Entiendesqanchikman hina rimanapaq

YAQAPASCHÁ discursoykitaqa ordenninpi hinaspa clarota rimanaykipaq achka horapi preparakurqanki. Uyarisuqnikikuna imawanpas intusqa kaspanku yachachisqaykita wakillanta uyariptinkuqa, ¿yanapanqachu yachachisqayki? Yachachisqayki sasa entiendenapaq kaptinqa, ¿yaqachum uyarisuqnikikunata yanapanman?

¿Imanasqataq sasachakunmanku? Chaypaqqa achka razonkunam kanman. Discurso qoq entiendesqanman hina mana rimaptinqa uyariqninkunam entiendenankupaq sasachakunmanku, ichapas bosquejonta sapa kuti qawapayasqanrayku. Chayqa sutillatam qawachinqa imayna preparakusqanta.

Yachachinaykipaq kaqta bosquejopi qellqaruspaqa sasachakuwaqmi entiendesqaykimanta rimanaykipaq. ¿Imanasqa? Ichapas imayna palabrakunawan rimanaykipaq qellqasqaykirayku. Bosquejota servichikuspapas qellqasqayki palabrakunapichá hinalla piensanki. Qellqasqaykiman hina discursoykipi rimaspaqa manam tukuy sonqoykiwanchu rimanki.

Discurso qonaykipaq llapanta qellqanaykimantaqa kaykunata ruray: 1) Akllay imamanta yachachinaykipaq kaqta hinaspa aswan allinnin kaq yachachikuykunatapas. Pisi tiempollapi rimanayki kaptinqa allinmi kanman iskay aswan allinnin kaq yachachikuykunallata akllayniki; 30 minutopi otaq masnin minutopi rimanaykipaq kaptinñataq tawata otaq pichqata akllawaq. 2) Chay yachachikuykunawan tupaq textokunata, rikchanachiykunata hinaspa ima willakuykunatapas anotay. 3) Piensay imamanta rimaspa discursoykita qallarinaykipaq chaynataq tukunaykipaqpas. Chaykunataqa qellqawaqmi pisi rimayllapi.

Allinta preparakuyqa ancha allinmi, ichaqa ama umallaykimantachu yacharuy sapa palabrata. Bosquejota servichikuspa rimanayki kaptinqa reparay imamanta yachachisqankunapi ama palabrakunapichu. Chay yachachikuykuna qatinasllanpi imayna tupasqanpipas reparay. Imamanta yachachinaykipaq kaqta ordenninpi rimaspaqa mana sasachakuspam allinta entiendechinki.

Imakunapitaq yanapasunki. Yachachinaykipaq kaqta allinta preparakuspa imayna rimasqaykiman hinalla rimaptikim uyarisuqnikunaqa allinta entiendenqaku.

Chaynata yachachispaqa uyarisuqnikikunata qawarispam rimanki. Chaymantapas rimanaykipaq kaqta sapa kutilla mana qawaspa rimaptikiqa uyarisuqnikikunapas cuentatam qokunqaku yachachinaykipaq kaqta allinta entiendesqaykimanta hinaspa mana iskayrayaspa rimasqaykimantapas. Hinaptinmi chayna yachachisqaykiwan uyarisuqnikikunata kallpanchanki.

Yachachinaykipaq kaqta allinta preparakuspaqa manam imayna qellqasqaykiman hinachu rimanki. Kaypi piensariy, ichapas discurso qonayki punchaw uyariwaq yachachisqaykiwan tupaq ima noticiatapas, ¿manachu chay willakuyta servichikuwaq? Ichapas cuentata qokuwaq huñunakuypiqa warmachakunapas kasqanmanta. Chayna kaptinqa allinmi kanman paykunapaq hina rikchanachiykunawan imamanta yachachisqaykita entiendenankupaq yanapaynikiqa.

Entiendesqaykiman hina tukuy sonqoykiwan rimasqaykipas yanapasunkim ima yachachikuymantapas astawan yuyanaykipaq. Yachachisqaykita allinta uyariptinkuqa kallpanchasqam kanki wakin yachachikuykunamanta astawan entiendechinaykipaq. Yachachisqaykita entiendenankupaq sasachakusqankumanta cuentata qokuspaqa kallpanchakuwaqmi imaynata astawan entiendechinaykipaq.

