Jesuspa qatiqnin kanapaqqa tukuytam ruwana

Jesusqa kamachiq fariseopa wasinman mikuq rispanmi sumaq yachachikuykunamanta rimarqa. Chaymantam Jerusalenman hinalla rirqa, paywantaqmi achkallaña runakunapas rirqaku. Chay runakunaqa yaqapaschá Jesuspa qatiqnin kayta munarqaku.

Chay runakunatam risqankupi Jesus nirqa: “Ñuqaman hamuqmanta pipas: Taytanta, mamanta, señoranta, churinkunata, wawqi-paninkunata hinaspa kikinpa vidantapas mana chiqnispanqa manam qatiqniyqa kanmanchu”, nispa (Lucas 14:26). Chaywanqa ichapas wakinqa hukmanyarurqaku. Ichaqa, ¿ima niytam Jesusqa munachkarqa?

Payqa manam qatiqninkunaqa chiqaptapuni ayllunkuta chiqninankumantachu rimachkarqa, aswanqa Jesusta astawan kuyanankumantam. Paykunaqa manam chayllaraq casarakuruq runa hinachu wischupakunanku karqa, chay runaqa mikuq rinanpaq qayachisqa kaspanpas llullantam casarakusqanraykulla riyta mana munarqachu (Lucas 14:20). Bibliapiqa willakuntaqmi judiokunapa ñawpaq abuelonku Jacobqa Lea sutiyuq warminta chiqnisqanmanta, ichaqa Raquel sutiyuq huknin warminta astawan kuyasqantam niyta munan (Genesis 29:31).

Jesusqa nirqataqmi paypa qatiqninqa “kikinpa vidantapas” chiqninanmanta, utaq kikinmantapas aswanqa Jesusta kuyananmanta, chaytaqa mana sasachakuspallam wañunanña kaptinpas ruwan. Chaynaqa, Jesuspa qatiqnin kayqa manam pukllay hinallachu, chaymi Jesuspa qatiqnin kananpaqqa allinta pipas tanteanan.

Chaymantapas Jesuspa qatiqninkunaqa sasachakuypim kananku karqa, chaymi Jesusqa nirqa: “Pipas qatiwaqniy ñakarichiqnin qirunta mana qipispanqa manam qatiqniyqa kanmanchu”, nispa (Lucas 14:27). Jesusqa willakurqañam chiqniqninkunapa makinpi wañuchisqa kananmantaqa. Chaynaqa, Jesuspa qatiqninkunaqa pay hina ñakarichisqa kaytaqa manam manchakunankuchu.

Chaykunaraykum Jesusta Jerusalenman qatiq runakunapas allinta tanteananku karqa qatiqnin kanankupaqqa. Chaymi Jesusqa hinallaraq nirqa: “Qamkunamanta mayqinnikichikpas wasi hatarichiyta munaspanqa, tiyaykuspanmi puntataraq hayka gastananmanta tantean: ‘¿Qispirachinaykamachu llapa imay hayparuwanqa?’, nispan. Mana chayqa cimientota churaruspanmi mana qispichinmanchu”, nispa (Lucas 14:28, 29). Chayraykum Jesusta qatiq runakunaqa alli-allinta tanteakunanku karqa qatiqnin kanankupaqqa, chaynapi imaña kaptinpas mana hukmanyarunankupaq. Chayta sumaqta yachanankupaqmi Jesusqa kamachiq runawanpas yuyaymanachirqa.

Nirqam: “¿Mayqin kamachiqtaq guerraman rispanqa tiyaykuspan puntata hukkunata mana tapukunchu, chunka waranqa soldadonkunawan iskay chunka waranqa soldadoyuq kamachiq enemigonta vencey utaq mana vencey atinanmanta? Mana atinanmanta musyakuspanmi enemigon karullapiraq kachkaptin comisionta kachan hawkallaña kanankupaq. Chaynaqa, chiqaptapunim nikichik: Manam mayqinnikichikpas qatiqniyqa kawaqchikchu tukuy imaykichikta mana saqispaqa”, nispa (Lucas 14:31-33).

Jesuspa willakusqanqa manam paywan kuska riq runakunallapaqchu karqa, aswanqa llapan qatiqnin kayta munaqkunapaqwanmi. Chayraykum pipas Jesuspa qatiqnin kayta munaspaqa payrayku imankunatapas saqinan hinaspa wañuytapas mana manchakunanchu. Chaymi allinta tanteanapaqqa yuyaymanana hinaspa Diostapas mañakuna.

Chaymantam Jesusqa ancha riqsisqa yachachikuyninpi hina qatiqninkunata kachiwan tupachispan nirqa: “Qamkunaqa kay pachapa kachinmi kankichik”, nispa (Mateo 5:13). Imaynam kachipas aycha ama ururunanpaq yanapan, chaynam Jesuspa qatiqninkunapas runakunata yanapananku karqa Dioswan hinalla kuyachikunankupaq hinaspa allin kaqkunata hinalla ruwanankupaq. Chaymantam Jesusqa wañukunanpaq manaña unay kasqanrayku nirqa: “Kachiqa allinpunim, ichaqa kachi qamyayaruptinqa, ¿imawantaq kutichiwaqchik puchqu kaynintaqa?”, nispa (Lucas 14:34). Jesusta uyariqkunaqa yachaqkum kachiqa wakillan chuya kasqanta, wakinñataq imakunawanpas chaqrusqa kasqanrayku manaña allin kasqanta.

Chay nisqanwanmi Jesusqa unayña qatiqnin kaqkunamanpas nichkarqa qatiy munayninkuqa ama chinkarunanpaq. Mana chayqa imakunawanpas chaqrusqa qamyayaruq kachi hinam mana allinña kanmanku karqa. Hinaptinqa runakunam paykunamanta asikunmanku karqa, chaymantapas Dioswan manaña kuyachikuspam pinqaymanña Diospa sutintapas churanmanku karqa. Manam pipas chayman wichiykuytaqa munanchikchu. Chaymi Jesusqa nirqaraq: “Pipas rinriyuqqa uyarichunyá”, nispa (Lucas 14:35).