Hatun sasachakuypi tarikuqkunata yanapasqanchikmanta

1, 2. (1) ¿Ima sasachakuypim Judea lawpi iñiqkuna tarikurqaku? (2) ¿Imaynatam iñiqmasinkunaqa kuyasqankuta qawachirqaku?

JESUCRISTOPA wañukusqan pasaytam 46 kaq watapi Judea lawpi hatun muchuy karuptin yarqaymanta runakunaqa ñakarirqaku. Kawsaykuna llumpayta precioyarusqanraykum Jesucristopa qatiqninkunapas mana imatapas rantiyta atispanku yarqaypi tarikurqaku. Ichaqa mana haykapipas qawasqankuman hinam Jehova Diosqa chaynaña sasachakuypi tarikuptinkupas yanaparqa. ¿Imaynatam yanaparqa?

² Chayna tarikusqankumanta yacharuspankum Antioquia lawpi iñiqkuna rimanakurqaku Judea lawpi hinaspa Jerusalen lawpi iñiqmasinkuta imaynata yanapanankupaq, hinaspam Bernabeytawan Saulota kacharqaku huñusqanku yanapakuykunata Jerusalen llaqtaman apanankupaq (leey Hechos 11:27-30 y 12:25). ¡Maynatachá Judea lawpi iñiqkunaqa kusikurqaku Antioquia lawpi iñiqmasinkunapa yanapakuyninta chaskisqankuwanqa!

3. (1) ¿Imaynatam Antioquiapi iñiqkunata qatipakunchik? Pasasusqaykimanta utaq uyarisqaykimanta rimariy (qawaytaq 239 paginapi “Sasachakuypi tarikuqkunata imayna yanapasqanchikmanta”, niq yachachikuytapas). (2) ¿Imakunamantam yachasunchik?

³ Chay tiempopi Jesucristopa qatiqninkunaqa huk law nacionpi iñiqmasinku yanapasqankutam qawachirqaku. Kunan punchawpas Antioquia lawpi iñiqkuna hinam enteron pachapi iñiqmasinchikkunata chaylla yanapanchik hatun sasachakuypi tarikusqankuta yacharuspaqa.a Chayna sasachakuypi tarikuqkunata yanapasqanchikkuna Dios serviyninchikpi wakin ruwayninchikkunawan imapi tupasqanmanta yachanapaqyá kay kimsa tapukuykunamanta yachasun: ¿Imaynatam hatun sasachakuypi tarikuq iñiqmasinchikkunata yanapaspaqa Diosta yupaychachkanchik? ¿Imanasqam ancha allin chay ruwayqa? ¿Imapim chay ruwayqa yanapawanchik?

Hatun sasachakuypi tarikuqkunata yanapaspaqa Diostam yupaychanchik

4. ¿Ima iskay ruwaykunamantam Pabloqa yachachirqa?

⁴ Corinto llaqtapi iñiqmasinkunaman cartaspanmi apostol Pabloqa Dios serviyninkumanta yachachichkarqa, chay yachachisqanqa kay pachapaq suyakuyniyuqkunatapas llapanchiktam yanapawanchik (Juan 10:16). Pablopa nisqanman hinaqa llapanchikpam kachkan iskay ruwayninchikkuna. Hukninmi, ‘Dioswan allinyanakunankupaq’ runakunata ‘yanapayninchik’, chaytaqa ruwanchik Diosmanta willakuspa hinaspa yachachispanchikmi (2 Cor. 5:18-20; 1 Tim. 2:3-6). Hukninñataqmi, ‘iñiqmasinchikkunata yanapayninchik’, kaytañataqmi ruwanchik hatun sasachakuypi tarikuptinku yanapaspa (2 Cor. 8:4). Pabloqa griego rimaypi huk rimayllatam servichikurqa chay iskay ruwayninchikkunamanta rimaspanqa. ¿Imanasqataq chaymanta yachayninchikqa ancha allin?

5. ¿Imawanmi Pabloqa sasachakuypi tarikuqkuna yanapayta tupachirqa?

