Imamantam willakunanchik

‘DIOSTAYÁ RESPETAY KAMACHIKUYNINKUNATA KASUKUSPA’

ÑAWPA tiempomantaraqmi Jehova Diosqa Abrahanman willarqa imakunata ruraspan Allpantinpi ‘runakunata bendecinanmanta’ (Gen. 22:18). Runakuna ima ruranankumantam Salomonwan qellqachirqa: ‘Diostayá respetay qamqa. Paypa kamachikuyninkunatayá kasukuy qamqa. Chayllam runapa tukuy rurananqa’, nispa (Ecl. 12:13). Chay yachachikuykunamantaqa, ¿imaynatataq yachanmanku Allpantinpi runakuna?

Diospa yachachisqankunapi runakuna creeptinkupas Bibliapim willachirqaña ‘Señorpa punchawninpi’ allin noticiakunamanta Allpantinpi astawan willakunapaq kasqanmanta, ‘Señorpa punchawninqa’ 1914 kaq watamantam qallaykurqa (Apoc. 1:10). Apocalipsis 14:6, 7 nisqanman hinam angelkunapa yanapayninwan ‘llapallan nacionkunaman, ayllukunaman, castakunaman hinaspa tukuy rikchaq rimayniyoqkunaman’ willakunanchikmanta nin: “Diostayá manchakuywan alabaychik, juzganan horam chayaramunña, cielokunatapas kay pachatapas, lamar qochatapas hinaspa pukyukunatapas unanchaqtayá adoraychik”, nispa. Jehova Diosqa munanmi chay willakuymanta llapallan runakuna uyarinankuta, ñoqanchikmi chay noticiamanta willakunapaq favorecesqa kanchik.

“Cheqap Dios.” Pitaq cheqap Dios kasqanta qawachinanpaqmi Jehova Diosqa serviqninkunamanta nin: “Qamkunam testigoy kankichik”, nispan (Is. 43:10). Chaymi allin noticiamanta willakuspaqa manam yachachinchikchu mayqen religionpi kayllamantachu nitaq mayqen diospi creeyllamantachu. Aswanqa uyariwaqninchikkunamanmi yachachinchik Jehova Dioslla cielokunatapas kay Pachatapas unanchaq kasqanta (Is. 45:5, 18, 21, 22; Juan 17:3). Payllam yachan hamuq tiempopi imam pasananmanta, ñoqanchikmi favorecesqa kanchik prometesqankuna ñawpa tiempopi imayna cumplikusqanmanta qawachinapaq, chaykunam kallpanchawanchik hamuq tiempopi promesankunapipas confianapaq (Jos. 23:14; Is. 55:10, 11).

Achka runakunam taytacha-mamachakunata yupaychanku, wakinñataqmi mana mayqenpipas iñinkuchu. Paykunaman predicaspaqa ichapas rimayta qallarichwan yachay munasqankumanta rimaspa. Chaypaqmi yanapawachwan Hechos 17:22-31 nisqanpi ejemplo, chaypim apostol Pablo sumaqllata predicaspanpas sutillata yachachirqa cielotapas hinaspa kay Pachatapas Unanchaq Dios juzgananmanta.

Diospa sutintam reqsichinanchik. Cheqap Diostam reqsichinanchik sumaq sutinmanta willakuspa, paypa sutinmi Jehova (Ex. 3:15; Is. 42:8, NM). Jehova Diosmi Bibliapi 7 waranqa masnin kutita sutinta qellqachirqa, payqa munanmi runakuna sutinmanta riqsinankuta. Chaymi kallpanchasqa kanchik Diospa sutinmanta runakunaman willakunapaq (Deut. 4:35, NM).

Jehova Diosta reqsispa paypi iñiqkunallam hamuq tiempopiqa librakunqaku (Joel 2:32; Mal. 3:16; 2 Tes. 1:8). Ichaqa yaqa lliw runakunam Jehova Diostaqa mana reqsinkuchu, religionniyoq kaqkunapas manam reqsinkuchu. Bibliata leespankupas manam yachankuchu Diospa sutinmantaqa ichapas chayraq tikrasqanku wakin Bibliakunapi Jehova Diospa sutin mana rikurisqanrayku. Diospa sutinmanta yachaspankupas manam rimankuchu umalliqninku mana rimanankupaq kamachisqanrayku.

