Yachachisqaykita sutillata qawachinaykipaq

ALLIN yachachiqkunaqa imamanta yachachinankupaq kaqpim allinta reparanku. Chaymi preparakuspankuqa kallpanchakunku huk yachachikuyllamanta allinta yachachinankupaq. Chaynata yachachiptinkum uyariqninkuna allinta entiendenku. Imamanta yachachisqayki aswan allin kaq yachachikuykunawan tupaptinqa uyarisuqnikikunam allinta entiendenqaku.

Wakin yachachikuykunapiqa imamantapas achkanpim yachachin, chaymi discurso qoqqa allinta tanteanan titulowan tupaq kaq yachachikuyllamanta yachachinanpaq. Ejemplopaq: Diospa Gobiernonmanta yachachispaqa rimawaqmi “Cheqappuni kasqanmanta” otaq “Enteron Allpa pachata huertayachinanmanta”. Bibliamanta yachachispapas rimawaqmi “Diospa chuya espiritunwan qellqachisqa kasqanmanta” otaq “Kay tiempopipas allinta yanapawasqanchikmanta”. Kawsarimuymanta yachachispañataqmi rimawaq “Llakisqa tarikuqkunata kallpanchasqanmanta” otaq “Qatikachasqa kaptinchik iñiyninchikpi suni kanapaq kallpanchawasqanchikmantapas”. Chaykunamanta yachachinapaqqa imamanta kasqanman hina reparaspam yachachina.

Enteron Bibliapi imamanta yachachisqanman hinam Jesucristoqa yachachirqa ‘Diospa munaychakuyninqa otaq gobiernonqa hichparamusqanmanta’ (Mat. 4:17). ¿Imaynatam chayta rurarqa? Mateo, Marcos, Lucas hinaspa Juan sutiyoq librokunapim 110 masnin kutita willan Diospa Gobiernonmanta. Jesucristoqa manam rimayllachu-rimarqa munaychakuynin otaq gobiernon niq palabrakunamantaqa. Yachachisqanpipas chaynataq milagrota rurasqanpipas sutillatam qawachirqa gobiernananpaq Diospa nombrasqan Cristo kasqanta. Jesusqa qawachirqataqmi paynintakama wakin runakunapas paywan gobiernananpaq akllasqa kasqankuta chaynataq imayna runakuna kanankumantapas. Yachachisqanwanmi chaynataq milagrokunata rurasqanwanmi sutillata qawachirqa Diospa Gobiernonqa runakunata imayna yanapasqanmanta. Diospa atiyninwan demoniokunata qarqosqanwantaqmi Jesusqa qawachirqa Taytanpa Gobiernonqa runakunawanña kasqanta (Luc. 11:20). Chaymi qatiqninkunata kamachirqa chay Gobiernomanta willakunankupaq (Mat. 10:7; 24:14).

Imamanta yachachikuy kasqanman hina titulonta qellqay. Mayqen yachachikuymantapas yachachispaqa titulonpa nisqanman hina yachachiy.

Imamanta yachachisqaykipa titulonta kikiki akllanayki kaptinqa reparay uyarisuqnikikunata discursoyki imayna yanapasqanpi. Chayman hina akllay aswan allinnin kaq yachachikuykunata hinaspa bosquejoykipi qellqay.

Yachachinaykipaq kaq tituloyoqña kaptinqa kallpanchakuy imamanta yachachisqanta entiendenaykipaq chaynataq uyarisuqnikikunata imayna yanapananpaq kasqanpipas. Preparakuspaykiqa allinta tanteay yachachinaykipaq kaqkunallata akllanaykipaq. Yachachinaykipaq kaq qellqasqaña kaptinqa titulonwan tupasqanman hina yachachinaykipaq kallpanchakuy. Chaymantapas reparay uyarisuqnikikunata imayna yanapasqanpi chayman hina mayqen yachachikuymantapas astawan entiendechinaykipaq.

Imaynatam astawan entiendechiwaq. Imamanta yachachisqaykita entiendechinaykipaq kaqkunallata servichikuy hinaspa kay libropi yachachikuyman hina bosquejoykita ruray. Chaynata preparakuspaqa imamanta yachachisqaykitam allinta entiendechinki.

Imamanta yachachisqaykita yapa-yapamanta rimasqaykiqa allintam entiendechin. Takiqkunapas takisqankuman hinam wakin takikunapiqa yapa-yapamanta takinku imamanta takisqankuta entiendechinankupaq. Wakinpiqa manam hina kaq palabrakunallawanchu aswanqa imamanta takisqanman hinam huk palabrakunawanpas entiendechinku. Chaynallataqmi discursota qoqpas imamanta yachachisqanta entiendechinanpaqqa yapa-yapamanta rimanan yachachisqanwan tupaq palabrakunata. Chaynata yachachiptinqa imamanta yachachisqantam uyariqninkunaqa yuyanqaku.

Chaynataqa rurachwan manam huñunakuypi yachachispallachu, predicaspapas chaytaqa rurachwanmi. Piwanpas rimaspaqa otaq Bibliamanta estudiachispapas imamanta yachachisqanchikta yuyanankupaqmi yapamanta rimana. Yachachisqaykipi entiendechinaykipaq kaqkunallata allinta akllaspaqa discursota qospapas otaq Bibliamanta estudiachispapas Diospa Palabranmanta yachachinki.