Revistanchikta leeqkunam tapukunku

¿Hayka qollqeytataq churanay?

“Diosqa kuyan kusikuywan qoqtam” (2 Corintios 9:7). Bibliapa kayna nisqanta millonninpi religionniyoq runakuna yachaptinkupas, wakinkuqa hikutasqapaschá sientekunku achka qollqeta qonankupaq. Wakin religionkunapiqa runakunatam mañanku kapuqninkuman hina diezmota qonankupaq.

Hinaptinqa, ¿Bibliaqa kamachinchu hayka qollqeta qonapaq? Chaymantapas tapukunkipaschá, ¿haykatataq qoyman?, nispa.

Ñawpa tiempopi sonqomanta hinaspa obligasqa qosqankumanta

Bibliaqa sutillatam willawanchik israelitakuna kapuqninkumanta hayka qonankupaq Diospa kamachisqanmanta (Levitico 27:30-32; Numeros 18:21, 24; Deuteronomio 12:4-7, 11, 17, 18; 14:22-27). Kay kamachikuyqa manam sasachu karqa. Jehová Diosmi israelitakunata prometerqa chay kamachikuyta kasukuptinku ‘llimparichkaqta tukuy imatapas qonanmanta’ (Deuteronomio 28:1, 2, 11, 12).

Wakinpiñataqmi israelitakunaqa qonanku karqa sonqonkumanta achkatapas otaq asllatapas voluntadninkuman hina. Ejemplopaq, Jehová Diospa templonta rurananpaq tantearuptinmi runakunaqa “pachak soqta chunkan pichqayoq tonelada qorita” qorqaku (1 Cronicas 29:7).a Kunanñataq tupachisunchik kay Allpapi kaspan Jesuspa qawasqanmanta. Paymi ‘qawarqa [ofrendakuna churana baulman] iskay qollqechakuna churaq wakcha viudata’. ¿Piensachwanchu hayka churasqanmanta? Huk punchaw jornalpa pagon kananpaqqa, churanmanchá karqa 64 kutita. Chayna pisilla kaptinpas Jesusqa nirqam Jehová Diospa agradonpaq kasqanta (Lucas 21:1-4).

¿Cristianokuna obligasqachu kachkanku hayka qollqe qonankupaq?

Diezmota qonankupaqqa kunan tiempopi cristianokunaqa manañam Leyman hina obligasqañachu kachkanku. Ichaqa sonqonkupi tanteasqankuman hinam qonku, chaywanmi kusisqa tarikunku. Jesusmi nirqa: “Ima chaskiqmantapas aswan kusisqaqa imapas qoqmi” nispa (Hechos 20:35).

Jehová Diospa testigonkunaqa enteron pachapi predicanankupaqqa, sonqonkumantam qonku. Chay qosqankutam servichikunku kayna qellqakunata ruranankupaq hinaspa huñunakunanku Salonkunata ruranankupaq chaynataq cuidanankupaqpas. Chay qosqankuqa manam sueldota hina paganakunankupaqchu. Wakin Testigokunam ichaqa tukuy tiempo predicacionman qokunku, chaymi yanapakuyta chaskinku pasajenkupaq chaynataq hukkunapaqpas. Manataqmi mayqenninkupas chay yanapakuyta chaskinankupaqqa hikutankuchu. Ichaqa yaqa llapallan testigonkunam predicasqankumanta chayna yanapakuytaqa mana chaskinkuchu. Aswanmi apostol Pablo hina sapakama llamkanku mantienekunankupaq (2 Corintios 11:9; 1 Tesalonicenses 2:9).

Sichu pipas Jehová Diospa testigonkunapa predicasqanta qollqenkuwan yanapayta munaspankuqa, ¿haykatataq qonmanku? Pablom qellqarqa: “Sapakamayá qochun sonqonpi tanteasqanman hina, ama llakikuspachu nitaq obligasqachu, Diosqa kuyan kusikuywan qoqtam”, nispa (2 Corintios 8:12; 9:7).

[Willakuy]