¿Imaynatam Diospa sutinmanta yachachichwan? Bibliapi qawachispam, allinmi kanman uyariwaqninchikpa Biblianpi qawachiyqa. Wakin Bibliakunapiqa Diospa sutinmi waranqantin kutita rikurin wakinpiñataqmi Salmo 83:18, Exodo 6:3-6 nisqankunallapi otaq Exodo 3:14, 15, 6:3 nisqanpi, ichaqa paginanpa uray patachanpi. Tikraqkunam Diospa sutinta tikrarunku qellqanankupaq kaq textokunapi “Señor” otaq “Dios” nispalla. Kay tiempokunapi Bibliata tikraqkuna Jehova Diospa sutinta qalaypaq chinkarachiptinkuqa ichapas Diospa sutinta qawachiwaq ñawpa tiempokunapiraq tikrasqanku Bibliapi. Wakin nacionkunapiqa yupaychanankupaq takikunapi otaq monumentokunapim Diospa sutin rikurin, chaykunatam qawachiwaq.

Traducción del Nuevo Mundo nisqa Bibliapim Jeremias 10:10-13 nisqankunapi yachachin Diospa sutinmanta chaynataq pim kasqanmanta, chaywan piensarichispam yanapachwan taytacha-mamacha yupaychaqkunata.

Jehova Diospa sutinmanta rimay, ama niychu cristiano tukuqkuna hinaqa “Dios” otaq “Señor” nispallaqa. Amataq piwanpas parlaspaqa sapa kutillachu Jehova niy, mana chayqa uyarisuqnikim hukmanyaruspan astawan parlaytaqa manaña munanqachu. Yachay munasqanpi reparaspa ichaqa Diospa sutinmanta willay.

Bibliapiqa Jehova Diospa sutinmi astawan rikurin “Señor” otaq “Dios” nisqankumantaqa. Bibliata qellqaq Diospa runankunaqa respetowanmi maypi tupasqanman hina Diospa sutinta qellqarqaku otaq rimarqaku, paykunata qatipakuyqa ancha allinmi.

Sutinwanmi reqsichikun. Diospa sutinmanta yachayqa cheqapmanta yachaymi.

Diosta kuyaspa iñinapaqqa manam sutillanmantachu yachana, yachanataqmi imayna Dios kasqanmantapas. Moisesman Sinai orqopi sutinmanta Jehova Dios willaspanqa manam sutillanmantachu willarqa, willarqataqmi imayna Dios kasqanmantapas. (Ex. 34:6, 7). Chayna rurasqanqa qatipakunapaqmi.

Predicaspapas otaq discursota qospapas Gobiernonpi bendicionkunamanta rimaspaqa sutillata qawachiy Diospa prometesqanmanta. Kamachikuyninkunamanta rimaspaqa qawachiy yachayniyoq hinaspa kuyakuq kasqanta. Allinta entiendechiy Diospa kamachikuyninkunaqa allinninchikpaq kasqanta (Is. 48:17, 18; Miq. 6:8). Atiyninwan imakuna rurasqanmanta entiendechispaqa qawachiy imayna Dios kasqanmanta kamachikuyninkunamanta hinaspa munayninmantapas. Sumaq kayninkunawan imayna kamachisqanta qawachiy. Jehova Diosta tukuy sonqoykiwan kuyasqaykimanta rimay, chaynata rimaspaqa uyarisuqnikikunatapas kallpanchankim Diosta kuyanankupaq.

Lliw runakunamanmi chaylla willananchik Diosta respetanankupaq. Imayna rimasqanchikwanmi runamasinchikta kallpanchana Jehova Diosta tukuy sonqonkuwan respetanankupaq (Sal. 89:7). Chayna rimasqanchikmi qawachinan Jehova Diosqa tukuy atiyniyoq Juez kasqanta chaynataq agradonpaq kawsaptinchikqa hamuq tiempopi libraqninchik kasqanmantapas (Luc. 12:5; Rom. 14:12). Diostam respetanchik tukuy sonqonchikwan kuyasqanchikrayku agradonpaq kawsaspa (Deut. 10:12, 13). Respetasqanchikqa kallpanchawanchiktaqmi mana allin kaqkunata cheqninapaq, kamachikuyninkunata kasukunapaq chaynataq tukuy sonqonchikwan yupaychanapaqpas (Deut. 5:29; 1 Cron. 28:9; Prov. 8:13). Amparawanchiktaqmi kay pachapi kaqkunata mana munapayanapaqpas (1 Juan 2:15-17).

