Diosman asuykuychik

Mozo-sipasyanapaq tiempo chayamuptin

YUYAQYASQAQA cuerpom nanan, tullum katkatatan, karutam uyarinchik, manam allintañachu rikunchik . . ., chaytaqa manam pipas munanchikchu. ¿Chaynachu tarikunki? Ichapas tapukunki: “¿Imanasqataq yuyaqyani? ¿Imanasqam Diosqa kaynata unanchawarqa?”, nispa. ¡Kusikuy, manam chayna kanapaqchu unanchawarqanchik! Diosqa ancha kuyawasqanchikraykum yuyaqyayta wiñaypaq chinkachinqa. ¿Cheqapchu chay kanman? Qawaykusun Job 33:24, 25 nisqanta.

Piensay Diosman sonqo Job runapi, paytam Dios anchata kuyarqa. Job mana musyakuchkaptinmi Satanas nirqa Dios imatapas qoptillan servisqanta. Diosmi ichaqa yacharqa Job payman sonqo kasqanta, yacharqataqmi ima ñakariymantapas libranantaqa. Chaymi saqerqa chupuman rikchakuq onqoywan “chaki pIantanmanta” “uma puyukninkama” Diablo ñakarichinanpaq (Job 2:7). Cuerponta ururuptinmi qarapasqa aychan yanayaruspan pelarikurqa (Job 7:5; 30:17, 30). Mayna nanaypiraq tarikurqa, ichaqa hinallam Jehová Diosman sonqo karqa. Chaymi kawsanankama Diosta mana qepanchananmanta nirqa (Job 27:5).

Ichaqa, wañunantaña piensaspanmi kikillanpi hinaspa allin ruraq kasqanpi llumpayta piensaspan ‘Jobqa mana huchayoqpaq hapikuspan Diosman’ tumparqa (Job 32:2). Jehová Diosmi Eliuntakama Jobta corregirqa chayna piensasqanmanta, ichaqa nirqam ‘sepulturaman ama yaykunanpaq’ “huk pagota” chaskinanmanta. Nirqataqmi mozo kasqanpi hinaraq ‘aychanpas rikurinanmanta’ (Job 33:24, 25). Chaymanta yachasqanqa maynatachá Jobta kusichirqa. Pantasqanmanta wanakuptinqa Diosmi “pagota” chaskinman karqa hinaspa ñakarisqanmanta libranman karqa.a

Jobqa llampu sonqo kaspanmi pantasqanta reqsikuspan wanakurqa (Job 42:6). Huchanta pampachananpaq hinaspa allinyananpaqmi Jobpa animal kañapusqanta Jehová Dios chaskirqa. Chaymantam Jehová Diosqa Jobta bendecirqa “ñawpaq watakunamantapas aswanraq” (Job 42:12-17). ¿Imaynata? Llumpay onqoyninmanta sanoyachispanmi ‘aychanta rikurichirqa mozo kasqanpi hinataraq’. ¡Mayna kusikunapaqmá chayqa!

Chaywanpas animal kañasqanqa huk tiempollam yanaparqa, hinallam pantaq kaspa wañurqa. Ichaqa kanraqmi Jobpa qosqanmanta aswan chaninniyoq pago. Chayqa Cristopa rantinchikpi wañusqanmi, Jehová Diosmi kuyawasqanchikrayku qowarqanchik (Mateo 20:28; Juan 3:16). Cristopa wañusqanpi iñiqkunatam Diosqa suma-sumaq Allpa pachapi wiñaypaq kawsachinqa, chaypiqa manam yuyaqyay kanqañachu. ¿Imatam rurachwan ‘mozo kasqanchikpi hinaraq’ aychanchik kananpaq? Kay tapukuypa kutichiyninta Bibliapi maskanaykipaqmi kallpanchaykiku.

