¡Allintapunim yanapakun tupanachiykunaqa!

Achka runakunam ninku Jesusqa pimantapas aswan allin Yachachiq kasqanmanta. ¿Qampas chaynatachu piensanki? Chayna kaptinqa, yaqapaschá imayna yachachisqanta qatipakurqanki, rikchanachiykunata hinaspa tapukuykunata servichikuspayki. Ichaqa, ¿yacharqankichu tupanachiykunatapas Jesus servichikusqanmanta?

Sapa kutim tupanachiykunata servichikunchik mana musyaylla. Wakinpiqa kaynatam ninchik “Llapan frutakuna poqosqa kasqantam nirqaku, kaykunam ichaqa mana poqosqaraqchu kasqa” otaq “Manchapakuq sipasmi karqa, kunanmi ichaqa librey-libreyña”.

Kaypim qawakun punta kaq rimayta qatiqnin rimaywan tupanachisqanta, chaypaqmi servichikun kayna rimaykunata: ichaqa, sichu hinaspa aswanqa. Wakinpiqa qepa kaq rimaymi punta kaq rimayta astawan yanapan allinta entiendekunanpaq otaq sumaqyachinanpaqpas. Chaynata rimaspam mana sasachakuspalla entiendenchik.

Wakin rimaykunapi hinaspa wakin llaqtakunapiqa manam anchatachu servichikunku tupanachiykunataqa, ichaqa allinmi kanman chaymanta yachayninchikqa, Bibliapiqa achka kutitam rikurin. Jesusqa sapa kutim servichikuq, qaway kaykunata: “Mecherotaqa ratachina manam cajonpa ukunman churarunapaqchu, aswanqa altomanmi”, “Manam ñoqaqa hamurqani [. . .] Iey chinkachinaypaqchu [. . .] aswanqa cumplinaypaqmi”, “Uyarirqankichikmi ‘Amam hukwanqa pierdekunkichu’ niyta. Ñoqam ichaqa nikichik: Pipas warmita munapayaspan qawaqqa sonqonpim hukwan pierdekuy huchata rurarunña” hinaspa “Uyarirqankichiktaqmi: ‘Runaqa pagachun ñawinwanyá hukninpa ñawinmanta, kirunwan hukninpa kirunmanta’. Ñoqam ichaqa nikichik: Amayá harkakuychikchu mana allin runataqa, sichu pipas huknin uyaykipi laqyarusuptikiqa qawachiytaqyá huklawnin uyaykitapas” (Mat. 5:15, 17, 27, 28, 38, 39).

Bibliapa wakin libronkunapipas tarikunmi tupanachiykunaqa. Kayqa yanapawanchikmanmi imatapas aswan allinta entiendenapaq otaq ruwanapaqpas. Tayta kaspaykiqa kaypi piensay: “Tayta-mamakuna, qamkunapas wawa-churikichiktaqa amayá piñachiychikchu, aswanqa kasukuqtayá uywaychik Señorninchikpa yachachikuyninman hina” (Efes. 6:4). Jehova Diospa yachachisqanman hina warmankuta uywanankupaq nispallanpas apostol Pabloqa allintam ninman karqa. Ichaqa, ¿imaynatam aswan allinta entiendechirqa? Kaynata tupanachispam: wawa-churikichiktaqa amayá piñachiychikchu, aswanqa kasukuqtayá uywaychik Señorninchikpa yachachikuyninman hina.

Hina chay capitulollapim Pabloqa nirqa: “Manam peleachkankichikqa aychayoq tulluyoq runakunawanchu aswanqa [. . .] mana allin espiritukunapa contranpim”, nispa (Efes. 6:12). Kay tupanachiymi yuyarichiwanchik mana allin espiritukuna contranchikpi kasqanmanta, manam runakunallachu.

¿IMAYNATAM ALLINTA SERVICHIKUCHWAN BIBLIAPI RIKURIQ RIKCHANACHIYKUNATA?

Efeso llaqtapi iñiqmasinkunaman qellqasqan cartapim, Pabloqa achka tupanachiykunata servichikurqa. Chaymanta yachaymi yanapawasun Pablopa ima niy munasqanta allinta entiendenanchikpaq.

Efesios libropa 4 hinaspa 5 capitulonkunapi tupanachiykunata qawayqa allinnikipaqmi kanqa. Leespayki tapukuy: “¿Imaynatam qawani? ¿Imatam ruwani chaynapi tarikuspay? ¿Kay tupanachiypa mayqen partenwantaq reqsiwanku?”, nispa. Kay tupanachiypi imapas yanapasunaykimanta musyakuspaqa, chaylla ruwanaykipaqmi kallpanchakunayki.

Familiawan Diosta yupaychasqaykichikpipas tupanachiykunataqa servichikuwaqmi. Puntatam kuskaykichik leewaqchik enteron listata, hinaspañataqmi huknikichik leenman punta kaq parteta hinaspa wakinnikichikñataq yuyariwaqchik qatiqninta. Chaynata ruwaymi tupanachiykunata imayna kasukunaykichikpaq yanapasunkichikman. Familiapiqa llapaykichikmi mozo-sipasña otaq yuyayniyoqña kaspapas kawsakuynikichikpi allin kayniyoq kayta atiwaqchik.