Diospa sutinqa “mana tuñichiy atina torre hinam”. Jehova Diosta reqsiqkunaqa amparasqam tarikunku, manam Diospa sutinta rimasqallankuwanchu nitaq sumaq kayninkunamanta yachasqallankuwanchu aswanqa paypi confiasqankuraykum. Chayna runamantam Proverbios 18:10 nin: ‘Mana tuñichiy atina torre hinam Tayta Diosqa. Allin ruraq runaqa paymanmi amparakunanpaq kallpaykun’, nispa.

Uyarisuqnikikunata sapakutilla kallpanchay Jehova Diospi confianankupaq (Sal. 37:3; Prov. 3:5, 6). Paypi confiaspankuqa prometesqankunapi confiasqankutam qawachinqaku (Heb. 11:6). Bibliam yachachin salvakunankupaqqa Jehova Diospa sutin rimanankumanta, tukuy ima Unanchaq kasqanta reqsikunankumanta chaynataq paypi iñispa kamachisqankunata tukuy sonqonkuwan kasukunankumantapas (Rom. 10:13, 14). Hukkunaman yachachispaqa chaynata kawsanankupaq yanapay.

Achka runakunam mana allichay atina sasachakuykunapi tarikunku. Paykunata kallpanchay Jehova Diosmanta yachanankupaq, paypi confianankupaq chaynataq kamachisqankunatapas kasukunankupaq (Sal. 25:5). Kallpanchaytaq yanapayninta mañakunankupaq chaynataq bendicionninkunamanta agradecekunankupaqpas (Filip. 4:6, 7). Jehova Diostaqa reqsinqaku manam Bibliata leesqallankuwanchu aswanqa prometesqankuna vidankupi imayna cumplikusqanmanta allinta entiendespankum, chaynapim Diospa sutin reqsisqankurayku amparasqa tarikunqaku (Sal. 34:8; Jer. 17:7, 8).

Pimanpas yachachispaqa yanapananchikmi Jehova Diosta tukuy sonqonkuwan respetanankupaq chaynataq kamachikuyninkunatapas kasukunankupaq.

‘JESUSMANTAM WILLAKUNA’

KAWSARIRUSPAN hanaq pachaman manaraq kutichkaspanmi Jesusqa qatiqninkunaman willarqa: ‘Ñoqamantam willakunkichik kay pachapa cantonkama’, nispa (Hech. 1:8). Bibliaqa nintaqmi Diosta tukuy sonqonkuwan serviqkunaqa kay tiempopipas ‘Jesusmanta willakunankupaq’ (Apoc. 19:10). ¿Anchatachu kallpanchakuchkanki Jesusmanta willakunaykipaq?

Llampu sonqoyoq achka runakunam Jesuspi iñinku, ichaqa manam yachankuchu kay Pachaman manaraq hamuchkaspan hanaq pachapi kasqanmanta nitaq kay Pachapi kaspan aycha cuerpoyoq kasqanmantapas. Manam allintachu entiendenku Diospa Churin kasqanmanta nitaq Diospa munaynin Jesusnintakama imayna cumplikunanmantapas. Manataqmi yachankuchu kay tiempopi ima rurasqanmanta nitaq hamuq tiempopaq rurasqanwan vidanku imayna kananmantapas. Wakinpiqa piensanmankum Jehova Diospa testigonkunapas Cristopi mana iñisqanchikmanta. Chayna piensasqankuraykum Jesusmanta willakunanchikpaq favorecesqa kanchik.

Wakinqa manam creenkuchu Jesusmanta Bibliapi willakusqantaqa. Wakinñataqmi ninku Diospa Churin mana kasqanmanta. Chayna piensaq runakunaman ‘Jesusmanta willanapaqqa’ anchatam kallpanchakuna, pacienciakuna hinaspapas sumaqllatam yachachina.

