Jehova Diosqa sapakamatam kuyawanchik

1. ¿Imayna kasqanchiktam Jehova Diosqa qawamuchkan?

JEHOVA DIOS llaqtanwan kusikusqanta yachaspanchikmi anchata kusikunchik (Sal. 149:4). Payqa qawamun allin sunquyuq kasqanchiktawan imapas ruway atiq kasqanchiktam, chaymi kuyawanchik. Payman sunqu kaptinchikqa manam haykapipas saqiwasunchu (Juan 6:44).

2. ¿Imanasqataq wakin iñiqmasinchikkuna Dios kuyasqanmanta iskayrayanku?

² Ichapas nichwan: “Yachanim Jehova Dios llaqtanta kuyasqantaqa, ichaqa manachusmi ñuqataqa kuyawanmanchu”, nispa. Wakiqninchikqa ichapas chaynata nichwan warma kaspanchik mana pipa kuyasqan utaq ima sasachakuypipas kasqanchikrayku. Iñiqmasinchik Oksanamb nin: “Bautizakuruspay hinaspa precursora karuspayqa ancha kusisqam karqani. Chaymanta 15 wata qipamanmi ichaqa warmachallaraq kaspay ñakarisqayta yuyarispay hukmanyasqa tarikurqani. Chaymi Jehova Dios kuyawasqanmantapas iskayrayayta qallaykurqani”, nispa. Iñiqmasinchik Yuapas ninmi: “Diosta anchata kuyaspaymi bautizakururqani. Ichaqa sunquypim nikuq kani: ‘Manachá Diosqa haykapipas kuyawanqachu’”, nispay.

3. ¿Imamantam kay yachachikuypi yachasun?

³ Ñuqanchikpas rimamusqanchik iskay iñiqmasinchikkuna hina, Jehova Diosta sunqumanta kuyaspanchikpas kuyawasqanchikmantaqa ichapas iskayrayachwan. Chaymi kay yachachikuypi yachasun kay tapukuykunamanta: ¿Imanasqam manapuni iskayrayananchikchu Dios kuyawasqanchikmanta? ¿Imatam ruwachwan iskayrayaspaqa?

DIOS KUYAWASQANCHIKMANTAQA MANAM ISKAYRAYANANCHIKCHU

4. ¿Imanasqataq Dios kuyawasqanchikmanta mana iskayrayananchikchu?

⁴ Dios kuyawasqanchikmanta mana iskayrayaspaqa ima sasachakuyña kaptinpas tukuy sunqunchikwanmi payta servisun. Iskayrayaspam ichaqa hukmanyaruspa mana kallpayuqña rikuriruchwan (Prov. 24:10). Hinaspapas satanaspa tuqllankunamanmi wichiykuchwan (Efes. 6:16).

5. ¿Imaynataq tarikurqaku Dios kuyasqanmanta iskayrayaq iñiqmasinchikkuna?

⁵ Wakin iñiqmasinchikkunam Jehova Dios kuyasqanmanta iskayrayaspanku manaña tukuy sunqunkuwanchu servinku. Iñiqkunapi punta apaq Jamesmi nin: “Betelpi kasqaywan hinaspa huk rimaypi Diosmanta willakusqaywan kusisqa kaspaypas iskayrayarqanim tukuy chay ruwasqaywan Dios kusikusqanmanta. Iskayrayarqanitaqmi mañakusqayta uyariwasqanmantapas”, nispa. Tukuy tiemponwan Diosta serviq Evapas ninmi: “Dios kuyawasqanchikmanta iskayrayaspaqa manañam paypaqqa imatapas kusisqañachu ruwasun”, nispa. Precursor hinaspa iñiqkunapi punta apaq Michaelpas ninmi: “Ñuqanchikmanta Dios mana llakikusqanta piensaspaqa pisi-pisimantam karunchakuruchwan”, nispa.

6. ¿Imatam ruwananchik Dios kuyawasqanchikmanta iskayrayaspaqa?

