Allin yachachiq kanaykipaq kallpanchakuy
¿IMANASQATAQ yachachiyta munanki? Diospa Gobiernonmanta chayllaraq willakuq kaspaykiqa munankipaschá Bibliamanta imayna yachachiyta, Jesucristom qatiqninkunaman kamachirqa chayta ruranankupaq (Mat. 28:19, 20). Unayña predicaq kaspaykiqa munankipaschá allinta yachachispa Bibliata estudiachisqayki runakunapa sonqonman chayayta. Tayta-mama kaspaykipas munankipaschá Diosman qokunankupaq hina wawa-churikikunaman yachachiyta (3 Juan 4). Anciano kaspa otaq anciano kayta munaspaykiqa Jehova Diosta hatunchanankupaq chaynataq kamachikuyninkunata kasukunankupaq hinachá allin yachachiq kayta munanki. Chaynaqa, ¿imataq yanapasunkiman allin yachachiq kanaykipaq?
Allin Yachachiq Jesucristota qatipakuy (Luc. 6:40). Achka runakunaman chaynataq ñanpi tupasqan runakunaman imayna yachachisqanqa sonqonkumanmi chayarqa. Jesusqa runakunatam piensarichirqa, entiendechirqataqmi yachachisqankuna vidankupi imayna yanapasqanmantapas. ¿Chaynatachu qampas yachachiwaq?
Jehova Diospi confiay
Jesusqa allin yachachiqmi karqa Taytanwan amistadnin allin kasqanrayku chaynataq chuya espiritun yanapasqanrayku. ¿Tukuy sonqoykiwanchu Jehova Diosta mañakunki Bibliamanta allin yachachiq kanaykipaq? Wawa-churiyoq kaspaykiqa, ¿sapa kutichu imaynata yachachinaykipaq mañakunki? ¿Tukuy sonqoykiwanchu mañakunki discursoykita preparakunaykipaq chaynataq huñunakuykunata ruranaykipaqpas? Jehova Diospi confiakusqaykim allin yachachiq kanaykipaqqa yanapasunki.
Jehova Diospi confiasqanchiktaqa qawachinchiktaqmi Palabranpipas confiaspa. Jesusmi huk tutallaña wañukunanpaq kachkaptin Taytanta kaynata mañakurqa: ‘Ñoqaqa ñam Palabraykita willaruniña’, nispa (Juan 17:14). Allin yachayniyoq kaspanpas manam kikinpa munasqanman hinachu yachachirqa aswanqa taytanpa munasqanman hinam, chaynata ruranapaqmi ñoqanchiktapas kallpanchawanchik (Juan 12:49, 50). Diospa Palabranqa atiyniyoqmi runakunapa piensasqankuta munasqankuta hinaspa rurasqankutapas cambiachinanpaq (Heb. 4:12). Bibliapa nisqanta astawan yachaspa chaynataq predicacionpipas allinta servichikuspaqa runakunamanmi allinta yachachisun Diosman asuykunankupaq (2 Tim. 3:16, 17).
Jehova Diosta hatunchay
Jesucristo hina allin yachachiq kanapaqqa manam allin discursokuna qoyllamantachu. Jesusqa ‘sumaqllaña nisqankunawanmi’ runakunata admirachirqa (Luc. 4:22). Ichaqa, ¿imanasqataq chaynata yachachirqa? Manam kikin hatunchakunanraykuchu aswanqa Jehova Diosta hatunchananraykum (Juan 7:16-18). Chaymantapas discipulonkunamanmi kaynata nirqa: “Achkichkaq mechero hina kaychik runakunapa qayllanpi chaynapi allin rurasqaykichikta qawaspanku hanaq pachapi kaq Taytaykichikta paykunapas alabanankupaq”, nispa (Mat. 5:16). Ñoqanchikpas Jehova Diosta alabanankupaqmi yachachinanchik. Chaymi imamanta hinaspa imaynata yachachinapaqqa tapukunanchik: “¿Jehova Diostachu alabanqaku icha kikiytachu?”, nispa.
Rikchanachiykunawan hinaspa experienciakunawan yachachiyqa allinmi, ichaqa chaykunata achkanpi servichikusqaqa imamanta yachachisqanchiktam yanqacharunman. Predicacionpi mana yanapaq willakuykunapas Diosmanta willakusqanchiktam yanqachanman. Chaynata rurasqaqa yachachiqtam alabanmanku manam Jehova Diostachu.