⁵ Diosta servinapaq tukuy ima ruwasqanchikkunamanta rimaspanqa sasachakuypi tarikuqkunata yanapaymantawanmi Pabloqa rimarqa. Punta kaq cartanpiraqmi qawachirqa Dios serviyninchikpi achka ruwaykuna kasqanmanta, hinaspa chaykuna ruwanapaq Jehova Dios chuya espiritunwan yanapawasqanchikmanta (1 Cor. 12:4-6, 11). Pabloqa chay ruwayninchikkunatam ‘Dios yupaychayninchikwan’ tupachirqa (Rom. 12:1, 6-8). Chaychá payqa ‘iñiqmasinkunata yanapaypi’ kallpanchakurqa (Rom. 15:25, 26).

6. (1) ¿Imanasqataq llakipi tarikuq iñiqmasinchikkunata yanapaspaqa Diosta yupaychanchik? (2) Hatun sasachakuypi tarikuptinku enteron pachapi iñiqmasinchikkunata imayna yanapasqanchikmanta rimariy (qaway 242 paginapi “Hatun sasachakuy pasaptin” niq yachachikuyta).

⁶ Pablopa nisqanman hinaqa ‘Jesucristota kasukusqanchikraykum’ hinaspa yachachisqanman hina kawsakuy munasqanchikraykum iñiqmasinkunata yanapanchik. Chaymi hatun sasachakuypi tarikuq iñiqmasinchikkunata yanapaspaqa Diosta yupaychanchik (2 Cor. 9:13). Chaymantapas, iñiqmasinchikkunata yanapaspam qawachinchik paykunata Dios kuyapayasqanta hinaspa favorecesqantapas (2 Cor. 9:14; 1 Ped. 4:10). Chayna llakipi tarikuq iñiqmasinchikkunata yanapaymanta yachachispanmi 1976 watapa 1 Junio killapi Willakuq qillqa nirqa: “Jehova Dioswan churin Jesucristoqa allinpaqmi qawanku chayna yanapasqanchiktaqa, chayna kasqanmantaqa manam haykapipas iskayrayananchikchu”, nispa. Chaymi ninchik, hatun sasachakuypi tarikuq iñiqmasinchikkunata yanapaspaqa Diostam yupaychachkanchik nispa (Rom. 12:1, 7; 2 Cor. 8:7; Heb. 13:16).

¿Ima kimsa ruwaykunatam haypanchik hatun llakipi tarikuqkunata yanapaspaqa?

7, 8. ¿Imanasqam hatun sasachakuypi tarikuq iñiqmasinchikkunata yanapayqa ancha allin?

⁷ ¿Imanasqam hatun sasachakuypi tarikuq iñiqmasinchikkunata yanapayqa ancha allin? Pablom Corinto llaqtapi kaq iñiqmasinkunaman cartaspan chaymanta rimarqa (leey 2 Corintios 9:11-15). Qatiqninpiyá chaykunamanta yachasun.

⁸ Punta kaq: Jehova Diostam hatunchan. Corinto llaqtapi kaqkunaman cartaspanmi apostol Pabloqa rimarqa, ñakariypi tarikuqkunata yanapasqankuqa Diosta hatunchanankupaq iñiqmasinkuta kallpanchasqanmanta chaynataq kuyakuq kasqanmanta agradecekunankupaq kallpanchasqanmantapas. Chaymanta rimaspanmi iñiqmasinkunata kallpancharqa Diosman graciasta qunankupaq, chaymi kikinpas nirqa: “Diosmanyá gracias kachun”, nispa (2 Corintios 9:11-15; 1 Ped. 4:11).

9. ¿Imaynatam sasachakuypi tarikuq iñiqmasinchikkunata yanapayqa Jehova Diosta hatunchan? Huk warmiwan ima pasasqanmanta rimariy.

⁹ Kay tiempopipas Dios yupaychaqkunaqa Pablo hinam ñakariypi tarikuq iñiqmasinchikkuna yanapayta munanchik, chayta ruwaspam Jehova Diosta hatunchanchik. Chayna ruwasqanchikta qawaspankutaqmi Jehova Diosmantawan testigonkunamanta mana allin rimaqkunapas allinpaqña qawawanchik (1 Cor. 10:31; Tito 2:10). Huk warmim punkunpi laqarurqa “ama punkuyta takamuychikchu Jehova Diospa testigonkuna” niq letrerota. Ichaqa chay lawpi llumpay wayra-para pasarusqan qipallatam wasinpa chimpanpi achka runakuna llamkachkarqaku huk wasi allichaypi, achka punchawkuna qawasqanmantam huk punchaw paykunaman asuykuspa pikuna kasqankumanta tapurqa. Jehova Diospa testigonkuna kasqankuta yacharuspanmi chay warmiqa mana ima niytapas atirqachu, hinaspam nirqa: “Mana allinta yachaspam qamkunamanta mana allinkunata piensarqani”, nispa. Chaynapim punkunpi laqasqan letrerotapas hurqururqa.

