Jesusqa ayllunwan kuskam Jerusalenman riqku

Killakuna chayaramuptinmi Joseyqa lliw ayllunwan hinaspa riqsinakusqankunawan Jerusalenman rirqaku. Chaypim Diospa kamachisqanman hina pascua fiestata ruwaqku (Deuteronomio 16:16). Nazaretmanta Jerusalenmanqa yaqa kimsa punchaw puriymi karqa. Chaymi rinankupaqqa llapanku imankutapas allichakuqku, Jesuspas ancha kusisqallañam karqa Diospa wasinman kaqmanta rinanta yachaspanqa. Payqa 12 watanpiñam karqa.

Hinaspam Jerusalenman chayaruspanku achka punchawkuna chaypi karqaku. Pascua fiesta ruwasqankumantaqa qanchis punchawtawanmi chaypi karqaku mana levadurayuq tanta nisqa fiestatawan ruwaspanku (Marcos 14:1). Chaypas hina pascua fiestallaraqmi karqa. Joseywan Mariaqa watan-watanmi yaqa iskay semanamanta Nazaret llaqtankumanqa kutiqku. Chay kutipim ichaqa aswan unaymantaña kutirqaku, ¿imanasqa?

Paykunaqa llapanku kutisqankuta piensaspam riqmasinkunawan kuska hawka richkarqaku. Samanankupaqña warmankuta huñuptinkum ichaqa Jesusqa mana kasqachu, nitaq riqmasinkunawanpas. Maynataña maskaspankupas manam tarirqakuchu. Chaymi Joseywan Mariaqa Jerusalenman kaqlla kutirqaku Jesusta maskaq.

Iskay punchawñam chaypipas maskarqaku, ichaqa manam tarirqakuchu. Kimsa punchaw maskasqankupiñam Diospa wasinpi tarirurqaku. Chaypim Jesusqa Diosmanta yachachiqkunawan tiyachkasqa tapuspan hinaspa rimasqankuta uyarispan. Chay runakunaqa uyarayachkasqakum Diosmanta Jesuspa yachasqankunawan.

Mariañataqmi wawanta rikuruspan nirqa: “Wawalláy, ¿imanasqataq kaytaqa ruwawankiku? Taytaykiwan ñuqam llakisqallaña maskachkarqaykiku”, nispa (Lucas 2:48).

Jesusñataqmi maskasqankumanta hukmanyaspan nirqa: “¿Imanasqataq maskawarqankichik? ¿Manachu yacharqankichik hanaq pacha taytaypa wasinpi kanayta?”, nispa (Lucas 2:49).

Chaymantam Jesusqa tayta-mamanwan Nazaretman kutirqa, hinaspam paykunata tukuy imapi hinalla kasukurqa. Payqa wiñasqanman hinam aswan yachayniyuq karqa, chaymi Jehova Diospas hinaspa runakunapas kuyarqaku. Kunan tiempopi mozo-sipaskunaqa anchatam Jesusmanta yachanmanku, Jesusqa warmallaraq kaspanpas Jehova Diosta yupaychaspam tayta-mamantapas kasukurqa.