Imam allin otaq imam mana allin kasqanta qawachiy
Pipas Cristopa qatiqnin kayta munaqqa yachachisqanchiktam allinta entiendenan. Entiendenantaqmi cheqap yachachikuy mana cheqap yachachikuywan imanasqa mana tupasqantapas. Chaymi yachachispaqa qawachinanchik imam allin kasqanmanta chaynataq imam mana allin kasqanmantapas.
Jehova Diosqa imam agradonpaq kasqanmanta chaynataq imam mana agradonpaq kasqanmanta cuentata qokunankupaqmi llaqtanta sapa kutilla kallpancharqa (Lev. 10:9-11). Llaqtanpi yachachiqkunamantam nirqa ‘sapaqchasqa kasqanmanta chaynataq imakuna millakuypaq kasqanmanta’ yachachinankupaq (Ezeq. 44:23). Proverbios libropim qawachin allin kaqwan mana allin kaq mana tupasqanmanta otaq yachayniyoq kay mana yachayniyoq kaywan mana tupasqanmanta. Imapas qawasqanchik kaqlla kaptinpas manam chaynallachu. Apostol Pablom Romanos 5:7 nisqanpi qawachirqa allin ruraq runawan allin sonqo runaqa mana igualla kasqankuta. Hebreos libropipas qawachinmi Aaronpa rurasqanmantapas sacerdotekunapa jefen Jesucristoqa astawan allin ruraq kasqanta. Huk profesormi qellqarqa: “Yachachispaqa qawachinam imapas imapaq rurasqa kasqanta, imayna formayoq kasqanta hinaspa imayna rikurisqantapas. [. . .] Chaykunamanta entiendeqqa allintam yachachin”, nispa.
Diospa Gobiernonmanta piwanpas rimasqaykipi reparay. Mana entiendeptinqa qawachiy Bibliapa yachachisqanwan Diospa Gobiernonqa runakunapa sonqonpim kachkan nisqankuwan mana tupasqanta otaq qawachiwaqmi Diospa Gobiernonqa runakunapa gobiernonwan mana tupasqantapas. Uyarisuqniki kay yachachisqaykita ña yachaptinqa astawanmi yachachiwaq Salmo 103:19 nisqanman hina Jehova Dios llapallan unanchasqanpi munaychakuq kasqanwan Cristopa Gobiernon mana tupasqanmanta, otaq willawaqmi Colosenses 1:13 nisqanpi ‘kuyasqan Churinpa munaychakusqanmanta’; willawaqtaqmi Efesios 1:10, NM nisqanpi “cuentallikuq” nisqamantapas. Imam allin kasqanmanta chaynataq imam mana allin kasqanmanta qawachisqaqa yanapanqam Bibliapa yachachisqanta allinta entiendenankupaq.
Jesuspas chaynatam yachachirqa. Qawachirqam Moisespa qellqasqan Leykuna imayna entiendesqanku Diospa piensasqanwan mana kaqlla kasqanta (Mat. 5:21-48). Qawachirqataqmi Diosman sonqo kaq runakunapa rurasqankuwan iskay uya fariseokunapa imayna kasqanku mana tupasqanta (Mat. 6:1-18). Chaymantapas qawachirqam tukuy sonqonkuwan Diosta serviq discipulonkunapa rurasqan ‘munaychakuq’ autoridadkunapa rurasqankuwan mana tupasqanta (Mat. 20:25-28). Huk kutipipas Jesusqa uyariqninkunamanmi qawachirqa santo tukuq runa huchanmanta wanakuqwan imapi mana chaynalla kasqanmanta musyakunankupaq (Mat. 21:28-32). Jesusqa qawachirqataqmi imatawan ruraspa allin yachachiq kanamantapas.