Uyariwaqninchikkuna imayna piensaq kaspankupas Diospa prometesqan wiñay kawsayta haypanankupaqmi Jesucristomanta cheqapta yachananku (Juan 17:3). Jehova Diosqa sutillatam qawachin ‘Jesucristoqa Señor’ kasqanta reqsikunamanta chaynataq kamachisqankunata kasukunamantapas (Filip. 2:9-11). Chayraykum pantay yachaqkunaman otaq Jesucristota mana reqsikuqkunaman yachachispaqa cheqap kaqmanta yachachinapaq kallpanchakunanchik. Wakinpiqa chayraq watukusqanchikpichá mana sasachakuspalla Jesusmanta yachachisun, wakinpim ichaqa uyariwaqninchikpa imayna piensasqanmanta uyariykuspaña Jesucristomanta yachachinanchik kanqa. Wakinpiqa ichapas yachay munaqman achka kutita watukuspa Bibliamanta estudiachisqanchikman hina Jesucristomanta astawan yachachina kanqa (1 Tim. 2:3-7).

Diospa munaynin rurakunanpaq Jesus ima rurananmanta. Dioswan amistad kanankupaqmi runakunata entiendechinanchik Cristopi iñiyninku ancha allin kasqanmanta, Jesucristom nirqa: “Ñoqam kani ñan, cheqap kaqpas chaynataq kawsay qokuqpas. Taytaymanqa manam pipas chayanmanchu mana ñoqawanqa”, nispa (Juan 14:6). Jehova Diospa munayninpi Churin Jesus ima rurananmanta mana yachaspaqa manam entiendenqakuchu Bibliapi yachachikuykunamanta. ¿Imanasqa? Jehova Diosqa tanteasqankunatam cumplichinqa Jesucristontakama (Col. 1:17-20). Profeciakuna otaq ñawpaqmantaraq willakuykunam Jesuspi cumplikun (Apoc. 19:10). Diospa contranpi Satanas hatarisqanwan chaynataq Adanpa huchallikusqanwanmi tukuy mana allinkuna kasqanraykum Jehova Diosqa Jesucristowan allichachinqa (Heb. 2:5-9, 14, 15).

Cristopa rurayninkunata chaninchanapaqqa reqsikunanchikmi llakipayaypaq mana allinpi tarikusqanchikta, chayna tarikusqanchikmantaqa manam librakuyta atinchikchu. Llapallanchikmi huchayoqña nacenchik chaymi vidanchikpi sasachawanchik hinaspam wañuyman apawanchik (Rom. 3:23; 5:12). Uyarisuqnikikunata yanapay chaypi piensarinankupaq hinaspa allinta entiendechiy Jesucristontakama huchamantawan wañuymanta librawananchikpaq kuyakuq Jehova Dios tanteasqanmanta (Mar. 10:45; Heb. 2:9). Cristopi iñispankuqa mana huchayoqñam wiñay kawsayta haypanqaku (Juan 3:16, 36). Manam pipas salvakunmanchu Cristopi mana iñispanqa (Hech. 4:12). Estudiota qospapas otaq huñunakuypi yachachispapas Jesusmanta astawan entiendechiy. Librawananchikpaq Cristo imakuna rurasqanmanta agradecekunankupaq uyarisuqnikikunata pacienciawan hinaspa kuyakuywan kallpanchay. Jesucristo rantinchikpi wañusqanmanta agradecekuspankuqa kallpanchakunqakum imayna piensasqankuta, rurasqankuta chaynataq munasqankutapas cambianankupaq (2 Cor. 5:14, 15).

