Diosqa favorecenmi tukuy sonqonwan asuykuqkunataqa

¿Diosqa valoranchu payman tukuy sonqonkuwan asuykunankupaq kallpanchakuqkunata? Wakinqa piensankum Jehova Diosqa runakunapi mana reparasqanta. Chaynataqa piensanku Diosta mana reqsisqankuraykum. Bibliam willawanchik Jehova Diosqa serviqninkunapa kallpanchakusqanpi reparasqanta. Qatiqninpiyá qawasun Hebreos 11:6 nisqanpi apostol Pablopa nisqanta.

¿Imataq yanapawachwan Jehova Diospa agradonpaq hina kawsanapaq? Apostol Pablom nirqa: ‘Mana iñiyniyoq kaspaqa Diostaqa manapunim agradachwanchu’, nispa. Qawasqanchikman hinam apostol Pabloqa manam ninchu “sasam” nispachu aswanqa “manapunim” nispam. Diosta agradanapaqqa iñiyniyoqpunim kananchik.

¿Imayna iñiyniyoq kananchiktam Diosqa munan? Payqa munanmi ‘kasqanpipuni creenanchikta’, pay kasqanpi mana creespaqa manam agradachwanchu. Ichaqa manam creeyllachu creena, Dios kasqanpiqa “demoniokunapas creenmi” (Santiago 2:19). Pay ‘kasqanpi creesqanchikmi’ kallpanchawanchik agradonpaq hina kawsanapaq (Santiago 2:20, 26).

Chaymantapas creenam Diosqa ‘favorecekuq’ otaq runakunata bendeciq kasqanpipas. Iñiyniyoq runaqa Dios serviyninpi kallpanchakusqantaqa manam yanqapaq kasqantachu piensan (1 Corintios 15:58). Jehova Diosqa imatapas qokuykuq otaq bendecikuq kasqanmanta iskayrayaspaqa manapunim agradachwanchu (Santiago 1:17; 1 Pedro 5:7). Dios mana reparawasqanchikpi otaq mana bendeciwasqanchikpi piensaspaqa pay mana reqsisqanchiktam qawachinchik.

¿Pikunatataq Diosqa favorecen? Apostol Pablom nin: ‘Maskaqninkunatam’, nispa. Biblia tikraqkunata yanapaq qellqam nin: “Griego rimaypi ‘maskaqninkunata’ nispanqa manam Diosta ‘maskanallamantachu’ rimachkan aswanqa yupaychanapaq ‘maskaymantam’”, nispa. Chay palabramantam tukuy sonqowan Diosta maskanapaq kasqanmanta huk qellqapas nin. Jehova Diosqa favorecenmi iñiywan hinaspa tukuy sonqonkuwan yupaychaqninkunataqa (Mateo 22:37).

¿Imawantaq Jehova Diosqa favorecewasun? Kuyawasqanchikraykum kay Allpa pachapi suma-sumaq huertapi wiñay kawsayta qowasun (Apocalipsis 21:3, 4). Kay tiempopipas tukuy sonqonkuwan yupaychaqninkunaqa achka bendicionkunatam chaskinku. Diospa chuya espiritunpa yanapayninwan chaynataq Bibliamanta yachasqankuwanmi ancha kusisqa kawsakunku (Salmo 144:15; Mateo 5:3).

Qawasqanchikman hina Jehova Diosqa valoranmi yupaychaqninkunata. Chayqa kallpanchawananchikmi payman astawan asuykunapaq. ¿Munawaqchu yachayta imaynatam Jehova Diospa agradonpaq hina iñiyniyoq kayta?