Diospa Munaychakuynin suyakuymanta willakusunchik
1 Kay sasallaña tiempokunapim achkaq runakuna mana ima suyakuyniyoq kawsanku (Efe. 2:12). Hukkunañataqmi confiakunku kapuqninkupi, gobiernaqkunapi otaq runakunapa yachachisqankunapi ichaqa manamá kaykunaqa yanapanmanchu hamuq tiempopi hawkalla kanankupaqqa. Ñoqanchikpa suyakuyninchikmi ichaqa “lamar qochapa patanpi bote watasqa hinam confianzanchikqa almanchikta takyachin”. ¡Mayna kusikunapaqmá kayqa! (Heb. 6:19.)
2 Diospa Munaychakuyninmi kay Pachata paraisoman tikranqa. Chaypim kuyasqanchik ayllukunapas kawsarimunqaku (Hech. 24:15). Wakchayaypas, mana allin ruraypas, onqoypas, machuyaypas chaynataq wañuypas tukunqam (Sal. 9:18; Mat. 12:20, 21; Apo. 21:3, 4). Chayllañam kaykuna chaynataq wakin prometesqankunapas cumplikunqa. ¿Mayqen prometesqankunatataq astawan suyanki?
3 Allin noticiakunaqa willakunapaqmi: Diospa munaychakuyninmanta suyakuytaqa, ¿kikillanchikpaq munaspachu runamansinchikkunamanqa mana willanchikman? Diosta chaynataq runamasinchikta kuyasqanchikmi kallpanchawanchik Jesus hina ‘wakchakunaman allin noticiata willanapaq, [...] presochasqa kaqkunaman willaspa libranapaq, ñawsakunata qawarichinapaq, ñakarichisqakunata libranapaqpas’ (Luc. 4:18). Apostol Pablopas plazakunapi chaynataq maylawpipas runapa kasqanpiqa allin noticiamantam “mana samaykuspa” Diospa palabranmanta willakurqa (Hech. 18:5). Chayna rurasqanta qatikuymi suyakuyninchik mana chinkananpaq cuidawasunchik ‘kay pachapi kaqkunamanta sinchita preocupakuspa kapuqniyoq kayllapi kusikuy tarinamanta’ (Mar. 4:19).
4 Diospa Munaychakuyninmanta willakusqanchikta mana uyariwaptinchik otaq contranchikpi churakuptinkupas suyakuyninchikqa manam chinkanqachu chaymi ‘confiakunapaq kachkaptinqa ama maylawmanpas muyuruspa willakusqanchik confianzapi takyasunchik’ ‘mana penqakuspa Jesucristomanta allin noticiata willakuspa’ (Heb. 10:23; Rom. 1:16). Chaymi kallpanchakuspa hinalla predicaptinchikqa pipas piensasqanta cambiaruspanqa uyariwanchikmanmi.
5 Kay pachapi mana allin kaqkunamanta hinaspa Bibliapa willakusqanman hina cumplikusqanmanta willakuypas allinmi kanman ichaqa manamá runakuna puchukanankupaqchu kaykunataqa willakunchik. Aswanqa kallpanchakunchikmi runamasinchikman Diospa gobiernonmanta allin noticiakunata willaypi. Chaynaqa kusisqayá kay allin noticiata predicasunchik ‘chaynapi suyasqanchikta chaskinanchikpaq’ (Heb. 6:11).