Jesucristom huchanchikrayku chulla kutillata wañurqa, kunanqa ñawpa tiempopi sacerdotekunapa jefen hinam Dioswan allinyanachiwachkanchik (Heb. 9:28). Chaykunamanta uyarisuqnikikunaman allinta entiendechiy. ¿Llumpay hukmanyasqachu tarikunku runamasinku mana confianapaq otaq mana kuyapayakuq kasqankuwan? Jesustapas kay pachapi kaptinmi runakuna llumpayta ñakarichirqaku, payqa entiendenmi imayna sientekusqanchikmanta. Huchallikuq kasqanchikraykum necesitanchik Dios kuyapayaykuwananchikta. Dios pampachaykuwananchikpaq Jesuspa sutinpi mañakuptinchikqa rantinchikpi ‘rimarinanpaqmi kapuwachkanchik abogadonchik’, payqa kuyapayakuq Jesucristom (1 Juan 2:1, 2; Rom. 8:34). Huchanchikrayku Jesuspa wañusqanwanmi hinaspa sacerdotekunapa jefen hina kasqanwanmi Jehova Diosman ‘asuykunchik necesitasqanchik tiempokunapi’ yanapaykuwananchikpaq (Heb. 4:15, 16). Pantaq runakuna kaspapas Jesucristopa yanapayninwanmi chuya sonqonchikwan Dios serviyta atinchik (Heb. 9:13, 14).

Jehova Diosmi Jesucristoman atiyta qoykun iñiqkunamanta otaq Diosta serviqkunamanta nanachikunanpaq (Mat. 28:18; Efes. 1:22, 23). Cristoqa chay atiyninwanmi Diospa munayninman hina iñiqkunata dirigen. Pimanpas yachachispaqa allinta entiendechiy iñiqkunapa umanqa otaq kamachiqninqa Jesucristo kasqanmanta (Mat. 23:10). Diosmanta yachay munaqkunataqa qallariymantapacha huñunakuyninchikkunaman rinanpaq kallpanchay, chaypim Bibliata estudianchik ‘allin yuyayniyoq confianza sirvientepa’ horqomusqan qellqakunawan yanapachikuspa. Allinta entiendechiy pitaq chay “sirviente” kasqanmanta chaynataq pim kamachiqnin kasqanmantapas, chaynata yachachiptikiqa entiendenqam kamachiqninqa Cristo kasqanmanta (Mat. 24:45-47). Pikunam ancianokuna kasqanta reqsichiy hinaspa allinta entiendechiy anciano kanankupaq Bibliapi kamachikuykunaman hina imayna kawsanankumanta (1 Tim. 3:1-7; Tito 1:5-9). Entiendechiy iñiqkunapa umanqa otaq kamachiqninqa Jesucristo kasqanta, ancianokunaqa Jesusta qatipakunapaq yanapawaqninchiklla kasqankuta (Hech. 20:28; Efes. 4:16; 1 Ped. 5:2, 3). Entiendechiytaq Allpantinpi iñiqmasinchikkuna Cristopa dirigisqan huk sonqolla kasqanchikmantapas.

Bibliam willawanchik manaraq wañuchichkaptinku Jerusalenman Jesus yaykuptin qatiqninkuna kayna nisqanmanta: ‘¡Alabasqayá kachun Diospa sutinpi hamuq Reyqa!’, nispa (Luc. 19:38). Estudiantekuna Bibliapa yachachisqanta astawan entiendespankuqa Jesucristo lliw nacionkunapi runakunata kamachinanpaq atiy chaskisqanmantam yachanqaku (Dan. 7:13, 14). Iñiqmasikikunaman yachachispapas otaq piman estudiachispapas allinta entiendechiy Jesuspa kamachiwasqanchikta chaninchanankupaq.

Chaypaqqa sutillatam qawachina imayna kawsasqanchikwan Jesucristopi iñispa kasukusqanchikta. Allinta entiendechiy rey kananpaq Dios nombraruptin qatiqninkunaman Jesus ima ruranankupaq kamachisqanta (Mat. 24:14; 28:18-20). Qawachiy vidanchikpi ima rurayta puntapi churanapaq Jesus yachachisqanmanta (Is. 9:6, 7; Mat. 6:19-34). Qawachiytaq Hawkayay Qokuq Jesuspa qatiqninkuna imayna kawsasqankutapas (Mat. 20:25-27; Juan 13:35). Uyarisuqnikikunata sumaqllata kallpanchay imayna kawsasqankuwan Cristota kasukusqankuta otaq mana kasukusqankuta reparanankupaq. Yachachisqaykiman hina imayna kawsasqaykipi kikikipas reparay.

