Leeqkunapa tapukuyninkuna
¿Haykapitaq Bibliapa willakusqanman hina Gran Bretañawan Estados Unidos nacionkunaqa enteron Pachapi qanchis kaq kamachikuqpi rikurirurqaku?
▪ Nabucodonosorpa mosqokusqan hatunkaray runaqa, manamá tupachisqachu kachkan enteron Pachapi lliw munaychakuq nacionkunawanqa (Dan. 2:31-45). Aswanmi tupan Danielpa tiemponmanta qepaman enteron Pachapi pichqa munaychakuq nacionkunawan, hinaspapas Diospa llaqtanpa contranpim hoqarikurqaku.
Nabucodonosorpa mosqokusqan runamanta Daniel willakuspanqa, manam ninchu Gran Bretañawan Estados Unidos nacionkuna Roma nacionta puchukachinanmantaqa, aswanqa nin Roma nacionmanta lloqsinanta. Nirqam moqonmanta chakinkama fierromanta kasqanta hinaspa dedonkunapas. (Chakinkunawan dedonkunañataqmi kasqa fierrowan hinaspa mituwan chaqrusqa.)a Kaymi qawachin fierro moqonmanta Gran Bretañawan Estados Unidos lloqsimunanmanta. Chaynamá karqa, Roma nacion kamachichkaptinmi, 1700 kaq watakunapa tukuyninta Gran Bretaña nacionqa ancha atiyniyoq kayta qallaykurqa. Chaymantañam Estados Unidos nacionpas ancha reqsisqa kayta qallaykurqa. Ichaqa, manaraqmi Bibliapa willakusqanman hinaqa, enteron Pachapi qanchis kaq kamachikuqqa rikurimurqaraqchu. ¿Imanasqa? Manaraqmi Gran Bretaña hinaspa Estados Unidos nacionkunaqa hukllawasqachu karqaku. Ichaqa enteron Pachapi punta kaq guerra kachkaptinmi hukllawakururqaku.
‘Diospa munaychakusqanpaq kaqkunaqa’ ñam Estados Unidos nacionpiqa kachkarqaña. Paykunam Diosmanta willakuytaqa Brooklyn, Nueva York lawmanta qawaqku (Mat. 13:36-43). Gran Bretaña nacionpipas hanaq pachaman rinankupaq suyakuyniyoq cristianokunaqa Diosmantam willakuchkarqaku. Enteron Pachapi punta kaq guerrapim, Gran Bretañawan Estados Unidos nacionkunaqa hukllawakururqaku contranpi kaq nacionkunata atipanankupaq. Chaymantapas “warmipa” mirayninkunapa contranpim hatarirurqaku, qellqankunata qechurqaku hinaspa Diosmanta willakuypi punta apaqkunatapas presocharqaku (Apo. 12:17).
Chaynaqa, Bibliapa willakusqanman hinaqa manam enteron Pachapi qanchis kaq kamachikuqqa rikurirqachu, 1700 watakuna tukuyta Gran Bretaña nacion atiyniyoq rikuriruptinqa, aswanqa Señorpa punchawnin qallaykusqan tiempopim.b
[Willakuykuna]
a Fierrowan chaqrusqa mituqa tupanmi Gran Bretañawan Estados Unidos nacionkunapa kamachisqan runakunawan. Tiempopa risqanman hinam chay ‘mituqa’ otaq runakunaqa sasacharqaku chay nacionkuna atiyniyoq kay munasqankuman hina mana kanankupaq.
b Kay yachachikuymi Las profecías de Daniel libropa, 57 paginanpi, 24 parrafonpa nisqanpa rantinpi kanqa, chaynataq 56 hinaspa 139 paginakunapi tarikuq dibujokunapa rantinpipas.
[19 kaq paginapi foto]
Diospa llaqtanpi punta apaq 8 iñiqmasinchikkunatam 1918 watapa junio killapi presocharurqaku