24 KAQ YACHACHIKUY
Tukuy Galileapim Jesusqa Diosmanta willakurqa
MATEO 4:23-25 MARCOS 1:35-39 LUCAS 4:42, 43
JESUSQA TAWA QATIQNINKUNAWAN KUSKAM TUKUY GALILEA LAWPI PURIRQA
JESUSQA KARU LLAQTAKUNAPIPAS RIQSISQA RUNAM RIKURIRURQA
Jesusqa mana samaykuspam tukuy punchaw Capernaum llaqtapi tawa qatiqninkunawan kuska chisiyarqa. Tutaykuytapas unquqkunata runakuna pusaptinmi hampirqa, chaymi mana sapallan kaytaqa atirqachu.
Hinaspanmi paqarintinta tuta-tutalla hatariruspan lluqsirurqa sapanpi Jehova Diosta mañakuq. Ichaqa manam unaychu sapallan kaytaqa atirqa. Simon Pedrowan wakinmi Jesuspa lluqsisqanta musyaruspanku maskaqnin rirqaku. Yaqachusmi Pedro puntataqa maskayta qallaykurqa wasinpi Jesusta samachisqanrayku (Marcos 1:36; Lucas 4:38).
Tariruptinkuñataqmi Pedro nirqa: “Llapallankum maskasuchkanki”, nispa (Marcos 1:37). Capernaum llaqtapi runakunaqa Jesuspa ruwasqanmanta llumpayta kusikuspankum hinallapi kananta munarqaku (Lucas 4:42). Ichaqa, ¿unquqkunata hampinallanpaqchu Jesusqa kay pachaman hamurqa? Chaymantapas, ¿Capernaum llaqtallapichu Diospa munayninta ruwanan karqa?
Kikin Jesusmi qatiqninkunata nirqa: “Hakuchik hichpapi kaq llaqtakunaman chaypipas willakunaypaq”, nispa. Harkaqnin runakunatapas nirqam: “Huk law llaqtakunapipas Diospa munaychakuyninmanta sumaq willakuytaqa willakunaymi, chaypaqmi ñuqataqa kachamuwarqa”, nispa (Marcos 1:38; Lucas 4:43).
Arí, Jesusqa kay pachamanqa hamurqa Diospa munaychakuyninmanta utaq gobiernonmanta astawan willakunanpaqmi. Chay gobiernowanmi Jehova Diospa sutinqa chuyanchasqa kanqa, chaymantapas kay pachapi tukuy mana allinkunam tukunqa. Hinaptinqa, ¿imanasqataq Jesusqa runakunata imamantapas hampispan yanaparqa? Diospa kachamusqan kasqanta qawachinanpaqmi. Moisespas achka watakuna ñawpaqtam Diospa atiyninwan imakunatapas ruwarqa Diospa kachasqan kasqanta qawachinanpaq (Exodo 4:1-9, 30, 31).
Chaymi Jesusqa Capernaum llaqtamanta huk lawkunamanña rirqa Diosmanta willakunanpaq. Yaqa semanallaraqmi karqa Pedrota, Andresta, Juanta hinaspa Santiagota maykunamanpas riysinanpaq Jesuspa nisqanqa, chaymi paykunapas rirqaku.
Galilea lawpi Jesuspa hinaspa qatiqninkunapa willakusqankuqa ancha allinmi karqa. Jesusqa riqsisqa runam rikurirurqa Siria lawkunapipas, Decapolis lawpipas hinaspa Jordan mayupa chimpankunapipas (Mateo 4:24, 25). Chaykunamanta hinaspa Judea lawkunamantapas achka runakunam Jesustaqa qatirqaku. Achka unquqkunatam hinaspa demonioyuq runakunatam pusarqaku, hinaptinmi Jesusqa hampirqa hinaspa demoniokunatapas qarqurqa.