10, 11. (1) ¿Imakunam qawachin hatun llakipi tarikuq iñiqmasinchikkunata necesitasqankupi yanapasqanchikta? (2) ¿Ima qillqanchikmi kachkan sasachakuypi yanapaqkunamanta cuentallikuqkunapaq? (Qaway 243 paginapi “Autoridadkunawan rimanapaq qillqa”, niq yachachikuyta).

¹⁰ Iskay kaq: Iñiqmasinchikkunatam necesitasqankupi yanapanchik (2 Cor. 9:12​a). Llakipi tarikuq iñiqmasinchikkunata kuyapayaspam imapas necesitasqankupi yanapayta munanchik. Kaytaqa ruwanchiktaqmi iñiqmasintinpura huk cuerpo hinalla sientenakusqanchikrayku, chaymi huk kaqnin iñiqmasinchik ñakariptinqa wakiqninchikpas llakisqa tarikunchik (1 Cor. 12:20, 26). Chaymi iñiqmasinchikkunata llakipayasqankurayku wakiqninkuqa ima ruwayninkutapas chaylla saqispa hatun llakipi tarikuq iñiqmasinchikkunata yanapaq rinku (Sant. 2:15, 16). 2011 watapim Japón nacionpi terremoto karuptin lamar quchamanta yaku lluqsirurqa, chaymi sasachakuypi tarikurqaku. Hinaptinmi Estados Unidospi betel wasimanta cartaspanku huñunakunanchik wasikuna ruwaypi cuentallikuqkunata tapurqaku, haykam wasi ruway yachaqkunamanta pikuna Japón nacionman riy munasqankumanta, chaypi huñunakunanchik wasikunata kaqmanta ruwaypi yanapakunankupaq. ¿Haykam rirqaku? Yaqa suqta pachak iñiqmasinchikkunam mana imallapaq yanapaq riyta munarqaku, pasajenkutapas avionpi rinankupaq kikinku pagaspanku. Chayna riq iñiqmasinchiktam Japón nacionpi kaq huk iñiqmasinchik tapurqa imanasqa yanapakuq risqanmanta, hinaptinmi nirqa: “Japonpi iñiqmasiykunaqa tayta-mamaymanta wawqi-paniykuna hinam, chaymi sasachakuypi tarikusqankuqa llakichiwan”, nispa. Chayna kuyakuyniyuq kaspankum wakinpiqa iñiqmasinkuta yanapasqankupi wañuy patanpipas tarikurqaku (1 Juan 3:16).b

¹¹ Jehova Diosta mana yupaychaqkunapas allinpaqmi qawanku sasachakuypi tarikuq iñiqmasinchikkuna yanapasqanchiktaqa. 2013 watapim Arkansas llaqtapi (Estados Unidos) hatun sasachakuy pasarurqa, hinaptinmi wakin iñiqmasinchikkuna chaylla pasarqaku sasachakuypi tarikuq iñiqmasinchikkunata yanapanankupaq, chaymanta rimaspanmi huk periodico nirqa: “Hatun sasachakuy pasaptin Jehova Diospa testigonkuna huk sunqulla sumaq yanapakusqankuqa admirakuypaqmi”, nispa. Pablopa nisqanman hinam llakipa qatisqan iñiqmasinchikkunataqa imam necesitasqankupi yanapanchik.

12-14. (1) ¿Imapaqmi chaylla yanapan sasachakuypi tarikuq iñiqmasinchikkunata yanapasqanchikqa? (2) ¿Ima ninkutaq wakin iñiqmasinchikkuna Diosmanta willakusqanku hinaspa huñunakusqanku imayna yanapasqanmanta?