⁶ Iñiqmasinchikkunapa nisqankuwanmi yachanchik Jehova Dios kuyawasqanchikmanta iskayrayayqa mana allin kasqanta. Chaynaqa, ¿imatam ruwananchik iskayrayaspaqa? Amayá chaypiqa piensasunchu. Chaymantapas, Diostayá mañakusun sunqunchiktawan yuyayninchikta hawkayaykachinanpaq hinaspa pay kuyawasqanchikmanta mana iskayrayanapaq (Sal. 139:23; Filip. 4:6, 7). Hukmanyasqa tarikuspaqa yuyarisunyá wakin iñiqmasinchikkunapas chayna tarikusqankuta. Ñawpaq tiempopipas Diospa wakin serviqninkunaqa hukmanyasqam tarikurqaku. Qatiqninpiyá yachaykusun apostol Pablomanta.

¿IMATAM YACHACHWAN PABLOMANTA?

7. ¿Imakunawanmi Pablo hukmanyasqa karqa?

⁷ ¿Tukuy ima ruwayniyuq kasqanchikraykuchu hukmanyasqa tarikunchik? Chaynam apostol Pablopas tarikurqa. Chaymi nirqa: “Sapa punchawmi llapallan iñiqkunamanta llakipa intusqan kachkani”, nispa (2 Cor. 11:23-28). Ichapas unquspanchik hukmanyasqa tarikunchik. Pablopas yaqachusmi unquspan nirqa: ‘Tipawaqniy kichka hinam aychaypi kachkan’, nispa (2 Cor. 12:7-10). Ichapas sapa kuti pantasqanchikwan hukmanyasqa tarikunchik, chaynam Pablopas wakinpiqa tarikurqa. Paymi nirqa: “Allin kaqta ruwayta munaptiymi mana allin kaq ñuqapi kachkan”, nispa (Rom. 7:21-24).

8. ¿Imanasqataq Pabloqa ima sasachakuyña kaptinpas hinalla Diosta servirqa?

⁸ Pabloqa ima sasachakuypiña kaspanpas hinallam Diosta servirqa. Manapunim iskayrayarqachu llapallanchikta kuyawaspanchik Jesus wañukusqanmantaqa. Chaymantapas, Pabloqa allintam yacharqa Jesuspa nisqanman hina haykam paypi iñiqqa wiñay kawsayniyuq kananmanta (Juan 3:16; Rom. 6:23). Manataqmi iskayrayarqachu ima huchataña ruwaqkunatapas wanakuptinkuqa Jesus wañukusqanrayku Jehova Dios pampachananmantaqa (Sal. 86:5).

9. ¿Imatam Galatas 2:20 Pablopa qillqasqanwan yachanchik?

⁹ Pabloqa yacharqam payrayku wañunanpaq churin Jesusta Jehova Dios kachamusqanta, chaymi mana iskayrayarqachu payta Dios kuyasqanmantaqa (qaway Galatas 2:20). Pablom Jesusmanta rimaspan nirqa: “Paymi kuyawaspan ñuqarayku wañurqa”, nispa. Arí, Pabloqa manamá iskayrayarqachu iñiqmasinkunata hina paytapas anchata Dios kuyasqanmantaqa. Chaymi iñiqmasinkunaman qillqaspanpas nirqa: ‘Huchasaparaq kachkaptinchikmi ñuqanchikpa rantinchikpi Cristoqa wañukurqa’, nispa (Rom. 5:8).

10. ¿Imatam Romanos 8:38, 39 nisqan yachachiwanchik?

¹⁰ (Qaway Romanos 8:38, 39). Pabloqa manapunim iskayrayarqachu Dios kuyawasqanchikmantaqa, chaymi qillqarqa Diospa kuyakuyninmantaqa mana imapas rakiwananchikmanta. Payqa yacharqam ñawpaq tiempopi Israel runakunawan Dios pacienciakusqanta. Yacharqataqmi kikinta llakipayaykusqantapas. Pabloqa, “ñuqarayku wañukunanpaq churin Jesusta Dios kachamuchkaspanqa, ¿imanasqamá manaqa kuyawanmanchu?” nichkanmanpas hinam karqa (Rom. 8:32).

