Imayna contestayta yachay

WAKIN tapukuykunaqa naranjamanmi rikchakun: Malliykuspañam naranja imayna kasqantaqa yachanchik. Tapukuykunapas chaymanmi rikchakun, tapukuqpa imayna piensasqanta musyaspañam yachanchik imanasqa tapukusqankumanta.

Tapuwaqninchik maynataña yachayta munaptinpas tanteananchikmi imakunamanta hinaspa imaynata contestanapaq (Juan 16:12). Apostolninkunaman Jesuspa nisqanpi hinam wakinqa yachayta munanman mana willananchikpaq kaqkunamanta otaq manaraq yachananpaq kaqkunamantapas (Hech. 1:6, 7).

Bibliaqa niwanchikmi: ‘Kachiwan tupachisqa hinayá sumaqllaña rimasqaykichikqa kachun, yachaychikyá sapakamaman imaynam allin contestaytapas’, nispa (Col. 4:6). Chaymi manaraq imamantapas rimachkaspa allintaraq piensana imaynata contestanapaq.

Imanasqa tapususqaykipi reparay

Saduceokunam Jesusta pantarachiyta munaspanku tapurqaku, achka kutikama casarakuq warmipa kawsarimunanmanta. Jesusqa cuentatam qokurqa kawsarimuymanta saduceokuna mana creesqankuta, hinaptinmi tapusqankuta contestaspan corregirqa chayna piensasqankumanta. Allinta piensarichispa hinaspa Bibliapa nisqanta servichikuspanmi qawachirqa wañuqkunata Jehova Dios kawsarichinanmanta. Hinaptinmi chay runakunaqa admirakuruspanku astawan tapuytaqa manaña munarqakuchu (Luc. 20:27-40).

Imayna contestanaykipaqqa cuentatam qokunayki tapusuqniki imanasqa tapususqaykimanta otaq ima preocupasqanmantapas. Kaypi piensariy, ichapas estudiaqmasiki otaq llamkaqmasiki tapusunkiman Navidad fiestata imanasqa mana rurasqanchikmanta. ¿Imaynanpitaq chaynata tapusunkiman? ¿Cheqaptachu yachayta munan icha kusirikusqanchikta otaq mana kusirikusqanchikta yachayta munaspallanchu? Chaypaqqa allinmi kanman imanasqa tapususqaykimanta yachayniki hinaspam chayman hina contestawaq, chaymantapas qawachiwaqmi chay fiestakunarayku ima gastokunamantapas Bibliapa yachachisqan imayna librawasqanchikmanta.

Ichapas estudiantekunapa qayllanpi Jehova Diospa testigon imakunapi iñisqankumanta rimarinaykipaq pipas nisunkiman. Yaqapaschá rimayta tukuruptikiqa tapuyta qallaykusunki. Yachayta munasqankurayku sonqonkumanta tapusuptikiqa allinmi kanman pisillata rimaspa entiendenankupaq hina contestaynikiqa. Testigokunamanta mana allinta piensasqankuman hina tapukuyninku kaptinqa allinmi kanman manaraq contestachkaspa imanasqa chayna piensasqankumanta qawachiynikiqa hinaspa Jehova Diospa testigonkunaqa Bibliapa nisqanman hina imanasqa kawsay munasqanchikmantapas. Ichaqa manam pruebawanallanchikpaq tapuwasqanchiktachu piensananchik aswanqa yachay munasqankurayku tapuwasqanchiktam, pruebawananchikpaq hina tapuwaptinchikpas yanapaytaqa atichwanmi. Tapuwasqanchikta kutichispaqa atichwanmi astawan entiendechiyta imam kaqmanta hinaspa Bibliapa nisqanman hina creesqanchikkunamanta willaytapas.

¿Imatataq rurawaq asambleaman rinaykipaq patronniki mana permisasuptikiqa? Puntataqa reparanaykim patronnikipa ima nisusqaykipi. ¿Niwaqchu llamkasqaykimantapas astawanraq llamkapunaykipaq? ¿Permisasunkimanchu asambleapi yachasqaykikuna honrado hinaspa cumpleq kanaykipaq yanapasusqaykimanta willaptiki? Patronnikipa imapas preocupasqanpi reparaptikiqa paypas entiendenmanmi asambleaman riyniki imanasqa ancha allin kasqanta hinaspam permisasunaykipaq tanteanman. Ichaqa, ¿imatam rurawaq patronniki mana allinta ruranaykipaq nisuptikiqa? Bibliapa nisqankunapi piensaspa imanasqa mana kasukusqaykita ninaykimantaqa kaynatam piensarichiwaq, ¿manachu qampa rantiykipi engañaspa suwakuqqa qamtapas engañaspa suwasunkiman? nispa.

