Llakisqakunata consuelanapaq
1 Manam haykapipas runakunaqa kunan tiemponchikpi hinaqa consuelanata necesitarqakuchu. Chaymi, Jesucristopa ejemplonta qatiqkunaqa kallpanchakunchik ‘llakisqakunata consuelanapaq’ (Isa. 61:1).
2 Imamanta predicanapaq: Runakunata predicasqanchik consuelananpaqqa, rimasqanchikmi kallpanchaq hinaspa allinkunamanta kanan. Kay pachapi mana allinkuna pasasqanmanta hinaspa pantasqa yachachikuykunamanta mana anchata rimaspaqa, sutillatam qawachisun Bibliapa cheqap yachachikuyninkunata hinaspa Diospa prometesqan sumaq suyakuymantapas. Kaywanqa manam nichkanchikchu, Armagedonmanta manaña rimananchiktachu. Llamkayninchikqa Jehová ‘Diospa agradonpaq watamanta willakuymi, chaynataq yupaychasqanchik Diospa vengakunan punchawmanta willakuypas’. Ichaqa, Armagedonmanta chaynataq imayna kananmanta rimasqanchikqa manam harkananchu Diospa munaychakusqanmanta kay allin noticia willakusqanchik entiendekunanta (Isa. 61:2; Eze. 3:18; Mat. 24:14).
3 Wasin-wasin rispa: Manam sasachu ñakariq runakunata tariyqa, ñakarichkankum onqoywan, ayllunku wañukuptin, mana allinta ruraruptinku otaq qollqemantapas. Jesusmi llakisqallaña warmita ‘qawaspan llakirikurqa’, chaynam Jehová Diosta serviqkunapas llakipayananku predicasqan runakunata (Luc. 7:13; Rom. 12:15). Runakunapa sasachakuyninpaq hina hukta otaq iskay textota leepuspanpas, ‘chaylla uyariqmi kanan’ hinaspam runapa nisqanta uyarinan (Sant. 1:19). Chaynapim, puntata allinta uyarispan atinqa consuelo qoyta.
4 Chaymantañataq allin kaptinqa, kaynata ninman: “Allin kallpanchaq rimaykunamantam leeykapuyta munayman Bibliapi”, nispa. Allinmi yachayniyoq kayqa ichaqa manam allinchu kanman pantasqa yachasqanmanta niwaptinchik mana allin kasqanta chaylla qawachiyqa. Aswanmi Bibliata servichikuspa kallpanchananchik hinaspa consuelananchikpas. Chaypaqmi allin yanapakuykunata tarinki Razonamiento a partir de las Escrituras nisqa libropa 144-148 paginankunapi “Estímulo” niq yachachikuypi. Chaymantapas qowaqmi Diospa amigon kaytaqa atichwanmi nisqa folletota hinaspa estudiawaqmi kay folletopa yachachisqanmanta.
5 Kallpanchakuy consuelanaykipaq: ¿Kanmanchu consuelota necesitaq aylluyki, vecinoyki, llamkaqmasiki otaq estudiaqmasikipas? ¿Imanasqataq mana kallpanchakunkichu watukuspayki Bibliawan consuelota qoykunaykipaq? Imapas llakichisqanta yachaspaykiqa, chayman hinachá preparakunki. Wakin wawqe-paninchikkunam cartata qellqanku otaq telefonowanpas qayanku. Imaynata ruraptinchikpas, runamasinchik kuyasqanchikmi yanapawasun llakipayanapaq hinaspa Bibliawan consuelanapaqpas (Luc. 10:25-37).
6 Predicasqanchikmantapas, kallpanchananchikmi hukmanyasqakunata hinaspa llakisqakunatapas, chaynataq hamuq tiempopi sumaq kawsakuymantapas yachachinanchiktaqmi. Kayna consuelanatam necesitanku maypi kaq runakunapas. Diospa prometesqankunamanta kusikuywan rimaspanchikmi, allin sonqoyoq runakunaman qosunchik consuelota hinaspa suyakuytapas. Amayá haykapipas qonqasunchu llakisqakunata consuelaytaqa.