¿Imanasqataq Bibliamanta yachananchik?
Enteron pachapi yaqa lliw runakunam Bibliayoq kanku. ¿Haykapipas leerqankichu kay suma-sumaq librota? Waranqantin watakunañam tukuy lawmanta runakuna yachachikuyninkunapi tarirqaku hawkayayta, suyakuytawan yanapakuytapas. Ichaqa achkam mana leenkuraqchu, hukkunañataqmi astawanraq yachayta munanku. Qampas yachayta munaptikiqa, kay folletom allinta yanapasunki.
ALLINMI kanman Bibliata manaraq leechkaspayki kaykunamanta yachayniki: Bibliapiqa otaq Diospa Palabranpiqa 66 librokunam kan. Punta kaq librom Genesis, tukuynin libroñataq Revelacion otaq Apocalipsis.
¿Pitaq Bibliata qellqachirqa? Chayqa allin tapukuymi. Bibliapi 66 librokunataqa yaqa 40 runakunam qellqarqaku yaqapas 1.600 watakunapi. Ichaqa manamá mayqanninkupas nirqachu kikinkumanta Bibliata qellqasqankutaqa. Aswanraqmi huknin qellqaq nirqa: “Bibliapi llapallan qellqasqa kaqkunaqa Diospa Espiritunpa qosqanmi”, nispa (2 Timoteo 3:16). Hukninpas nirqam: “Tayta Diospa Espiritunmi ñoqantakama rimarirqa. Tayta Diospa palabrallanmi simillaypipas tarikurqa”, nispa (2 Samuel 23:2). Qawasqanchikman hinaqa, Biblia qellqaqkunaqa reqsikurqakum Bibliata qellqachiqqa Llapallan kamachiq Jehová Dios kasqanta. Niwanchiktaqmi reqsinanchikta Dios munasqantapas.
Ancha allintaqmi Biblia imamantapuni yachachisqanta yachayqa: Diosmi hanaq pachapi huk gobiernota churanqa, chaynapi kamachinanpaq derechonta lliw runakuna reqsinankupaq. Kay folletopa qatiqnin paginankunapim qawanki Genesismanta Apocalipsis librokama Bibliaqa chay gobiernomanta rimasqanta.
Kallpanchaykikum chay yachachikuypi piensaspa Bibliapa nisqankunata estudianaykipaq.
a Tiempokunamanta rimaspam kay folletopi nisun, cristianokunapa tiemponmanta ñawpaqtaraq (c.t.ñ.), chaynataq cristianokunapa tiemponpi (c.t.), nispa. Kaytam sapa paginapa ura patanpi uchuy letrachakunawan pisi rimayllapi qellqasqata tarinki.