¹² Kimsa kaq: Jehova Dios serviyninkuta mana saqinankupaqmi yanapan. ¿Imanasqam chayqa ancha allin? Pablopa nisqanman hinam iñiqmasinchikkunaqa yanapakuyta chaskispanku kallpanchasqa tarikunku tukuy sunqunkumanta Diosta agradecekunankupaq (2 Cor. 9:12b). Chaytaqa qawachinku Dios serviyninkupi tukuy ima ruwayninkuta hinalla ruwaspankum (Filip. 1:10). 1946 watapi Willakuq qillqapa nisqanman hinam Apostol Pabloqa sasachakuypi tarikuq iñiqmasinkuna yanapayta allinpaq qawarqa, chaynapi imankupas mana faltaptin Diosmanta hinalla willakunankupaq. Kay tiempopipas sasachakuypi tarikuq iñiqmasinchikkunata yanapaptinchikmi paykunaqa Diosmanta hinalla willakuspa runamasinkuta consuelanku, chaynata ruwasqankuwanmi kikinkupas iñiyninkupi kallpanchasqa tarikunku (leey 2 Corintios 1:3, 4).

¹³ Achka iñiqmasinchikkunam chayna yanapakuyta chaskisqankuwan Diosmanta hinalla willakunankupaq kallpanchasqa tarikurqaku, huknin iñiqmasinchikmi willakurqa: “Warmichaywan hinaspa churiykunawan Diosmanta willakuq lluqsisqaykum anchata kallpanchawarqaku, sasachakuypi tarikuspaykupas runamasiykuta kallpanchasqaykum kikiykuta kallpanchawarqaku”, nispa. Hukpas nirqam: “Diosmanta willakuq lluqsispaymi llaki qatiwasqantapas qunqarirqani, chaymi hawkayachiwarqa”, nispa. Hukñataqmi nin: “Llumpay sasachakuypim tarikurqaniku, ichaqa wasiykupi kaqkunapiwan Diosmanta willakuq lluqsisqaykum yanapawarqaku Dios yupaychayniykupi kallpanchakunaykupaq. Diospa prometesqanmanta runamasiykuman willakusqaykum allinta yanapawarqaku paypa prometesqankuna cumplikunanmanta mana iskayrayanaykupaq”, nispa.

¹⁴ Yanapakuy chaskisqankuqa kallpanchantaqmi kaqmanta chaylla huñunakunankupaqpas. Yaqa 60 watanpi kaq Kiyoko sutiyuq hermanam lamar quchamanta yaku lluqsiruspa tukuy imanta aparuptin hawanpi pachayuqlla qiparurqa. Muspayninpi hina kachkaptinmi huk iñiqmasinchik nirqa carron ukupi huñunakuy kananmanta. Chayta yuyarispanmi Kiyoko nirqa: “Tawa runakunallam carropi huñunakurqaniku, yachachikuykuna pisillapi kaptinpas sasachakuypi tarikusqaytam qunqaykurqani. Chaywanmi cuentata qukurqani huñunakuyninchikkunaqa ancha allin kasqanmanta”, nispa. Huk iñiqmasinchikpas nirqam: “Huñunakuykunaqa mana hukmanyanaypaqmi allinta yanapawarqa”, nispa (Rom. 1:11, 12; 12:12).

Hatun sasachakuypi tarikuqkunata yanapasqanchikqa allinpim tukun

15, 16. (1) ¿Imapim yanaparqa Corinto llaqtapi hinaspa huk law llaqtapi kaq iñiqkunatapas sasachakuypi tarikuqkunata yanapasqankuqa? (2) ¿Imapim ñuqanchiktapas yanapawanchik?

¹⁵ Corinto llaqtapi iñiqmasinkunaman yachachispanmi apostol Pabloqa willarqa Jerusalenpi iñiqmasinkunata yanapasqankuqa kikinkutapas hinaspa iñiqmasinkutapas yanapasqanmanta, chaymi nirqa: ‘Paykunaqa tukuy kuyakuywanmi qamkunapaq Diosta mañakunqaku, hatun kuyakuyninta qamkunaman qawachisusqaykichikmanta’, nispa (2 Cor. 9:14, CQ12). Corinto llaqtamanta iñiqmasinkupa apachisqankuta chaskispankum Jerusalenpi kaqkunaqa paykunapaq Diosta mañapurqaku, chaymi astawan kuyanachirqa.

