Diosman asuykuychik
Diosman “rikchakuqyá kaychik”
KAY tiempopiqa manam lliw runakunachu qokuykuqqa, llakipayakuqqa, pampachaykukuqqa hinaspa kuyakuqqa kanku. Kikinchikpas kallpanchakunchikpaschá sumaq kayniyoqkuna kanapaq wakinpim ichaqa mana atinanchikpaq hina sientikunchik. ¿Imanasqa? Ichapas pantasqanchikkunawan mana valeqpaq hina hapikusqanchikrayku mana atipananchikpaq hina piensanchik ñawpa tiempopi imapas ñakarichiwasqanchikkunata chaynataq vicionchikkunatapas. Bibliam ichaqa niwanchik; Unanchawaqninchikqa yachanmi lliw runakuna sumaq kayniyoqkuna kay atisqanchikta.
Bibliam kaynata kallpanchan cristianokunata: “Diospa kuyasqan churinkunam kankichik, chaynaqa payman rikchakuqyá kaychik”, nispa (Efesios 5:1). Kay nisqanmi qawachiwanchik serviqninkunapi Jehová Dios confiasqanta. ¿Imanasqataq kaynata ninchik? Jehová Diosqa payman rikchakuqtam lliw runakunata unanchawarqanchik (Genesis 1:26, 27). Chaymi pay hina sumaq kayniyoqkuna kanchik.a Diosman ‘rikchakunanchikpaq’ Bibliapa kallpanchawasqanchikqa, kikin Jehová Dios kaynata niwachkanchikmanpas hinam: “Pantaq runa kaspaykipas qatipakuwaytaqa atiwaqmi, munasqayman hina kawsaytaqa atiwaqmi”, nispa.
Hinaptinqa, ¿Diospa ima sumaq kayninkunatam qatipakuchwan? Diosman rikchakunanchikmanta rimaspanmi apostol Pablo kaynata nirqa “chaynaqa” nispa. Kay nisqanmi qepan versiculopi kallpanchasqanwan tupasqanta qawachin chaypim nin sumaq sonqo, kuyapayakuq hinaspa pampachanakuq kananchikpaq (Efesios 4:32; 5:1). Ñawpaqnin versiculopiñataqmi kallpanchawanchik kawsakuyninchikpi mana imatapas suyaspa kuyanakunanchikpaq (Efesios 5:2). Chaynaqa llakipayakuspa, imallanchiktapas qokuykuspa, kuyakuq hinaspa pampachaykukuq kaspaqa, qawachichkanchikmi Jehová Diospa ejemplonta qatikusqanchikta.
¿Imanasqataq Diospa sumaq kayninkunata qatipakunanchik? Pablom nirqa: “Diospa kuyasqan churinkunam kankichik, chaynaqa payman rikchakuqyá kaychik”, nispa. Arí, Jehová Diosqa churinkunata hina qawaspanmi serviqninkunataqa tukuy sonqonwan kuyan. Mayna sumaqmi chayqa, ¿aw? Warmakunaqa tayta-mamankutam qatipakunku, chaynam cheqap cristianokunapas kallpanchakunku hanaq pachapi Taytankuta qatipakunankupaq.
Jehová Diosqa manam payta qatipakunanchikpaqqa obligawanchikchu. Aswanqa kikinchikpuni akllakunanchiktam payqa munan. Chaynaqa sapakamam akllakunanchik Diosman rikchakuyta munaspaqa (Deuteronomio 30:19, 20). Amayá qonqasunchu, llapanchikmi Diospa sumaq kayninkunataqa qatipakuyta atichwan. Ichaqa puntatam reqsinanchikraq payta. Bibliata estudiaspanchikqa astawanmi yachasun suma-sumaq kayninkunamanta, hinaspam kay tiempopi millonnintin serviqninkunawan kuska Diosta qatipakusunchik.
[Willakuy]
a Diosman rikchakuqta unanchawasqanchiktam Colosenses 3:9, 10 tupachin imayna genioyoq runa kasqanchikwan. Jehová Diosta agradanapaqmi chay textopi kaynata niwanchik: ‘Mosoq runa hinañam aswan-aswanraq mosoqyachisqa kachkankichik unanchasuqnikichikman rikchakunaykichikpaq’, nispa.