¿Imatataq ruwanay Jehova Diospa testigon kanaypaq?

Bibliapi Mateo 28:19, 20 nisqanpim Jesusqa nirqa Jehova Diospa testigon kanapaqqa imakunata ruwanamanta. Chaypi nisqanman hinaqa pipas Jesuspa qatiqnin utaq Jehova Diospa testigon kayta munaspaqa Jesuspa ruwasqantam qatipakunan, Jesusqa taytan Jehova Diosmantam lliw runakunaman yachachirqa. Yachaykusunyá testigo kanapaq imakuna ruwanamanta.

1 kaq: Bibliamantam allinta yachana. Jesusmi qatiqninkunata kamachirqa runakunaman yachachinankupaq, chaynapi qatiqninkunaña kanankupaq (Mateo 28:19, 20). Pipas Jesuspa qatiqnin kananpaqqa bibliapa yachachikuyninkunamantam allinta yachanan, astawanraqmi Jesuspa yachachisqankunamantaqa. Chaykunamanta yachaspaqa kusisqa hinaspa hawkam kawsakusun (2 Timoteo 3:16, 17). Munaymankum bibliamanta mana qullqillapaq yachaykachiyta (Mateo 10:7, 8; 1 Tesalonicenses 2:13).

2 kaq: Bibliapa nisqantam ruwana. Jesusqa qatiqninkunatam nirqa lliw yachasqankuta ruwayman churanankupaq (Mateo 28:20). Arí, manam biblia ñawinchayllachu, ñawinchaspaqa ichapas vidaykita hinaspa imayna piensasqaykita cambianayki kanqa (Hechos 10:42; Efesios 4:22-29; Hebreos 10:24, 25). Jesuspa kamachisqanta kasukuqkunaqa pay hina kawsakuytam munanku, chaymi Diosllapaqña kawsakunankupaq tanteakunku (Mateo 16:24).

3 kaq: Bautizakunam (Mateo 28:19). Bibliapim bautizakuyta tupachin pampasqa kaywan (tupachiy Romanos 6:2-4). Bautizakuspaqa qawachinchikmi ñawpa vidanchikpaq wañusqa hinaña kasqanchikta hinaspa Diospa munasqanman hinaña kawsakuy munasqanchikta. Chaymi pipas bautizakuqqa bibliamantaqa allintaña yachan hinaspapas bibliapa nisqanman hinañam kawsakun, chaynallataqmi allin concienciayuq kananpaqpas Diosta mañakurqaña (Hebreos 9:14; 1 Pedro 3:21).

¿Imaynatam yachawaq bautizakunaykipaq hinaña kasqaykimanta?

Bautizakuyta munaspaqa iñiqkunapi punta apaqkunamanmi willanayki, chaynapim qanwan rimaspanku qawanqaku sichu bibliamanta imam kaqta yachasqaykimanta, kasukusqaykimanta hinaspa Diosllapaqña kawsakunaykipaq tanteakurusqaykimanta (Hechos 20:28; 1 Pedro 5:1-3).

Testigokunapa wawa-churinkupas ¿chaynallatachu ruwananku?

Arí. Kallpanchakunikum “Diospa kamachisqanman hinaspa yachachisqanman hina” wawa-churiykuta uywanaykupaq (Efesios 6:4). Ichaqa wiñasqankuman hinam kikinku tanteakunanku bibliamanta yachanankupaq hinaspa nisqankunata kasukunankupaq, chaynapi bautizakunankupaq (Romanos 12:2). Sapakamam tanteakunanchik Diosta servinapaq utaq manapas (Romanos 14:12; Galatas 6:5).