Leeqkunapa tapukuyninkuna

¿Pikunataq Diospa wasinta waqaychaqku hinaspa imakunatam ruwaqku?

Leviypa mirayninkunaqa wakinmi animalkunata nakaspa Diospaq kañapuqku, chaypi mana yanapakuqkunañataqmi Diospa wasinta waqaychaqku. Paykunataqa, paykunamanta uma kaqmi niq maypi kanankupaq. Chaymanta sumaqta yachaq Filonmi nirqa: “Paykunamanta wakinqa Diospa wasinpa punkunpim sayaqku, wakinñataqmi Diospa wasin ukupi, chaynapi wakin runakuna chuya lawman mana yaykunankupaq. Wakinñataqmi tuta-punchaw Diospa wasin ukupi muyuqku, chaytaqa ruwaqku sapakamata tupasqanman hinam”, nispa.

Diospa wasinta waqaychaqkunaqa autoridadkunapa makinpim karqa. Roma nacionta kamachiqpas paykunallatam saqirqa espadayuq kanankupaqqa.

Chaymanta allinta yachaq Joachim Jeremiasmi nin: “‘Sapa punchawmi Diospa wasinpi yachachirqani ichaqa manam kaynachu hapiwarqankichik’ nispanqa Jesusqa nichkarqa Diospa wasinta waqaychaqkunatam”, nispa (Mat. 26:55). Joachimqa nintaqmi chaymanta puntatapas hina chay runakuna Jesusta hapiruy munasqankumanta (Juan 7:32, 45, 46). Chaymanta qipatapas hina chay runakunam umalliqninkupiwan kuska Jesuspa qatiqninkunata hapiruspa autoridadkunaman pusarqaku. Hina chay runakunachusmi apostol Pablotapas Diospa wasin ukumanta pampanta aysarurqaku (Hech. 4:1-3; 5:17-27; 21:27-30).