa. Chaymantam pascua mikuyta mikuruptinku Diosmanta willakuq Davidpa willakusqanmanta nirqa: “Hapipakusqay amigoypas, kuska mikuqmasiypas contraypim hatarirun”, nispa. Hinaspapas nirqam: “Huk kaqnikichikmi qipanchawanqa”, nispa (Salmo 41:9; Juan 13:18, 21).

Apostolkunañataqmi qawanakuspa nirqaku: “Señor, manamá ñuqachu kani ¿aw?”, nispanku. Judas Iscariotepas chaynallatam nirqa. Pedroñataqmi Juanta Jesuspa waqtanpi kaptin nirqa pi kasqanmanta tapunanpaq. Chaymi Juanqa Jesuspa qasqun lawman waqtapaykuspan Jesusta nirqa: “Señor, ¿pitaq payqa?”, nispa (Mateo 26:22; Juan 13:25).

Jesusñataqmi nirqa: “Payqa parten tantata nuyuykachispa qusqaymi”, nispa. Hinaspam tantata nuyuykachispan Judas Iscarioteman quykuspa nirqa: “Runapa churinqa paymanta qillqasqa kasqanman hinam wañunqa. Ichaqa, ¡imaynaraq kanqa runapa churinta qipanchaq runaqa! Aswan allinmi kanman karqa chay runapa mana naceyninqa”, nispa (Juan 13:26; Mateo 26:24). Judasmanqa satanasmi yaykururqa, payqa mana allin runaña rikuriruspanmi satanaspa makinpiña churakuykurqa, chaymi wañunan karqa (Juan 6:64, 70; 12:4; 17:12).

Chaymantam Jesusqa Judasta nirqa: “Imam ruwanaykitaqa ruwayñayá”, nispa. Judaspa makinpim qullqi churananku cajacha karqa, chaymi wakin apostolkunaqa piensarqaku Jesusqa fiestapaq imatapas rantichiy munasqanta utaq wakchakunaman imatapas quy munasqanta (Juan 13:27-30). Judasmi ichaqa Jesusta traicionaq pasakurqa.

Chayna pasakuptillanmi Jesusqa wañukusqanta yuyarinapaq tutata qallarichirqa. Payqa tantata hapiykuspanmi Diosta mañakurqa, hinaspanmi parteykuspan apostolninkuna mikunankupaq qurqa, hinaspam nirqa: “Kayqa cuerpoywanmi tupan, cuerpoyqa qamkunaraykum qusqa kanqa. Hinallayá kayta ruwaychik ñuqata yuyariwaspa”, nispa (Lucas 22:19). Apostolkunañataqmi tantata haywanakuspa mikurqaku.

Chaymantam Jesusqa vinota hapiykuspan Diosta mañakurqa hinaspa apostolkunaman haywaykurqa, hinaptinmi llapanku vinota tomarqaku. Jesusñataqmi nirqa: “Kay vasoqa yawarniywan ruwasqa musuq acuerdowanmi tupan, yawarniyqa qamkunaraykum chaqchusqa kanqa”, nispa (Lucas 22:20).

Chaynatam Jesusqa wañukunan punchawta yuyarinankupaq kamachirqa, chaytaqa nisan killapa sapa 14 punchawninpim yuyarinanku karqa. Chayqa Jesusrayku hinaspa Jehova Diosrayku allin sunquyuq runakuna wañuymantawan huchamanta librasqa kanankutam yuyarichinan karqa. Chayqa pascua fiestamantapas aswan allinraqmi karqa Dios kuyaq runakuna wiñaypaq librasqa kanankuta yuyarichisqanrayku.

Jesusqa yawarninmantam nirqa: “Chaqchusqam kanqa achkallaña runakunapa huchan pampachasqa kananpaq”, nispa. Chayqa qawachinmi apostolninkunawan Jesuspa qatiqninkuna huchankumanta pampachasqa kanankuta. Paykunam Jesuswan kuska hanaq pachapi kananku karqa (Mateo 26:28, 29).