¹⁶ Kay tiempopipas iñiqmasinchikkunata yanapay imanasqa ancha allin kasqanmanta yachachispanmi 1946 watapa 15 abril killapi Willakuq qillqa qawachirqa, sasachakuypi tarikuq iñiqmasinchikkunata yanapaspa llapallanchik kusisqa tarikusqanchikmanta. Chayna kasqanmantam sasachakuypi tarikuqkunata yanapaqkuna willakunku, huk kaqninmi nirqa: “Yanapasqaywanmi astawan paykunata riqsirqani”, nispa. Yanapakuy chaskiq huk hermanapas nirqam: “Iñiqmasiykunapa yanapawasqankuwanmi musuq pachapipas kachkayman hina tarikurqani”, nispa (leey Proverbios 17:17).

17. (1) ¿Imaynataq Isaias 41:13 cumplikun sasachakuypi tarikuqkunata yanapasqanchikwan? (2) ¿Imaynatam yanapakusqanchikqa iñiqmasinchikkunata kallpanchan Jehova Diosta agradecekunankupaq? (Qawaytaq 246 paginapi “Enteron allpa pachapi iñiqmasinchikkunam yanapakunku”, niq yachachikuytapas).

¹⁷ Yanapakuy chayaptinmi hatun sasachakuypi tarikuq iñiqmasinchikkunaqa Jehova Diospa prometesqan paykunapi imayna cumplikusqanta qawanku, Diosmi nin: ‘Ñuqa Tayta Diosmi alliq makikichikmanta hapiqnikichik kani. ‘Ama manchakuychikchu, ñuqam yanapasqaykichik’ niqnikichikmi kani’, nispa (Is. 41:13). Sasachakuypi tarikuq huk hermanam nirqa: “Mana piniyuq hinam tarikurqani, ichaqa Jehova Diosmi yanapaykuwarqa. Manam imayna agradecekuytapas atinichu iñiqmasiykuna yanapaykuwasqankumanta”, nispa. Iskay ancianokunam iñiqmasinkupa sutinpi yanapakuy chaskisqankumanta nirqaku: “Terremoto pasaruptinmi llumpay llakisqa qiparurqaniku, ichaqa Jehova Diosmi iñiqmasinchikkunata kachamurqa yanapawanankupaq. Qillqanchikkunallapim chayna yanapakuykunamantaqa leerqaniku, kunanmi ichaqa yanapawaptinku chayna kasqanta qawarqaniku”, nispa.

¿Qampas yanapakuwaqchu?

18. ¿Imatam ruwawaq hatun sasachakuypa pasasqan lawpi yanapakuyta munaspaqa? (Qawaytaq 244 paginapi “Diosta astawan servinanpaqmi yanaparqa”, niq yachachikuyta).

¹⁸ ¿Munawaqchu qampas sasachakuypi tarikuq iñiqmasinchikkunata yanapaspa kusisqa tarikuyta? Chayna yanapakuqkunataqa huñunakunanchik wasikunata ruwaypi llamkaqkunamantam akllanku. Chaynaqa huk kaqnin ancianoykimanta mañakuy chaypi llamkay munaqkunapaq papelta. Hatun sasachakuykuna pasasqanpi unay watakunaña yanapakuq huk ancianom nirqa: “Sasachakuypa pasasqan lawmanqa chay sasachakuypi yanapakuqkunamanta cuentallikuqkuna nisuptillaykim riwaq, manam kikillaykimantaqa”, nispa. Chaynapim yanapakuqkunapas mana sasachakuspalla yanapanqaku.

19. ¿Imanasqataq sasachakuypi tarikuqkunata yanapaspaqa Jesucristopa qatiqninkuna kasqanchikta qawachinchik?

¹⁹ Sasachakuypi tarikuqkunata yanapaspaqa Jesucristopa kayna nisqantam kasukuchkanchik, paymi nirqa: ‘Kuyanakuychikyá’, nispa. Chaynata ruwaspam Jesucristopa qatiqninkuna kasqanchikta qawachinchik (Juan 13:34, 35). Achka iñiqmasinchikkunam kamachiwaqninchik Jesucristoman sayapakuqkunata yanapaspanku Jehova Diosta hatunchanku. ¡Mayna sumaqmi iñiqmasinchikkunapa chayna yanapawasqanchikqa!