Imakunataq sasachasunkiman. Entiendesqaykiman hina rimaspapas wakinpiqa sasachakuwaqmi. Discurso qosqaykipi achka yachachikuykunamanta rimaspaqa sasachakuwaqmi tiempollanpi tukunaykipaq. Chaywan mana sasachakunaykipaqmi bosquejoykipi anotawaq sapa yachachikuy hayka minutopaq kasqanta hinaspa chayman hinalla rimanaykipaq.

Sasachakunmankutaqmi experienciayoq discurso qoqkunapas kikillankupi llumpayta confiakuspankuqa. Hukkunapa qayllanpi rimanankupaq costumbrasqa kasqankuwanmi wakinqa manaña preparakuspa imamantapas umankupi kasqanman hina rimanku. Ichaqa humildadwanmi reqsikunanchik yachachisqanchikqa Jehova Diospa yachachikuynin kasqanta, chaymi discurso qonapaqqa allinta preparakunanchik Diospa yanapayninta mañakuspa (Is. 30:20; Rom. 12:6-8).

Ichapas mana experienciayoq wakin discursantekunaqa manchapakunku entiendesqankuman hina rimasqankuwan yachachinankupaq kaqta qonqarunankumanta. Ama chaywanqa harkachikuychu. Entiendesqaykiman hina yachachispaykiqa tiempopa risqanman hinam allin discursante kanki. Allinta preparakuy hinaspa Jehova Diospa yanapayninpi confiay (Juan 14:26).

Wakin discursantekunañataqmi qellqasqankuman hina rimayta munanku rimayninkupi mana pantarunankurayku. Leespalla discursota qospaqa imam kaqtam leenchik, chayna yachachiyninchik allin kaptinpas entiendesqanchikman hina tukuy sonqonchikwan rimasqanchikmi uyariwaqninchikkunataqa allinta yanapan. Runakunaqa astawanmi yachayta munanku imayna rimasqanchikman hinalla tukuy sonqonchikwan rimaptinchikqa. Allinta preparakuspaqa mana sasachakuspam entiendesqaykiman hina rimanki. Sapa punchaw allinta rimanaykipaq kallpanchakuspaqa discursota qospapas allintam rimanki.

Imakunatam qellqawaq. Tiempopa risqanman hinaqa yachachinaykipaq kaqkunatam pisillataña qellqanki. Chaykunataqa textokunatawan kuskatam huk papelpi qellqawaq discursota qospa qawarinaykipaq. Predicacionpi imamantapas rimanaykipaqqa allinmi kanman umallaykimanta yachayniki. Yapamanta watukunaykipaq mayqen yachachikuymantapas preparakuspaqa pisi rimayllapi qellqaspa Bibliaykipi waqaychay. Wakinpiqa yachachiwaqmi Traducción del Nuevo Mundo de las Santas Escrituras nisqa Bibliapi “Temas bíblicos para consideración” nisqanwan otaq Razonamiento a partir de las Escrituras nisqan libropi yachachikuykunawanpas.

Sapa semana yachachinayki kaptinqa otaq lliw runakunapaq kaq discursota qonayki kaptinqa allinmi kanman yachachinaykipaq kaqta qellqayniki. ¿Imanasqa? Discursota manaraq qochkaspa imamanta yachachinaykipaq kaqta yuyarinaykipaq. Discursota qospaqa chay qellqasqaykikunata ama sapa kutiqa qawaychu, mana chayqa manam atinkichu entiendesqaykiman hinalla rimaytaqa. Yachachinaykipaq kaqta achkanpi qellqaspaqa aswan allinnin kaq yachachikuykunata hinaspa chaywan tupaq textokunata servichikunaykipaq sutillata señalay.

Experienciayoq discursanteqa bosquejopi yachachikuyman hina allinta preparakuspam entiendesqanman hina yaqa llapanpi sumaqta yachachin. Ichapas allin kanman discursota qallarinanpaq otaq tukunanpaqña uyariqninkunata qawarispan umallanmanta ganaswan rimayninqa. Imapas hayka kasqanmanta, pipa rimasqanmanta otaq textonkunata leeyninpas allintaqmi kanman, chaynata yachachiptinqa uyariqninkunam allinta entiendenqaku.