¿Yuyankichu tupanachiykunapa huknin partenta?

Tupanachiykunata imayna servichikuyta yachayqa yanapasunkim mana sasachakuspalla Bibliapi tarinaykipaq hinaspa allinta predicanaykipaqpas. Ichapas wasinpi kaq runata kaynata niwaq: “Achka runakunam piensanku mana wañuq almayoq kasqanchikta, ichaqa Diospa Palabran ima nisqanta qaway”, nispa. Biblia estudiaqtapas tapuwaqmi: “Achkam ninku Dioswan Jesusqa huklla kasqankuta, ichaqa, ¿imatam Biblia nin? Qamqa ¿ima niwaqtaq?”, nispa.

Arí, Bibliapiqa achka tupanachiykunam kachkan, chaymá yanapawasun Jehova Diosta hinalla servinapaq hinaspa runakunamanpas Bibliamanta yachachinapaq.

Efesios libropa 4 hinaspa 5 capitulonmanta tupanachiykuna

Kayta servichikuy familiawan Diosta yupaychanaykipaq

‘Amayá kasunchu [. . .] wayrawan apachikuchkaq hinaqa runakunapa yachachisqanwanqa.’ (Efes. 4:14.)

“Aswanqa kuyanakuspayá cheqapta rimasun aswan-aswan wiñaspa Cristoman rikchakuq kananchikpaq, payqa llapallan iñiqkunapa umanmi.” (Efes. 4:15, NM.)

‘[Runakunapa] yuyayninku tutayasqa kaptinmi [. . .], sonqonkupas rumiyasqa kachkan.’ (Efes. 4:18, 19.)

“Qamkunam ichaqa mana chaynatachu Cristomanta yacharqankichik sichu paymanta allinta uyarispaqa hinaspa paymanta cheqap yachachikuyman hina yachachisqa kaspaqa.” (Efes. 4:20, 21.)

“Huchaman aysaqnikichikmanta karunchakuspayá amaña ñawpa vidaykichikpi hinañachu puriychik.” (Efes. 4:22.)

“Aswanqa imaynam piensasqaykichiktaqa mosoqyachiychikyá. Hinaspayá mosoqwan pachakuchkaq hina mosoq runaña kaychik.” (Efes. 4:23 [NM], 24.)

“Pipas ñawpaqta suwa kaspaqa amañayá suwakuchunchu.” (Efes. 4:28.)

“Aswanqa imatapas allinta ruraspañayá llamkachun chaynapi imallawanpas muchuqkunata yanapaykunanpaq.” (Efes. 4:28.)

“Rimaspaykichikqa amayá qacha simichu kaychik.” (Efes. 4:29.)

“Aswanqa allin kaqkunallatayá rimaychik.” (Efes. 4:29.)

“Amañayá kaychikchu piñapakuqqa, rabiakuqqa, cheqnikuqqa, qaqchanakuqqa, insultanakuqqa nitaq ima mana allin ruraqpas.” (Efes. 4:31.)

“Aswanqa sumaq sonqo kaspayá kuyapayanakuychik, Diospas Cristoraykum pampachasurqankichik, chaynayá qamkunapas pampachanakuychik.” (Efes. 4:32.)

“Amañayá rimayllapas rimariychikchu huchapakuymantaqa chaynataq manaña rimana huchakunamantapas nitaq qollqella kuyaymantapas.” (Efes. 5:3)

“Aswanqa graciastayá qoychik.” (Efes. 5:4, NM.)

“Ñawpaqtaqa tutayaypi hinam purirqankichik.” (Efes. 5:8.)

“Kunanmi ichaqa Señorwan hukllaña kasqaykichikrayku achkiypiña.” (Efes. 5:8.)

“Tutayaypi hina kawsaqkunapa mana allin rurasqantaqa amataqyá ruraysiychikchu.” (Efes. 5:11.)

“Aswanqa mana allin rurasqankumantayá qaqchapaychik.” (Efes. 5:11.)

“Allintayá qawakuychik imaynam kawsasqaykichikta. Amayá kawsaychikqa mana yachayniyoqkuna hinachu.” (Efes. 5:15.)

“Aswanqa yuyayniyoqkuna hinayá. Tiempoykichiktapas amayá usuchiychikchu.” (Efes. 5:15, 16.)

“Amayá mana yuyayniyoqqa kaychikchu.” (Efes. 5:17.)

“Aswanqa Señorpa munasqantayá entiendeychik.” (Efes. 5:17.)

“Amayá vinowanqa sinkakuychikchu, chayqa viciokunamanmi apakun.” (Efes. 5:18.)

“Aswanqa Chuya Espiritupa huntasqanyá kaychik.” (Efes. 5:18.)

“Manapunim pipas kikinpa cuerpontaqa cheqninmanchu.” (Efes. 5:29.)

“Aswanqa mikuchispanmi allinta uywan, chaynatapunim Cristopas ruran iñiqninkunawan.” (Efes. 5:29.)