Tukuy rikchaq runakunam salvakunqaku
1. ¿Imamantam dependen Dioswan allinpi kananchikpaq?
1 Ancha kuyakuyninpim Jehová Diosqa, salvaq ñanta kicharin, Payqa munanmi “llapallan runakuna salvakunankuta hinaspa cheqap yachachikuy reqsinankuta” (1 Tim. 2:3, 4). Dioswan allinpi kananchikpaqa manam yuraq, yana, qello kaymantachu, nitaq allin reqsisqa kaymantachu, tukuy rikchaq ruray atiq kaymantachu, otaq allin rikchayniyoq kaymantapaschu, aswanqa Jesuspa wañukusqanpi iñisqanchikmantam (Juan 3:16, 36). Jehová Diosta yanapaqkuna hina, manam sonqonchikpi cheqnipakunachu Diospa chaskisqan runakunataqa.
2, 3. ¿Imam yanapawasunchik runakunapa hawallanta qawaspa mana juzgananchikpaq?
2 Ama juzgasunchikchu. Jehová Diosqa runakunapa sonqonpi allin kaqtam qawan, mana sayapakuspa (1 Sam. 16:7). Jehová Diosqa yachanmi imayna runa kanantapas. Chayrayku payta kusichiy munaqkunataqa achkata kuyakun (Ageo 2:7). ¿Dios hinachu huk runakunata qawanchik?
3 Serviciopiqa tarichwanmi millakunapaq hina runakunata. Lata pachayoqpaschá kanman, otaq mana allin pachasqapas, qacha saprayoqpas, otaq senqanpi siminkupipas anilloyoq. Wakinqa mana wasiyoqpaschá. Wakinqa mana allintapaschá tratawasunchik. Manam ninanchikchu, kay runakunaqa manam haykapipas Jehová Diosta yupaychanqakuchu nispaqa, aswanqa qawasunchik Diosta yupaychanankupaq hina, “ñawpaqtaqa ñoqanchikpas karqanchik mana yuyayniyoqmi hinaspa mana kasukuqmi, pantaypi” (Tito 3:3). Chayrayku llapa runakunamanmi predicasunchik, ama hawallanta qawaspachu ninanchik kay runaqa manam Diospaq hinachu nispaqa.
4, 5. ¿Imatam yachanchik Jesús hinaspa Pablopa rurasqankumanta?
4 Punta kaq siglopi ejemplokuna. Jesucristoqa tiempotam qokurqa huchasapa runakunata yanapananpaq (Luc. 8:26-39). Mana allin ruraykunata cheqnispapas, yacharqam imayna runakunaqa mana allin ruraykunawan intuchikusqankuta (Luc. 7:37, 38, 44-48). Chayrayku kuyakuq sonqoyoq kaspa “llakipayarikurqa paykunamanta mana michiqniyoq ovejakuna hina kaptinku” (Mar. 6:34). ¿Ñoqanchikqa qatikuchwanchu paypa ejemplonta?
5 Apostol Pablotapas rumiwan choqaparurqaku, maqarurqaku hinaspa carcelarqaku (Hech. 14:19; 16:22, 23). ¿Piñakurqachu kayna ñakarisqanmanta?, ¿wakin nacionkunawan ayllukunawanpas tiempoyta usuchichkani nirqachu? Manam. Payqa yacharqam llapa ayllukunapi allin sonqoyoq runakuna kasqanta, paykunatam tariytapuni munarqa. ¿Chaynatachu qawanchik llaqtanchikpi llapa runakunata, maymantaña kaptinpas, imayna kawsayniyoqña kaptinkupas?
6. Congregacionpi huñunakuyman chayllaraq hamuqkunaqa, ¿imaynatam qawarinqaku sumaq chaskisqanchikta?
6 Runakunata kusikuywan chaskisunchik. Achkam Diospa llaqtanpi kaqkunaqa kusikunku, congregacionpi wawqe-panikuna kuyakuywan chaskisqankumanta, mana paykunapa trasallanta qawaspanku. Huk qari Alemania nacionpi qacha saprayoq, rikrankama chukchayoq hinaspa qacha pachayoq Salón del Reinoman yaykurusqa. Mana allin ruraq runa hinaña reqsisqa kaptinpas, huñunakuypim sumaqta chaskisqaku. Chaywan anchata admirakuspam, hatiqnin semanata kutimusqa. Pisi tiempollapi millakuypaq trasantapas tikraykusqa, pitaytapas saqerusqa hinaspa uywanakusqan warmiwanpas casarakuykusqa. As tiempollapi chay warmi-qariwan wawankunawan huñulla ayllu hina Jehová Diosta servichkarqaku.
7. ¿Imaynatam ñoqanchikpas, Diosninchik hina mana pimanpas sayapakuq kachwan?
7 Mana pimanpas sayapakuq Diosninchik hina, ñoqanchikpas llapa runakunata invitasunchik Diospa ancha kuyakuyninta chaskikunankupaq.
[3 kaq paginapi suti rikuylla kaq willakuy]
“Diosqa manam pimanpas sayapakunchu, payqa chaskinmi lliw nacionkunapi payta kuyaspa manchakuywan allin ruraq runakunataqa” (Hech. 10:34, 35).