QARANPI KAQ YACHACHIKUY | ANGELKUNAQA ¿YANAPAWANCHIKMANCHU?
¿Ima nintaq bibliaqa angelkunamanta?
¿Angelkunamanta chiqap kaqta yachayta munawaqchu? ¿Pitaq paykunaqa kanku? ¿Imaynatataq rikurirqaku? ¿Imatam ruwanku? Chaykunamantam biblia willawanchik (2 Timoteo 3:16).
Angelkunapas Dios hinam mana rikuy atina kanku, manam aycha cuerpoyuqchu kanku. Diosta kasukuq angelkunaqa hanaq pachapim yachanku Dioswan kuska (Lucas 24:39; Mateo 18:10; Juan 4:24).
Wakinpiqa kay pachaman hamuruspankum angelkunaqa aycha cuerpoyuq karqaku Diospa kamachisqanta ruwanankupaq, ruwaruspankum ichaqa hanaq pachaman kutikurqaku espiritu cuerponkupi (Jueces 6:11-23; 13:15-20).
Bibliam willawanchik angelkunaqa runa rikchayniyuq kasqankumanta, ichaqa manam qarichu nitaq warmichu kanku. Chaymi paykunaqa mana casarakunkuchu nitaq mirankuchu. Chaymantapas, angelkunaqa manam hanaq pachaman riq wañuq wawakunachu nitaq wañuq yuyayniyuqkunachu kanku. Angelkunataqa Jehova Diosmi unancharqa (Job 1:6; Salmo 148:2, 5).
Bibliam willakun ‘angelkunapa rimaynin’ kasqanmanta, chaymi qawachin angelkunapas runakuna hina sapaq rimayniyuq kasqankumanta. Diosqa angelninkunatam kachamurqa runakunawan rimananpaq, ichaqa manam munanchu angelninkunata runakuna yupaychanankutaqa (1 Corintios 13:1; Apocalipsis 22:8, 9).
Wara-waranqantinmi angelkunaqa, yaqachusmi millo-millonnintin kanku (Daniel 7:10; Apocalipsis 5:11).
Angelkunaqa ancha atiyniyuqmi kanku, runakunamantapas aswan kallpayuq hinaspa yachayniyuq. Ñawi qimchiyllam may lawpipas rikurirunku (Salmo 103:20, Chuya Qellqa 2012; Daniel 9:20-23).
Angelkunaqa atiyniyuq hinaspa yachayniyuq kachkaspankupas manam lliwtachu imamantapas yachanku (Mateo 24:36; 1 Pedro 1:12).
Angelkunaqa imayna kayninkupipas manam chaynallachu kanku. Llakipayakuq hinaspa kuyapayakuqmi kanku, hinaspapas allin kaqta utaq mana allin kaqta ruwanankupaq tanteakuy atiqkunam kanku. Ichaqa wakin angelkunam Diospa contranpi hatarirurqaku (Judas 6).