Jehová Diospa punchawninqa hichpaykamuchkanñam
1 Cristianokunaqa Jehová Diospa punchawnin chayamunantam suyachkanku, chaypiqa kay pachapi mana allin ruraykunam puchukanqa. Chay punchawmi qallarinqa allin arregloyoq mosoq allpa (2 Ped. 3:12, 13). Chay punchaw haykapi chayamunanta mana yachaspanchikmi, qawan-qawanllam kananchik hinaspa hukkunatapas chayna kanankupaqmi yanapananchik (Eze. 33:7-9; Mat. 24:42-44). Diospa Palabran profeciakunapi yuyaymanaymi kallpanchawasunchik ‘Jehová Diospa hichpaykamuq castiganan punchawta’ suyananchikpaq (Sof. 1:14).
2 Kay pachapi munaychakuq gobiernokuna. Apócalipsis 17:9-11 ‘qanchis reykunamanta’ apóstol Juan willan, kaykunaqa tupan entero pachapi qanchis munaychakuqkunawanmi. Willallawanchikpas ‘pusaq kaq reymanta’, kayqa tupan kay punchawpi Naciones Unidas nisqawanmi. ¿Suyasunchikraqchu entero pachapi munaychakunanpaq hukkunaraq rikurimunanta? Manam, pusaq kaq reyqa ‘wañuymanmi richkan’,nispam Bibliaqa willan, paypa qepanmanqa manañam huk reymantaqa willanchu. ¿Kay profeciaqa musyachisunkichu ima tiempopi kawsasqanchikta?
3 Daniel 2:31-45 masta entiendechiwanchik Jehová Diospa punchawnin chayamunanmanta. Chay profeciapi Nabucodonosorpa mosqokusqan hatunkaray runaqa tupan, kay pachapi munaychakuq hatun gobiernokunawanmi. Llapallanku rikuriramunkuña. ¿Mayqan kaq reypa munaychakusqanpimá kawsachkanchik? Hatunkaray runapa chakinpim. Profeciaqa willanmi imam pasanqa qatiqninpi: llapa gobiernokunam chinkanqaku ñutupaspa kaspanku ‘mana tuñichiy atina gobierno’ hatarikunanpaq. ¿Kunanqa musyankiñachu Jehová Diospa punchawnin hichpaykamusqanta?
4 Astawan pruebakuna. Achka pruebakunatam qawachkanchik Jehová Diospa punchawnin hichpaykamusqanmanta. Ejemplopaq, qawachkanchikmi ‘tukupay tiempokunapi’ imayna runakuna kasqanmanta apóstol Pablo willasqanman hina cumplikusqanta (2 Tim. 3:1-5). Hinaptinpas willachkanchikmi enterollan kay pachapi Reinomanta llamkaypi, manaraq tukupay punchaw chayamuchkaptin (Mat. 24:14). Chaynaqa, servicionchikpiyá qawachisunchik utqayta willasqanchikta angelpa nisqanman hina: “Diostayá manchakuywan alabaychik, juzganan horam chayaramunña”, nispa (Apo. 14:6, 7).