11. 1 Timoteo 1:12-15 nisqanman hina mana allinkunata ñawpaqpi ruwachkaspanpas, ¿imanasqataq Pabloqa mana iskayrayarqachu Dios kuyasqanmanta?

¹¹ (Qaway 1 Timoteo 1:12-15). Pabloqa ñawpaqpi mana allinkuna ruwasqanmantachá wakinpiqa hukmanyasqa tarikurqa. Chayraykuchá nirqa: “Ñuqam huchasapakunamanta aswan huchallikuqqa kani”, nispa. Payqa Jesuspa qatiqnin manaraq kachkaspanmi iñiqkunata ñakarichirqa, carcelman aparqa, wañuchinankupaq niptinkupas “allinmi” nirqam (Hech. 26:10, 11). Imaynaraq Pabloqa tarikurqa ñawpaqpi wañuchisqanku iñiqkunapa churi-wawankuwan kuska kaspanqa. Pabloqa mana allinkuna ruwasqanmanta pesakuspanpas manam chayllapiña umayuqchu karqa, aswanqa payrayku Jesuspa wañukusqanpi yuyaymanaspanmi Dios kuyasqanmantaqa manapuni iskayrayarqachu (1 Cor. 15:3, 10). Ñuqanchikpas manapunim iskayrayananchikchu sapakamata kuyawaspanchik Jesus wañukusqanmantaqa. Paypa wañukusqanwanmi Diosman asuykuyta atinchik (Hech. 3:19). Jehova Diospaq aswan allinqa kunanmanta qipaman imakuna ruwasqanchikmi. Payqa manam yuyanñachu ñawpaqpi serviqnin utaq mana serviqnin kaspanchik mana allinkuna ruwasqanchiktaqa (Is. 1:18).

12. 1 Juan 3:19, 20 nisqanqa, ¿imaynatam yanapawanchik hukmanyasqa tarikuptinchik?

¹² Pantaq kasqanchikraykum wakinpiqa mana valeqpaq utaq pipas mana kuyawasqanchikpaq hapikuchwan (qaway 1 Juan 3:19, 20). Chayrayku ichapas nichwan Jesuspa wañukusqanwan huchanchik mana pampachasqa kasqanta. Chayna tarikuspanchikqa Dios allinta riqsiwasqanchiktam yuyarinanchik. Payqa kuyawanchikmi hinaspapas pampachawanchikmi. Chaymanta mana iskayrayanapaqmi bibliata sapa punchaw estudiananchik hinaspa mañakunanchik, hinaspapas iñiqmasinchikkunawanmi hukllawakunanchik.

¿IMAYNATAM YANAPAWANCHIK ESTUDIAYNINCHIK, MAÑAKUYNINCHIK HINASPA IÑIQMASINCHIKKUNA?

13. ¿Imaynatam biblia yanapawanchik? (Qaway “¿Imaynatam hukkunata Diospa palabran yanapan?” niqta).

¹³ Bibliatam sapa punchaw estudiananchik. Chayta ruwaspanchikqa Jehova Diosmantam hinaspa anchata kuyawasqanchikmantam yachasun. Bibliata leesqanchikpi sapa punchaw yuyaymanaspaqa Diospa munasqanman hinam piensasun (2 Tim. 3:16). Mana valeqpaq hapikuq iñiqmasinchik Kevinmi biblia imayna yanapasqanmanta nin: “Salmos 103 nisqanta ñawinchaspay hinaspa yuyaymanaspaymi manaña iskayrayarqanichu Dios kuyawasqanmanta”, nispa. Evapas ninmi: “Sapa punchawmi tutaykuqta Jehova Dios imayna kasqanpi yuyaymanani, chaypi yuyaymanaspaymi hawka tarikuni, hinaspapas paymanmi astawan asuykuni”, nispa.