Cristota qatikunankupaq yachachiy. Bibliam tupachin estudiantekunata wasi ruraywan Jesucristotañataq wasipa cimientonwan (1 Cor. 3:10-15). Chaymi estudiantekunamanqa Cristomanta yachachinanchik Bibliapa yachachisqanman hina. Jesucristota qatikunankupaq yachachiy ama qamta qatikusunaykipaqchu (1 Cor. 3:4-7).

Chaynata yachachiptikiqa entiendenqakum Cristopa ‘ejemplonta qatikunankupaq’ (1 Ped. 2:21). Cristota hinalla qatikunankupaq kallpanchay, paypa vidanmanta willakuykunata leespa kaykunapi reparanankupaq: imayna piensasqanpi, imayna kasqanpi, sasachakuykunata hinaspa tentacionkunata imayna atipasqanpi, Taytanta kuyasqanrayku kasukusqanpi chaynataq runakunata imayna yanapasqanpipas. Qawachiytaq taytanta tukuy sonqonwan servisqantapas. Chaynata yachachiptikiqa imayna tanteakunankupaqpas otaq ima sasachakuypi kaspankupas tapukunqakum: “¿Imatataq Jesusqa ruranman karqa kaynapi tarikuspanqa? ¿Ñoqarayku wañusqanmanta agradecekusqaytachu qawachini?”, nispa.

Iñiqmasikikuna Cristopi iñiptinkupas hinalla kallpanchakuy paymanta astawan yachachinaykipaq. Imayna rimasqaykiwan iñiyninkupi kallpanchay. Huñunakuykunamanta rimaspaqa qawachiy Jesucristo iñiqkunapa kamachiqninchik kasqanta. Predicananchikmanta rimaspaqa Jesucristo imayna predicasqanmanta qawachiy chaynataq runakunata librananpaq kay tiempopi imakuna rurasqanmantapas.

Cheqap cristiano kanapaqqa Jesucristomantam sumaqta yachana, paypim iñina hinaspam tukuy sonqowan kuyana. Kuyasqanchiktam qawachisun kamachisqankunata tukuy sonqowan kasukuspaqa (Juan 14:15, 21). Kuyakuyqa kallpanchawanchiktaqmi sasachakuykuna kaptinpas iñiyninchikpi allinta takyanapaq, Jesucristota qatipakunapaq hinaspa Dios serviyninchikpi ‘allin sapichasqa hinaspa ukuneqpi cimientasqa hina takyananchikpaq’ (Efes. 3:17). Chayna kawsayqa Jesucristopa Taytan Jehova Diostam hatunchan.

DIOSPA GOBIERNONMANTA ‘ALLIN NOTICIA’

ÑOQANCHIKWANÑA Jesucristo kananmanta chaynataq kay pachapi kaqkuna puchukananmanta willakuspanqa nirqataqmi: “Diospa munaychakusqanmanta kay allin noticiam willakusqa kanqa enterollan kay pachapi chaynapi llapallan nacionpi runakuna yachananpaq, chayñam kay tiempoqa tukunqa”, nispa (Mat. 24:14).

¿Imamantataq enteron Pachapi willakunanchik karqa? Diospa ‘Munaychakuyninmantam’ otaq gobiernonmantam (Mat. 6:10). Chay Gobiernomantam Biblia nin: ‘Jehova Diospa chaynataq Jesucristopa’ kasqanmanta, Diosmi Jesucristoman gobiernananpaq atiyta qorqa (Apoc. 11:15, NM). Jesuspa nisqanman hinam apostolkunapa tiempopi cristianokunamantaqa astawanraq willakuchkanchik, paykunam willakurqaku ‘Diospa Munaychakusqanqa hichpallaykichikpiñam kachkan’, nispa (Luc. 10:9). Chay tiempopiqa Jesusmi paykunawan karqa, payqa akllasqañam karqa Kamachiq kananpaq. Ichaqa Mateo 24:14 nisqanman hinam Diospa Gobiernonmantaqa enteron Pachapi uyarinanku karqa.

