Allpanchikqa chakillañam kachkan | ¿Imatam biblia nin chaymanta?

• The Guardian periodicopim nirqa: “China nacionpim mana haykapipas hina llumpa-llumpayta rupakuchkan”, nispa (7 septiembre 2022).

• Noticias ONU niqpim nirqa: “Africa lawpi wakin nacionkunapiqa kay watapas manachusmi paranqachu, kay watawanqa pichqa watañam kanqa mana parasqan”, nispa (26 agosto 2022).

• BBC News niqpim nirqa: “Europa lawpi achka nacionkunapim nichkanku usyay tiempo unay kananmanta, chayna usyaqa manañam 500 watakunapiqa karqachu”, nispa (23 agosto 2022).

Achka cientificokunam nichkanku watakuna pasasqanman hina llumpay rupay kasqanrayku usyay tiempoqa aswanyananmanta. ¿Nisqankuman hinachu kanqa? ¿Ima nintaq bibliapiqa?

¿Imatam bibliapi nin?

Kay tiempo imayna kananmantam bibliapi kaynata nin:

• “Kanqam […] kaypi-chaypi […] muchuypas”, nispa (Lucas 21:11).

Mana para kasqanraykum mikuypas mana kanchu. Chaymi bibliaqa nirqaña muchuy kasqanrayku runakuna ñakarinankumanta hinaspa wañunankumanta (Apocalipsis 6:6, 8).

¿Imanasqataq kay tiempokunapiqa usyayllaña kachkan?

Imanasqa kaykuna pasakusqanmantam bibliapi nin:

• “Runapaqqa manam makinpichu maynin puriyta akllakunanpaqqa”, nispa (Jeremias 10:23).

Kayqa yachachiwanchikmi runakuna ‘maynin puriyta akllakuspankuqa’ utaq kikinku gobiernakuspankuqa mana allinpi tukunankumanta. Mana allinta tantiasqankuraykum yakuqa mana lliwpaq haypanchu utaq usyay tiempopas aswanyachkan.

• Achka cientificokunam ninku kay allpa pachanchikta runakuna llumpayta qachachasqankurayku llumpay rupay kasqanmanta, chaymi paranan tiempopiqa manaña paranchu hinaspa usyayllaña kakuchkan.

• Runakunaqa apuyayllatam munanku, manataqmi hamuq tiempopi imayna kananpiqa piensankuchu. Chaymi montekunapi sachakunata kuchuparunku, allpata qachachanku, hinaspa allpamanta tukuy clase mineralkunata hurqunku. Chaykunaraykum yakuqa tukuchkan.

Bibliapim ichaqa hamuq tiempopaq sumaq willakuyta willawanchik.

¿Haykapipas tukuy ima allinyanqachu?

Bibliapi nisqanman hinaqa Diosmi yakumanta sasachakusqanchikta allichanqa. ¿Imaynatam chayta ruwanqa?

1. 1. Diosmi ‘kay pacha qanrachaqkunata chinkachinqa’ (Apocalipsis 11:18). Qullqillata munaspa kay allpa pachata qachachaqkunatam Diosqa chinkachinqa (2 Timoteo 3:1, 2).

2. 2. “Rupaywan chakiruq allpapas suquskunapa kananñam kanqa” (Isaias 35:1, 6, 7). Diosmi kay chakillaña allpa pachanchikta sumaqta huertayachinqa, hinaspam yakuqa tukuy lawpi achka kanqa.

3. 3. “Qanmi kay allpa pachata cuidanki, chaymi kay allpa pachaqa tukuy imayuq” (Salmos 65:9). Jehova Diospa bendicionninwami kay allpa pachapi lliw runakunapaq mikuypas, yakupas achka kanqa.