Uyarisuqnikikunata kallpanchay piensarinankupaq
Mateo 21:28 nisqanman hinam Jesusqa tupanachiykunawan rimayta qallarinanpaq kaynata nirqa: “¿Imaninkichiktaq?”, nispa. Allin yachachiqqa manam imamantapas willayllachu-willan otaq contestayllachu contestan aswanqa uyariqninkunatam piensarinankupaq kallpanchan (Prov. 3:21; Rom. 12:1). Chaypaqmi tapukuykunata servichikun. Mateo 17:25 nisqanmi qawachin imayna tapukuykunata Jesus rurasqanmanta: ‘¿Imaninkitaq Simon? ¿Pikunamantataq reykunaqa impuestota cobran? ¿Churinkunamantachu icha sapaq runakunamantachu?’, nispa. Chayna tapusqanwanmi Pedroqa cuentata qokururqa impuestota templopi pikuna pagananmanta. “¿Pitaq runamasiyqa?” nispan Jesusta huk runa tapuptinpas payqa piensarichinanpaqmi sacerdotepawan Leviy casta runapa chaynataq Samariamanta kaq runapa imayna kayninkumanta willaspa tapurqa: ‘¿Chay kimsan runamanta, mayqennintaq salteasqapa runamasin?’, nispa (Luc. 10:29-36). Tapusqankuta contestananmantaqa tapuqninkuna cuentata qokunankupaqmi Jesusqa piensarichirqa (Luc. 7:41-43).
Kasukunankupaq kallpanchay
Cheqap yupaychayqa manam Diosmanta yachayllachu nitaq wakin kamachikuyninkunaman hina kawsayllachu, chaymantam cuentata qokunku Diosmanta yachachiqkunaqa. Cheqap yupaychayqa Jehova Dioswan allin amistad ruraymi hinaspa tukuy sonqonchikwan kamachisqankunata kasukuymi (Deut. 10:12, 13; Luc. 10:25-27). Sonqomanta Bibliapi rimaspanqa rimachkanmi runapa munasqanmanta, sentimientonmanta hinaspa imanasqa imapas ruray munasqanmantam.
Jesusqa yacharqam runakunaqa rikusqankuman hinalla piensasqankuta, Jehova Diosmi ichaqa runapa sonqonta qawan (1 Sam. 16:7). Jehova Diostaqa servinchik kuyasqanchikraykum, manam runakunata admirachinanchikraykuchu (Mat. 6:5-8). Fariseokunam runakuna alabananrayku imatapas ruraqku. Paykunaqa kallpanchakuqkum Moisespa qellqasqan Leykunata hinaspa kikinkupa tanteasqanku kamachikuykunata kasukunankupaq, ichaqa manam Jehova Diospa kamachisqanman hinachu kawsarqaku (Mat. 9:13; Luc. 11:42). Jesusmi yachachirqa Jehova Diospa kamachisqankunata tukuy sonqonchikwan kasukuyqa ancha allin kasqanta (Mat. 15:7-9; Mar. 7:20-23; Juan 3:36). Jesusta qatipakuspaqa allintam uyariqninchikkunata yanapasun. Jehova Diosta imayna servinankumanta yachachispaqa yachachinataqmi reqsinankupaq hinaspa kuyanankupaqpas, chaynapim qawachinqaku imayna kawsasqankuwan paywan amistadninku chaninchasqankuta.
Chay yachachikuykunawan yanapachikunankupaqqa imayna kawsasqankutam qawarikunanku. Jesusmi uyariqninkunata kallpancharqa imanasqa imapas ruray munasqankuta hinaspa imayna tarikusqankuta qawarikunankupaq. Imamantapas corregispanqa tapuqmi imanasqa chayna piensasqankumanta, rimasqankumanta chaynataq rurasqankumantapas. Ichaqa manam tapuyllachu-tapurqa aswanqa rikchanachiykunawanmi hinaspa cuentata qokunankupaq willakuykunawanmi yachachirqa (Mar. 2:8; 4:40; 8:17; Luc. 6:41, 46). Qampas uyarisuqnikikunatam kallpanchawaq imayna kasqankuta qawarikunankupaq kayna tapukuykunawan: “¿Imanasqataq kayna kawsayta munani?”, “¿Imanasqataq imapas pasaptin kayna tarikuni?”, nispa. Chaymantapas Jehova Diospa munasqanman hina kawsanankupaq kallpanchay.
Imapi yanapasqanta qawachiy
Allin yachachiqqa cuentatam qokun ‘imamantapas puntataqa yachayniyoq’ kay allin kasqanmanta (Prov. 4:7). Yachayqa yanapawanchikmi ima sasachakuytapas atipanapaq, peligrokunamanta cuidakunapaq, imata ruranapaqpas otaq runamasinchikta yanapanapaqpas. Chaykunata imayna rurananpaqmi yachachiqqa Biblia estudiaqman yachachin ichaqa manam paypa rantinpiqa tanteanchu. Bibliapa consejasqankunamanta yachachispaqa estudiaqtam tapuna chay yachasqankuna vidanpi imayna yanapasqanmanta piensarinanpaq (Heb. 5:14).