Ichapas colegioykipi mana chaqrukuyta munankichu Bibliapa contranpi mayqen kaq costumbrewanpas. Ichaqa salonnikipi kaqkunamantaqa profesornikim cuentallikun, payqa manapaschá piensasqaykiman hinachu piensanqa. Chaymi kaykunata ruranaykipaq kallpanchakunayki: 1) piensay profesornikipa imam preocupasqanpi, 2) piensasqaykimanta respetowan willay, hinaspa 3) Jehova Diospa munasqanman hina piensasqaykita valorwan defiendey. Uyarisuqnikikunaman allinta entiendechinaykipaqqa manapaschá rimaspallachu otaq imam kaqta nispallachu entiendechiwaq (Prov. 15:28). Warmallaraq kaptikiqa tayta-mamaykim yanapasunkiman iñisqaykikunamanta imaynata contestanaykipaq.

Pipas autoridad kaspan yanqamanta acusawaptinchikqa mana chayna kasqanta qawachinapaqmi wakin kutipiqa rimachwan. Ichapas huk guardia chaynataq gobiernopaq llamkaq runa otaq juezpas imanasqa mana marchasqanchikmanta otaq banderata mana saludasqanchikmanta tapuwanchikman. Chayna kaptinqa, ¿imaynatataq contestachwan? ‘Respetowanmi’ (1 Ped. 3:15). Chaymantapas yuyaymanananchikmi imanasqam chaykuna preocupasqanpi hinaspam respetasqanchikta qawachina. ¿Imatawanraqmi rurachwan? Imaynam apostol Pablopas Roma nacionniyoq runakunapa leyninwan amparachikurqa chaynam ñoqanchikpas gobiernopa leyninkunawan amparachikuchwan (Hech. 22:25-29). Apostolkunapa tiemponpi cristianokuna chaynataq Jehova Diospa testigonkunapas runakunapa costumbrenkuwan imanasqa mana chaqrukusqanchikmanta willaptinchikqa yaqapaschá entiendenmanku. Nichwantaqmi Diospa kamachisqankunata kasukusqanchikqa autoridadkunatapas kasukunanchikpaq yanapawasqanchikmanta, ichaqa Diospa contranpi mana kaptillan kasukusqanchiktam qawachinanchik (Rom. 13:1-14). Kaykunamanta hinaspa chaynataq Bibliapa nisqanman hina imanasqa mana chaqrukusqanchikmanta willaptinchikqa ichapas allinninchikpaq kanman.

Imatam tapuwaqninchik Bibliamanta piensan

Tapuwaqninchikta manaraq contestachkaspam tanteananchik Bibliamanta imam piensasqanta; Jesuspas chaynatam rurarqa kawsarimuymanta saduceokuna tapuptinku. Moisespa qellqasqan librokunallapi saduceokunapa creesqankuta servichikuspanmi Jesusqa kaynata nirqa: “Wañuqkunapa kawsarimunanmantaqa Moisespas yachachirqam”, nispan (Luc. 20:37). Bibliapa imakuna nisqanpi uyariwaqninchik creeptinqa chayman hinam ñoqanchikpas yachachichwan.

Diospa Palabranpi mana creeptinqa, ¿imatataq rurachwan? Hechos 17:22-31 willakun Areopago nisqa huñunakunanku moqopi Pablopa yachachisqanmanta, chaypim Bibliapa yachachikuyninkunamanta willarqa Bibliata mana servichikuspallan. Atikuptinqa ñoqanchikpas chaynatam yachachichwan. Wakin runakunamanqa Bibliapa ima nisqanmanta manaraq qawachichkaspam piensarichinaraq. Diospa Palabranmi Bibliaqa ninallamantaqa allinmi kanman nisqankuna imanasqa cheqap kasqanmanta qawachiyqa. Piensasqaykiman hinalla yanapanaykimantapas uyarisuqnikita kallpanchay Bibliapa yachachisqankunamanta kikinpuni cuentata qokunanpaq. Predicaspaqa munanchikmi Diospa munayninmanta allinta entiendenankuta (Heb. 4:12).

‘Sumaqllañayá kachun rimasqanchikqa’

Jehova Diosqa sumaq sonqom hinaspapas kuyapayakuqmi, chaymi serviqninkunata kallpanchan ‘kachiwan tupachisqa hina’ rimayninku sumaqllaña kananpaq (Col. 4:6; Ex. 34:6). Imaña sasachawaptinchikpas sumaqllatam rimana. Rimayninchikqa llampu simi kasqanchiktam qawachinan, manam nanay simi kasqanchiktachu.