Chay nisqan imayna cumplikunanmantam profeta Daniel revelacionninpi qawarqa: churin Jesucristoman kamachiq kananpaq Jehova Dios atiy qosqanta, chaytam chaskirqa ‘Llapallan runakuna, nacionkuna. Huk rikchaq rimayniyoqkunapas payta servinankupaq’ (Dan. 7:13, 14). Chay atiytam Jesucristo hanaq pachapi chaskirqa 1914 kaq watapi hinaspam Diablotawan demoniokunata kay Pachaman wischumurqa (Apoc. 12:7-10). Chay watamantapacham kay pachapi kaqkuna tukupay tiempopiña kachkan. Ichaqa manaraq chinkachisqa kachkaptinmi Jehova Diospa Gobiernonmanta Allpantinpi lliw runakunaman willakuchkanchik. Chay willasqanchikta imayna chaskisqankuwanmi qawachinku ‘Alto-aItopi Diosqa llapallan runakunapa gobiernonpi munaychakusqanmanta’ reqsikusqankuta otaq mana reqsikusqankutapas (Dan. 4:32).

Imakunaraq cumplikunan kaptinpas, hinallam ruegakuchkanchik Diospa Gobiernon chayamunanpaq ichaqa manam hamuq tiempopiraq cumplikunanta piensaspachu aswanqa Daniel 2:44 chaynataq Apocalipsis 21:2-4 nisqankuna chaylla cumplikunanta munaspam. Diosta hinaspa runamasinkuta kuyaqkuna chaypi kawsanankupaqmi Allpa pachata tikrachinqa suma-sumaq huertaman. Chaykunamantam willakunchik ‘allin noticiakunamanta willakuspa’ hinaspapas convencesqam willakunchik Jehova Diosqa Churinman atiy qosqanmanta. ¿Chaynatachu willakuchkanki Diospa Gobiernonmanta?

Diospa Gobiernonmanta explicay. ¿Imaynatam willakuwaq Diospa Gobiernonmanta? Huk willakuykunamanta rimaspapas kallpanchakunaykim Diospa gobiernonmanta willakunaykipaq.

Chaypaqqa leewaqmi otaq willawaqmi chay Gobiernomanta willakuq textokunata. Chaynata ruraspaqa reparanaykitaqmi imamanta yachachisqaykita uyarisuqnikikuna entiendesqanta. Diospa Gobiernomanta willaspaqa astawanpaschá explicanayki kanqa, wakinqa manam creenkuchu mana rikusqanku gobiernopiqa. Willasqaykita entiendenanpaqmi ejemplokunawan piensarichinayki. Chaypaqmi willawaq wayraqa mana rikuy atina kasqanmanta ichaqa chayna kaptinpas sientesqanchikmanta. Wayra Unanchaqtaqa manam rikunchikchu, ichaqa yachanchikmi tukuy atiyniyoq kasqanta. Bibliam sutichan: ‘Wiña-wiñaypaq munaychakuq’, nispa (1 Tim. 1:17). Wakin nacionkunapiqa manam lliw runakunachu reqsinku nacionninku kamachiq presidenteta. Ichapas paymanta yachanku televisionpi qawasqankuwan otaq radiopi uyarisqankuwan. Bibliam tikrasqa kachkan 2.200 masnin rimaykunapi, chaypim willawanchik Diospa Gobiernonmanta, pi kamachinanpaq akllasqa kasqanmanta chaynataq kay tiempopi ima rurasqanmantapas. Ima qellqamantapas Willakuq revistam tukuy rikchaq rimaykunapi tikrasqa kachkan, chayqa sapa kutim lloqsimun. Imapaq rurasqa kasqantam qaranpi qawachin, chaypim nin: “Jehova Diospa Gobiernomanta Willakuq”, nispa.

Diospa Gobiernonmantaqa entiendechiwaqtaqmi imakuna kananta munasqankuwan piensarichispapas, runakunaqa munankum: qollqe kananta, hawkayayta, llapallankupaq allin doctorkunata chaynataq allin profesorkunata, chaynallataq tukuy mana allinkuna otaq wañuchinakuy chinkanantapas, chaykunatam gobiernaqkunamanta mañakunku. Runata sasachaq tukuy mana allinkunata Jehova Diospa Gobiernon allichananpaq kasqanmanta allinta entiendechiy (Sal. 145:16).