14. ¿Imanasqataq Diosta mañakunanchik?

¹⁴ Tukuy tiempom Diosta mañakunanchik (1 Tes. 5:17). Allin amistadkunaqa mana pakaspankum imatapas ninakunku. Manataqmi saqinkuchu rimanakuytaqa, chaynam Jehova Dioswanpas kananchik. Paypi hapipakuspaqa hinaspa kuyawasqanchikmanta mana iskayrayaspaqa llakinchikta utaq imayna tarikusqanchiktam willakunchik (Sal. 94:17-19; 1 Juan 5:14, 15). Iñiqmasinchik Yuam nin: “Diosta mañakuspayqa manam chay punchawpi imapas ruwasqallaymantachu willani, aswanqa sunquypi imayna tarikusqaytam lliwta willani. Ñuqapaqqa Jehova Diosqa churinkuna anchata kuyaq tayta hinam, manam patron hinachu”, nispa. (Qaway “¿Ñawincharqankichu?” niqta).

15. ¿Pikunatam Jehova Diosqa anchata kuyawaspanchik quwanchik?

¹⁵ Iñiqmasinchikkunawanmi hukllawakunanchik. Taytanchik Jehova Diosqa kuyawaspanchikmi achkallaña iñiqmasinchikkunata quwanchik. Paykunapas anchatataqmi kuyawanchik (Sant. 1:17; Prov. 17:17). Apostol Pablom Colosas llaqtapi iñiqmasinkunaman qillqaspan nirqa wakin iñiqmasinkuna yanapasqanmanta hinaspa kallpanchasqanmanta (Col. 4:10, 11). Jesustapas angelkuna hinaspa apostolninkunam kallpanchaykurqaku, chayna yanapaykusqankumantam anchata agradecekurqa (Luc. 22:28, 43).

16. ¿Imaynatam iñiqmasinchikkuna yanapawachwan Dios kuyawasqanchikmanta mana iskayrayanapaq?

¹⁶ ¿Imapas llakinchikta utaq sasachakuyninchikta iñiqmasinchikkunaman willanchikchu yanapaykuwananchikpaq? Paykunaman willayninchikqa allinninchikpaqmi. Manam ninanchikchu: “Willaykuptiyqa mana iñiyniyuq kasqaytachá ninqaku”, nispaqa. Iñiqmasinchik Jamesmi nin: “Diosman sunqu iñiqmasinchikkunam anchata yanapawan. Llakisqa tarikuptiypas paykunam sumaqta uyariykuwan. Niwankutaqmi anchata kuyawasqankutapas, chaywanmi mana iskayrayanichu Jehova Diosqa anchata kuyawasqanta”, nispa. ¡Ancha allinmá Diosman sunqu iñiqmasinchikkunawan amistad kayqa!

AMAYÁ DIOSMANTAQA KARUNCHAKUSUNCHU

17, 18. ¿Pitam kasukunanchik? ¿Imanasqam kasukunanchik?

¹⁷ Satanasqa munan hukmanyaruspa Diosta mana kasukunanchiktam hinaspa kuyawasqanchikmanta iskayrayaspa pantasqanchikkunawan hukmanyarunanchiktam. Kay yachachikuypi yachamusqanchikman hinaqa manamá chaynachu.

¹⁸ Diosqa sapakamatam kuyawanchik. Payta kasukuspaqa Jesus hinam kuyasqan kasun (Juan 15:10). Chaynaqa, amayá satanastaqa kasusunchu, payqa munan Dios kuyawasqanchikmanta iskayrayananchiktam. Jehova Diostayá kasukusun, payqa sapakamapa allin ruwasqanchiktam qawamun. Diosqa llaqtanwan hinaspa sapakamawanmi anchata kusikun.