Imamantapas tapuwaptinchik. Wakinpiqa qonqaytam imapi creesqanchikmanta pipas tapuwanchikman. Chayqa kanmanmi, ayllunchikwan, llamkaqmasinchikwan otaq estudiaqmasinchikwan rimaptinchik chaynataq predicacionpipas. Autoridadkunapas tapuwachwanmi imapi creesqanchikmanta hinaspa imayna kawsasqanchikmantapas. Bibliam consejawanchik: “Listolla kaychik imam creesqaykichikmanta tapusuptikichik clarota contestakunaykichikpaq, chaytaqa ruraychik humillakuspayá hinaspa respetowanyá”, nispa (1 Ped. 3:15).

Reparay Hechos 4:19, 20 nisqanman hina Pedrowan Juan cortepi kaqkunata imayna contestasqankupi. Iskay-kimsa rimayllawanmi imam piensasqankuta allinta entiendechirqaku. Uyariqninku entiendenankupaqmi qawachirqaku apostolkunata acusasqankuqa cortepi kaqkunatapas sasachasqanta. Chaymanta qepatam Estebanta yanqamanta acusaptinku chay corteman rirqa defiendekunanpaq. Leey Hechos 7:2-53 versiculokunata, chaypim willawanchik Esteban entiendesqanman hina mana iskayrayaspa imayna rimasqanmanta. ¿Imaynatam allinta rimarqa? Ñawpa tiempopi imakuna pasasqanman hinam ordenninpi rimarqa. Rimasqanman hinataqmi qawachirqa Diosta mana kasukuq rumi sonqo israelitakunamanta, hinaspam rimayta tukunanpaqña sutillata qawachirqa cortepi kaqkunapas Diospa Churinta wañuchisqankuwan rumi sonqo kasqankuta.

Imapi creesqaykimanta pipas qonqayllamanta tapusuptikiqa, ¿imataq yanapasunkiman allinta contestanaykipaq? Nehemiasta qatipakuy, paymi rey Artajerjespa tapusqanta manaraq contestachkaspan Diosta sonqollanpi mañakurqa (Neh. 2:4). Umallaykipi tanteay imayna contestanaykipaq. Atiwaqmi kaykuna rurayta: 1) Akllay explicanaykipaq huk otaq iskay yachachikuyta (chaypaqqa servichikuwaqmi Razonamiento a partir de las Escrituras nisqa librota). 2) Tanteay yachachisqaykiwan tupaq mayqen textokunata servichikunaykipaq. 3) Uyarisuqnikita mana hukmanyachispalla rimayta qallarinaykipaqpas tanteay. Chaykunapi reparaspa tapusuqnikita contestay.

¿Sasachakuypi kaspaqa atiwaqchu chaynata tanteaspa contestayta? Jesusmi qatiqninkunaman nirqa: ‘Amam llakikunkichikchu imaynam otaq imam rimanaykichikmantaqa, Diosmi yachachisunkichik chay ratopi imam rimanaykichiktaqa. Manam kikillaykichikmantachu rimankichikqa, ichaqa Taytaykichikpa espiritunmi rimachisunkichik’, nispa (Mat. 10:19, 20). Kaywanqa manam nichkanchikchu apostolkunapa tiemponpi cristianokuna hina milagrota chaskispa ‘yachaywan rimanamantachu’ (1 Cor. 12:8). Jehova Diospa yachachiwasqanchikta huñunakuykunapi atencionwan uyariptinchikqa chuya espiritun yanapawasunchik necesitasqanchik hora yachasqanchikkunata yuyarinanchikpaq (Is. 50:4).

Mayna allinmá yachachinanchikpaq kaqta allinta preparakuspa entiendesqanchikman hina rimayqa. Escuelapi discursota otaq demostracionta ruranaykipaq tupasuptiki entiendesqaykiman hina rimanaykipaq costumbraspaqa mana sasachakuspam tapukuykunata contestanki. Bosquejopi yachachikuyta entiendesqaykiman hina rimaspaqa predicaspapas mana sasachakuspam rimanki. Congregacionpi discursota qospaykipas uyarisuqnikikuna atencionwan uyarinankupaqmi kallpanchanki.