3 KAQ
Pipas sientirachisuptiki: Wakinpiqa piwanpas sientinarachikuchwanmi
Lindam nin: “Huk iñiqmasinchikmi mana allinta yachaspan qullqinta suwarusqaymanta tumpaykuwarqa. Wakin iñiqmasinchikkuna yacharuspankum payman sayapakurqaku, wakinñataqmi ñuqaman. Punchawkuna risqanman hinam payqa musyakururqa ñuqa mana kasqayta. Pampachaykunaypaq niwaptinpas, sunquypiqa manam pampachayta munarqanichu”, nispa.
¿YAQACHU haykallapipas Linda hina tarikurqanki? Payqa llumpay hukmanyasqam tarikurqa iñiqmasinpa chayna ruwarusqanwan. Wakin iñiqmasinchikkunam pi iñiqmasinwanpas pantanakurusqankurayku Jehova Diosmanta karunchakuyta qallaykurqaku. ¿Chaynachu qampas tarikunki?
¿Pipas rakiruwachwanchu Diospa kuyakuyninmanta?
Pi iñiqmasinchikpas mana allinta ruwawaptinchikqa yaqapaschá sasa kanman pampachaykuyqa, ¿imanasqa? Iñiqmasipura kuyanakunapaq Dios kamachiwasqanchikta paykuna allinta yachasqankurayku (Juan 13:34, 35). Chaymi iñiqmasinchikpuni mana allinta ruwawaptinchikqa astawanraq hukmanyanchik (Salmo 55:12).
Bibliapa nisqanman hinaqa kikinchikpuram imaraykupas piñanarachikuchwan (Colosenses 3:13). Chayta yachaspapas, kikinchik chaynapi tarikuptinchikmi sasaniraq kanman pampachaykuyqa. ¿Imataq yanapawachwan? Bibliapa yachachisqanpi yuyaymanaymi. Kimsamanta qawasun.
Tukuytam Diosninchikqa qawamuchkan. Jehova Diosqa tukuytam qawamuchkan, qawamuchkantaqmi pipas hukmanyachiwaptinchik ñakarisqanchikta (Hebreos 4:13). Manam chayllachu, Diosqa ñakarintaqmi ñakarisqanchikwan (Isaias 63:9). Payqa manam saqinqachu sasachakuykuna, llakikuna utaq imapas ‘paypa kuyawasqanchikmanta’ rakiruwananchiktaqa (Romanos 8:35, 38, 39). Payta qatipakuspanchikmi ñuqanchikpas mana saqikunanchikchu imapas nitaq pipas kuyakuyninmanta karuncharuwananchiktaqa.
Pampachaspaqa manam allinpaqchu ruwasqantaqa hapinchik. Pitapas pampachaykuspaqa manam allinpaqchu ruwasqantaqa hapichkanchik. Jehova Diosqa mana allinpaqmi huchataqa qawan, ichaqa pampachanmi sunqumanta wanakuqkunataqa (Salmo 103:12, 13; Habacuc 1:13). Payqa manam ‘wiñaypaqchu piñakun’, chaymi munan payta qatipakuspa pampachakuq kananchikta (Salmo 103:9; Mateo 6:14).
Sientikuq kayqa manam yanapawanchikchu. ¿Imanasqa? Kaypi yuyaymanay, makikita haywarispa llasaq rumita hapirayaspa kawaq. Mana unay kaptinqa manapaschá pisipawaqchu. Ichaqa, ¿imaynam tarikuwaq unay tiempo kaptinqa? Unay tiempo hapirayaspa kaspaykiqa pisiparuwaqchá ¿aw? Rumipa llasayninqa hinallamá, ichaqa unay tiempo hapirayaptikim llumpay llasaqman rikchakunman. Yaqa chaynallam sientikuruypas, unay tiempo piwanpas sientikuruspaqa astawanmi hukmanyanchik. Chayraykum Jehova Diosqa niwanchik mana sientikuq kanapaq (Proverbios 11:17).
Sientikuq kayqa manam yanapawanchikchu
“Jehova Dios rimapayawachkanmanpas hinam tarikurqani”
¿Imaynatam Lindaqa iñiqmasinpaq sientikurusqanta atiparqa? Chaypaqqa allintam yanaparqa imanasqa pampachakuq kanapaq bibliapa nisqanpi yuyaymanasqan (Salmo 130:3, 4). Payqa yuyarirqam pitapas pampachaptinchik Jehova Diospas pampachawananchikmanta (Efesios 4:32–5:2). Bibliapa chayna nisqanpi yuyaymanaspanmi kaynata nin: “Jehova Dios rimapayawachkanmanpas hinam tarikurqani”, nispa.
Tiempopa risqanman hinam Lindaqa chay iñiqmasinwan allinyanakurqaku. Pampachaspanmi kunanqa allin amistadña kanku. Lindaqa hinallam Jehova Diosta servichkan. Arí, Diosqa munanmi qampas wiñaypaq hinalla servinaykita.