Sumaqllata consejanankupaq

ANCIANOKUNAQA kallpanchakunankum “allin kaqkunata yachachispa” iñiqmasinkunata consejanankupaq, astawanraqmi mana kasukuq kaptinkuqa (Tito 1:9). Chaytaqa rurananku Diospa yachachisqanman hinam, Bibliam nin: ‘Diospa Palabranta leespayá kallpanchay otaq consejay’, nispa (1 Tim. 4:13). Ancianokunapaq kay yachachikuy kaptinpas, yanapanmantaqmi anciano kay munaqkunata, tayta-mamakunata chaynataq Bibliamanta estudiachiqkunatapas estudiantenkuta sumaqllata consejanankupaq.

Imaynanpi consejanapaq. Bibliapi ejemplokunam yanapawasun imaynanpi otaq imakuna pasaptin consejanapaq. Apostol Pedrom ancianokunata kallpancharqa Diospa ovejankunata tukuy sonqonkuwan cuidanankupaq (1 Ped. 5:1, 2). Apostol Pablopas Titotam kallpancharqa: ‘Mozokunata rimapayay allin piensaq kanankupaq’, nispa (Tito 2:6). Iñiqmasinkunatapas ‘huk pensamientoyoqlla’ kanankupaqmi consejarqa, consejarqataqmi rakinachiq kaqkunawanqa ama juntakunankupaq (1 Cor. 1:10; Rom. 16:17; Filip. 4:2). Tesalonica llaqtapi kaq iñiqmasinkunatapas allin kaqkunata rurasqankumantam alabaykurqa, ichaqa consejarqam Diospa yachachikuyninkunata astawanraq kasukunankupaq (1 Tes. 4:1, 10). Pedroñataqmi iñiqmasinkunata ruegarqa: “Amayá ruraychikchu aychaykichikpa mana allin munasqankunataqa”, nispa (1 Ped. 2:11). Judaspas iñiqmasinkunatam consejarqa ‘iñisqankuta defiendenankupaq’ wakin iñiqmasinkuna qanra vidapi kawsasqankurayku (Jud. 3, 4). Llapan iñiqmasinkunatapas consejarqam: “Sapa punchawyá kallpanchakuychik chaynapi mayqannikichiktapas hucha engañaptin sonqoykichik ama rumiyarunanpaq”, nispa (Heb. 3:13). Pedropas Cristopi manaraq iñiq judiokunatam consejarqa: “Librakuychik kay huchallikuq runakunamanta”, nispa (Hech. 2:40).

Ejemplokunapi qawamusqanchikman hina, ¿imaynatataq consejachwan chaylla kasukunankupaq? ¿Imaynatam rurachwan mana kamachispalla otaq mana obligaspalla?

“Kuyakuywan.” Mana kuyakuywan consejasqaqa hukmanyarunmankum (Filem. 9). Imapaqpas chaylla kasukunankupaq kaptinqa discurso qoqmi imayna rimasqanwan chayta sutillata qawachinan, mana uyarikuqta otaq sumaqchallata rimaptinqa disculpakusqanpaqmi piensanmanku. Ichaqa tukuy sonqowanmi sumaqllata consejanan chaynata ruraptinkuqa uyariqninkunam kasukunqa. Apostol Pablom kikinmanta chaynataq compañaqninkunamanta rimaspan Tesalonicapi kaq iñiqmasinkunaman nirqa: ‘Yachankichikmi imaynatam taytaqa churin rimapayasqanta, chaynam ñoqaykupas qamkunata kallpanchaykiku’, nispa (1 Tes. 2:11). Paykunaqa kuyakuywanmi iñiqmasinkuta kallpancharqaku, chaynatam kay tiempopi ancianokunapas uyariqninkunata tukuy sonqonkuwan kallpanchananku.

Pitapas ama hukmanyachispalla kasukunanpaq sumaqllata consejay, ichaqa mana manchapakuspam ‘Diospa munasqanmanta willanayki’ (Hech. 20:27). Llampu sonqoyoq kaqkunaqa manam hukmanyanqakuchu nitaq piñakunqakuchu sumaqllata consejaptikiqa (Sal. 141:5).

Imatapas manaraq nichkaspa uyarisuqnikikunata tukuy sonqoykiwan kallpanchay allin rurasqankumanta. Reparay iñisqankurayku rurasqankupi, kuyakuywan kallpanchakusqankupi chaynataq sasachakuykuna aguantasqankupipas, chayna rurasqankuqa Jehova Diospa agradonpaqmi (1 Tes. 1:2-8; 2 Tes. 1:3-5). Chaynata ruraptikiqa cuentatam qokunqaku kuyapayasqaykimanta chaynataq valorasqaykimantapas, chaynaqa consejasqaykita allinta uyarinankupaqmi yanapanqa.

“Pacienciawan.” Consejanaykiqa ‘pacienciawanmi’ (2 Tim. 4:2). ¿Ima ninantaq chayqa? Mana allin kaqkunata otaq nanay simiwan rimasqankuta aguantaymi. Pacienciakuqqa manam iskayrayanchu consejasqanta uyariqninkuna kasukunankumantaqa. Uyariqninkunapas manam piensanqakuchu qalaypaq mana kasukuq kasqankupaqqa. Jehova Diosta servinankupaq kallpanchakusqanpi reparaq ancianoqa sumaqllatam yachachin (Heb. 6:9).

‘Allin kaqkunamanta yachachispa.’ ¿Imaynatam ancianoqa ‘allin kaqkunamanta yachachinman’? Diospa ‘cheqap yachachikuyninkunaman’ hina yachachispanmi (Tito 1:9). Piensasqaykiman hina yachachinaykimantaqa Bibliapa nisqanwan consejay, chaynata yachachispaqa kallpanchankim imayna tanteakunankupaq. Diosta kasukuptinkuqa bendecisqa kanankuta qawachiy. Qawachiytaq mana kasukuptinkuqa kay tiempopipas chaynataq hamuq tiempopipas vidanku imayna kananta, chaynata piensarichispa kallpanchay Diosta kasukunankupaq.

Uyarisuqnikikunaman allinta entiendechiy imata ruranankupaq chaynataq imanasqa ruranankupaq kasqanta, qawachiytaq yachachisqaykiqa Bibliapa nisqanman hina kasqantapas. Sapakama tanteakunapaq Dios saqewaptinchikpas sutillata qawachiy ima ruraykuna mana allin kasqanta. Yachachisqaykipa tukupayninpipas uyarisuqnikikunata hinalla kallpanchay kasukunankupaq.

‘Confianzawan’ rimay. Consejasqayki allinta yanapananpaqqa ‘iñiyniki’ imayna kasqantam sutillata qawachinayki (1 Tim. 3:13). ¿Imaynatam iñisqaykita qawachiwaq? ‘Ima rurasqaykipipas allin ejemplo’ kaspam (Tito 2:6, 7; 1 Ped. 5:3). Cristota qatipakuspa ejemploykiwan yachachiptikiqa kallpanchasqam tarikunqaku consejasqaykiman hina kasukunankupaq (1 Cor. 11:1; Filip. 3:17).

Diospa yachachisqanman hina sumaqllata consejaspaqa kasukunankupaqmi kallpanchanki. Chaynata consejanaykipaqmi anchata kallpanchakunayki (Rom. 12:8).