Jesucristopa Kamachisqan ukupi kawsakunankupaq kallpanchay. Payqa milagrokunatam rurarqa, chaywanmi qawachirqa hanaq pachamanta gobiernamuspan imakuna rurananpaq kasqanta. Qawachiy sumaq sonqoyoq kasqanmantapas (Mat. 8:2, 3; 11:28-30). Jesucristoqa huchanchikrayku wañusqanmanta chaynataq wiñay kawsaypaq Dios kawsarirachiptin hanaq pachapi kasqanmantapas allinta entiendechiy (Hech. 2:29-35).

Allinta entiendechiy Diospa Gobiernonqa hanaq pachamanta kamachimusqantaña. Ichaqa yaqa lliw runakunam chayna kasqanmantaqa mana cuentata qokunkuchu. Chaypaqmi niwaq: “¿Yachankichu Jesucristopa imakuna nisqanmanta?”, nispa. Chayman hina qawachiy imakuna pasananmanta Mateo 24, Marcos 13 hinaspa Lucas 21 nisqan capitulokunapi. Hinaspa tapuy Jesucristo kamachiq kananpaq nombrasqa karuptin imanasqa sasachakuykuna qallarisqanmanta hinaspa qawachiy Apocalipsis 12:7-10, 12 nisqankunata.

Diosqa Gobiernasqantaña qawachiy Mateo 24:14 nisqanta leespa chaynataq Bibliamanta tukuy nacionkunapi yachachisqanchikta qawachispapas (Is. 54:13). Jehova Diospa testigonkunata ima escuelakuna yanapasqanmanta willay, willaytaq chay escuelakunapi yachasqankuqa Bibliapa yachachisqanman hina kasqanta chaynataq mana qollqellapaq kasqantapas. Qawachiytaq wasi-wasin predicaspapas 230 masnin nacionkunapi sapakamaman otaq familiakunaman Diosmanta mana qollqellapaq yachachisqanchikmantapas. ¿Mayqen gobiernopas atinmanchu runankunaman chaynataq Allpantinpi runakunaman yachachiyta? Uyarisuqnikikunata kallpanchay Huñunakunanchik Salonman, otaq asambleanchikkunaman rispanku Diosmanta imayna yachasqanchikta qawanankupaq (Is. 2:2-4; 32:1, 17; Juan 13:35).

¿Musyanqachu uyarisuqnikiqa Diospa Gobiernon imayna yanapasqanta? Watukuspaykiqa sumaqllata kallpanchay Diospa Gobiernonta akllakunankupaq. ¿Imaynatam akllakunmanku? Jehova Diospa yachachisqankunata kay tiempopi kasukuspankum (Deut. 30:19, 20; Apoc. 22:17).

Diospa Gobiernonta puntata maskanankupaq yanapay. Diospa Gobiernonta akllaruspapas, ¿imaynatam chay akllakusqanchikta vidanchikpi qawachichwan? Jesusmi qatiqninkunata kallpancharqa ‘puntataqa maskaychik Diospa munaychakuynintayá’, nispa (Mat. 6:33). ¿Imaynatam iñiqmasikikunata kallpanchawaq chay nisqanta kasukunankupaq? Ejemploykiwan hinaspa Diospa Gobiernonmanta astawan willakunankupaq kallpanchaspam. Imakuna ruray munasqankumanta tapuy hinaspa wakin iñiqmasinchikkuna imakuna rurasqankumantapas willay. Bibliapi willakuykunawan kallpanchay Jehova Diosta astawan kuyanankupaq. Qawachiytaq Diospa Gobiernonqa cheqap kasqanmanta hinaspa chaymanta willakuyqa ancha allin kasqantapas. Diosta astawan servinankupaqqa manam rimayllachu-rimanayki, ejemploykiwanmi yachachinayki.

Allin noticiakunamanta willakuspaqa Jehova Diosmanta, Jesucristomanta hinaspa Gobiernonmantam willakunchik. Chay yachachikuykunamanta entiendesqanchiktam qawachina predicaspapas, iñiqmasinchikkunaman yachachispapas chaynataq imayna kawsasqanchikwanpas. Chaynata ruraspam qawachisun Diosmanta Yachachinapaq Escuelawan allinta yanapachikusqanchikta.