[Willakuy]

Diosman asuykuychik

Llumpay llakisqakunapaq consuelo

“MANAPUNIM Jehová Diosqa kuyawanmanchu”. Chaynatam huk cristiana nirqa unay tiempoña llumpay llakisqa tarikuspan. Paymanta Dios karupi kasqantam sapa kuti piensarqa. Ichaqa, ¿karupichu Diosqa kachkan serviqninkuna llumpay llakisqa kaptinku? Salmos 34:18 versiculonpim Davidpa qellqasqan qawachiwanchik mana chayna kasqanmanta.

Davidqa kikinpunim yacharqa Diosman sonqo runaqa llakipi kaspan hukman tarikusqanmanta. Mozo kaspanmi ayqestin hinaspa pakakustin purirqa cheqniqnin rey Saul wañuchinanpaq qatikachaptin. Saul mana maskananta piensaspanmi huk kutipi pakakurqa Gat law Filistea nacionpi, chayqa karqa enemigonkunapa llaqtanmi. Pakakuchkaptinpas chay runakunaqa reqsirurqakum. Ichaqa loco tukuspallanmi lluptirurqa. Chay peligromanta libraptinmi Diosta alabarqa, chaymi Salmos 34 capitulota qellqarqa.

¿Sasachakuykunawan hukmanyaspachu piensarqa Diosqa paymanta karupi kasqanta? Paymi qellqarqa: “Jehová Diosqa hichpallanpim kachkan llakisqa sonqoyoqkunapaq, payqa llakiwan qatisqakunatam salvan”, nispa (versiculo 18, NM). Qawasun imaynatam kayna nisqanqa yanapawanchik suyakuyniyoq hinaspa consuelasqa kanapaq.

“Jehová Diosqa hichpallanpim kachkan.” Chayna nisqanmantam huk libro nin: “Diosqa llaqtanta libraykunanpaq hinaspa salvaykunanpaq listom kachkan”, nispa. Kallpanchawanchikmi Diosmanta chay yachasqanchikqa. Diosqa serviqninkunatam cuidan, kay ‘tiempokuna sasallaña kaptinpas’ imawan llakisqankupim reparan, yachantaqmi sonqonchikpi imawan llakisqanchiktapas (2 Timoteo 3:1; Hechos 17:27).

‘Llakisqa sonqoyoqkuna.’ Chay rimaytam “sonqoymi nanachkan” ninku, warmi-qari kuyanakuymanta rimaspanku. Davidpa nisqanqa rimachkan “imawanpas llakisqanchikmantam”. Diosman sonqo kaqkunapas sasachakuypi kaspankum llumpay llakisqa tarikunmanku.

‘Llakipa qatisqankuna.’ Llakiwan hukmanyasqakunaqa mana imapaq valesqankuta piensaspankum mana suyakuyniyoqña sientekunku. Biblia tikraqkunapaq huk librom nin, chayna rimaytaqa tikrachwanmi: “Mana ima allintapas suyaqkuna”, nispa.

¿Imaynatam Diosqa contestan ‘llakisqa sonqoyoqkunapa’ hinaspa ‘llakiwan qatichikuqkunapa’ mañakusqankuta? ¿Karupichu paykunamanta tarikun favorninta mana mereceqpaq hina qawaspan? Manapunim. Imaynam kuyakuq taytapas llakisqa churinta abrazaykuspan kallpanchan, chaynam Jehová Diospas qayakuqninkunapa hichpallanpi kachkan, payqa llakisqa sonqoyoqkunata hinaspa llakiwan qatichikuqkunata kallpanchaspam consuelayta munan. Payqa kallpata hinaspa yachayta necesitasqankuman hina qospanmi yanapan sasachakuyninkuta atipanankupaq (2 Corintios 4:7; Santiago 1:5).

¿Munawaqchu yachayta imaynam Diosman astawan asuykunaykimanta? Llakipayakuywanmi niwanchik: “Ñakarichisqakunawanmi kachkani [. . .] humillachisqakunawanmi kachkani. Paykunawanqa kachkani ñakarichisqakunata kallpanchanaypaqmi. Paykunawanqa kachkani humillachisqakunata valorchanaypaqmi”, nispa (Isaias 57:15).