¿Ima ninmantaq Jesus?

¿Allinchu kanman gobiernopa rurasqankunapi religionpa chaqrukuynin? Achka religionpi kaqkunam allin kasqanta piensanku, ninkutaqmi religionqa gobiernoman hukllawakuruspan runakunata yanapanankuta. Hukkunañataqmi piensanku religionwan gobierno mana chaqrukunanmanta. ¿Ima niwaqtaq qamqa? ¿Hukllawakunankuchu?

RELIGIONPI imayna kanapaqmi runakunaqa Jesusta qatipakunanku. ¿Ima ninmantaq gobiernowan religion hukllawasqa kayninmanta? Jesucristoqa kay pachapi kachkaspallanraqmi chay tapukuytaqa contestarqaña. Chaymantapas, imayna kawsasqanwanmi qawachirqa chaymanta ima piensasqanta. Ancha Reqsisqa Yachachikuyninpim qatiqninkunata nirqa runamasinkuta imayna yanapanankupaq. Chay nisqankunamanta wakinta qawasunchik.

Runakunatam vidankupi yanapanku

Runakunapaq imayna kanankumantam Jesusqa qatiqninkunata kaynata nirqa: ‘Qamkunaqa kay pachapi runakunapaqmi kachi hina kankichik. Kachi qamyayaruspaqa ¿imapaqtaq valenman? Manam imapaqpas servinñachu aswanqa wischusqa kaptin runakuna sarutyanallanpaqñam. Qamkunaqa runakunapaqmi achkiy hina kankichik [...]. Mechero hinam kanaykichik runakunapa qayllanpiqa chaynapi allin rurasqaykichikta qawaspanku hanaq pachapi kaq Taytaykichikta paykunapas alabanankupaq’, nispa (Mateo 5:13-16). ¿Imanasqataq Jesusqa discipulonkunata tupachirqa kachiwan hinaspa achkiywan?

Jesusqa manam nirqachu wakin runakunallapaq kachi hina chaynataq achkiy hina qatiqninkuna kanankumantaqa. Aswanqa nirqam llapallan runakunapaq kachi hina kanankumanta hinaspa Diosmanta yachay munaqkunapaq achkiy hina kanankumanta. Qawasqanchikman hinaqa manam nichkarqachu runakunamanta sapaqchasqa kanankutaqa.

Kaypi piensariy, aycha mana asnarunanpaqmi kachiqa allin kanqa hinaptinchik manam huklawpi churaptinchikchu. Kaypipas piensariytaq, ¿imaynamá mecheroqa kanchanman tutayaypi mana kaspanqa? Chayraykum, Jesusqa qatiqninkunataqa mana nirqachu huklawman pasakuspanku chaypi sapaq kawsanankutaqa. Manataqmi nirqachu Diosta servinankupaq wasipi wichqasqa kanankutaqa. Imaynam aychatapas kachi yanapan mana asnarunanpaq hinaspa achkipas tutayaypi kanan kanchananpaqqa, chaynam cristianokunapas runakunapaq kananku vidankupi yanapanankupaq.

‘Paykunaqa manam kay pachapa’ partenchu kanku

Jesuspa kayna nisqanmi wakin runakunata piensarichin gobiernota cristianokuna imayna qawanankumanta. ¿Imanasqa? Manaraq wañukuchkaspan Taytanta mañakusqanpim Jesusqa qatiqninkunapaq kaynata mañakurqa: ‘Mañakuykiqa manam kay pachamanta horqonaykipaqchu aswanqa Diablomanta waqaychanaykipaqmi. Ñoqaqa manam kay pachallapaqchu kani chaynataqmi paykunapas mana kay pachallapaqtaqchu’, nispa (Juan 17:15, 16). Chaynaqa, ¿imaynatamá cristianokunaqa runakunapa vidanpi yanapanmanku kay pachapa parten mana kachkaspankuqa? Kaymanta yachanapaqqa kimsa tapukuykunamantaraq qawasun:

• ¿Imatam Jesus piensarqa gobiernokunamanta?

• ¿Imatam kunan tiempopi cristianokunaqa rurananku?

• ¿Imapitaq runakunata yanapan Jesuspa yachachisqanqa?

[4 kaq paginapi suti rikuylla kaq willakuy]

Jesusqa manam munarqachu runakunamanta qatiqninkuna karunchasqa kanankutaqa