Tukuy imawan sapa punchaw sasachakusqankuraykum wakin runakunaqa nanay simiwan contestawachwan. Chayna kaptinqa, ¿imatataq rurachwan? Bibliam nin: “Allin simillawan contestaq runaqa runamasinpa piñakusqantam tanichin”, nispa. Chaymi sumaqllata contestaspaqa ñoqanchikmanta mana allin piensaqkunata hawkayachichwan (Prov. 15:1; 25:15). Hukkunapa tratapasqanwan sapa punchaw ñakariqkunaman sumaqllata hinaspa kuyapayakuywan predicaptinchikqa ichapas allinta uyariwachwan.

Bibliapa yachachisqankunata mana respetaq runakunawanqa manam atipanakuyta munanchikchu aswanqa Diospa Palabranmanta yachay munaqkunamanmi explicayta munanchik. Imayna kaptinpas kuyakuywanmi contestananchik, chaynallataqmi convencisqa willananchik Diospa promesankuna cumplikunanmanta (1 Tes. 1:5).

Sapakamam imapaqpas tanteana

¿Ima niwaqtaq estudiantiki otaq mayqen iñiqmasinchikpas imamantapas tanteakunanpaq tapusuptiki? Yaqapaschá qamqa yachawaq imayna tanteakuyta ichaqa tapusuqnikim tanteakunan ima ruranantaqa (Gal. 6:5). Apostol Pablopas uyariqninkunatam kallpancharqa iñisqankuman hina kasukunankupaq (Rom. 16:26). Chayna yachachisqantaqa ñoqanchikpas qatipakuchwanmi. Bibliamanta yachachiqninta otaq hukkunata kusichinallanpaq kallpanchakuqqa runakunapaq hinam kawsachkan, manam iñisqanman hinachu (Gal. 1:10). Chaymi ima rurananpaqpas tanteapunamantaqa kikintam piensarichina tanteakunanpaq.

¿Imaynatam yanapawaq Bibliapa nisqanman hina tanteakunanpaq? Qawachiwaqmi Bibliapi Diospa yachachikuyninkuna hinaspa ejemplonkunapas imayna yanapasqanmanta. Wakin kutipiqa yanapawaqmi yachay munasqanmanta qellqanchikkunapi kikinña maskananpaq, chayman hina ima ruranantapas tanteakunanpaq. Chay yanapakuykuna qawachisqaykimanta tapuy sichum mayqellanpas yanapanman allinta tanteakunanpaq. Hinaspa kallpanchay Jehova Diospa agradonpaq hina tanteakunanpaq. Chaynata yanapaptinchikmi ‘allin kaqta hinaspa mana allin kaqtapas reqsinqaku’ (Heb. 5:14).

Huñunakuypi rimarinapaq kaptin

Huñunakuykunaqa yanapawanchikmi iñiqmasinchikkunapa qayllanpi Diosninchikta alabananchikpaq, chaytaqa rurachwan tapumusqankuta kutichispam. ¿Imaynatataq contestachwan? Jehova Diosta alabanapaq hinam contestana, chaynatam rurarqa rey Davidpas ‘lliw huñunakuqkunapa chawpinpi’ (Sal. 26:12). Hinaspapas huñunakuypi rimarisqanchikqa iñiqmasinchikkunatam kallpanchanan ‘kuyanakunanchikpaq hinaspa allin ruraq’ kananchikpaq (Heb. 10:23-25). Chaypaqqa allinmi kanman tiempowan preparakuyninchik.

Tapukuykunata kutichispaykiqa kallpanchakuy pisi rimayllapi kananpaq chaynataq entiendekunanpaqpas. Huk parrafopa lliw nisqanmanta rimanaykimantaqa wakillanmanta rimay, chaynata ruraptikiqa hukkunapas rimariytam atinqaku wakin yachachikuyninmanta. Allinmi chay parrafopi rikuriq textokunamanta rimayqa, ichaqa estudiasqanchikwan tupaq yachachikuyninmantam astawanqa rimana. Leespa contestanaykimantaqa kallpanchakuy entiendesqaykiman hina rimarinaykipaq. Ama hukmanyaychu munasqaykiman hina contestayta mana atispaqa, llapanchiktam wakinpiqa chayna pasawanchik.

Tapukuykunata kutichiyqa manam yachasqanchikmanta contestayllachu. Chaypaqqa allintam piensarinanchik. Tukuy sonqonchikmanta contestasqanchikqa kusichiwanchikmi, kallpanchantaqmi hukkunatapas (Prov. 15:23).