Pentecostes 33 kaq watapim discursota qospan apostol Pedro chaynata yachachirqa, chaymi achka runakuna vidankuta cambiarqaku (Hech. 2:14-36). Runakunapa creesqankuta Bibliapa nisqanman hina kimsa yachachikuymanta leeruspanmi imakuna pasasqanmanta imayna cumplikusqanta qawachirqa. Hinaptinmi Pedropa nisqanta uyariqkunaqa vidankupi cambianankupaq tanteakurqaku. ¿Chaynatachu kallpanchan uyarisuqnikikunata yachachisqayki? Imamantapas willaylla-willanaykimantaqa, ¿entiendechinkichu kasukuyqa imanasqa allin kasqanmanta? ¿Piensarichinkichu yachachisqaykiwan vidanpi imayna yanapachikunanpaq? Manapaschá Pedropa discursonta uyariqkuna hinachu ninqaku “¿imatataq rurallasaqku?”, nispa. Bibliapa nisqanman hina yachachispaqa kallpanchasunmi yachasqankuwan vidankupi yanapachikunankupaq (Hech. 2:37).
Wawa-churinkupaq tayta-mamakuna Bibliata leepuspankuqa yanapanankum Bibliapa yachachisqanwan vidankupi imaynata yanapachikunankupaq (Efes. 6:4). Bibliata sapa semana leenapaq textokunamanta akllasqayki kaqkunata explicaruspam kaynata tapuwaq: “¿Imamantataq kay textokuna yachachiwanchik? ¿Imaynatataq predicacionpi servichikuchwan? ¿Imatam yachachiwanchik Jehova Diosmanta hinaspa rurasqankunamanta? ¿Imaynatam yanapawanchik payta astawan kuyanapaq?”, nispa. Biblia leesqanchikmanta akllasqa yachachiykunata Diosmanta Yachachinapaq Escuelapi rimarinankupaq familiaykita kallpanchay. Chaynata ruraspankuqa manam chayllachu qonqarunqaku Bibliapa yachachisqankunataqa.
Imayna kawsasqaykiwan yachachiy
Yachachinchikqa manam rimasqallanchikwanchu aswanqa rurasqanchikwanmi. Imayna kawsasqanchikwanmi qawachinchik yachachisqanchik allin kasqanta. Warmachakunam tayta-mamanpa rurasqanta qawaspanku yachanku hinaspam paykuna hina kayta munanku. Chaynallataqmi estudiantekikunapas qamta ‘qatipakusunki’ ‘Cristota’ qampas qatipakusqaykiman hina. Chaymi Jehova Diospa munasqanman hina kawsaspanku favorninta chaynataq kusikuytapas tarinqaku (1 Cor. 11:1).
Allin ejemplo kananchikpaqmi Bibliaqa piensarichiwanchik kayna nisqanwan: ‘¡Chuya sonqoyá Diosta servispa kawsaychik!’, nispa. Chayna nisqanman hina kawsaspaqa hukkunamanmi qawachinchik Diosta kasukuyqa allin kasqanta (2 Ped. 3:11). Estudianteyki Bibliata sapa kuti leenanpaq kallpanchaspaykiqa kikikim chayta ruranayki. Wawa-churikikuna Diospa kamachisqanman hina kawsanankuta munaspaykiqa Diospa munayninman hinam kawsanayki. Predicanankupaq iñiqmasinchikkunata kallpanchaspaykiqa qampas kallpanchakunaykim chayta ruranaykipaq. Yachachisqanchikman hina kawsaspaqa atisunmi pitapas kallpanchayta (Rom. 2:21-23).
Aswan allin yachachiq kanaykipaq tapukuy: “Yachachisqaykuna, ¿yanapanchu uyariwaqniykunata imayna kasqankupi, rimasqankupi otaq rurasqankupi? ¿Entiendechinichu imam allin kasqanmanta otaq imam mana allin kasqanmanta hinaspa imayna portakuymantapas? ¿Imaynatam yanapayman estudianteykuna, wawa-churiykuna otaq huñunakuypi kaqkuna yachachisqayta mana qonqanankupaq? ¿Kasukunankupaq hinachu sutillata yachachini? ¿Imayna kawsasqaywanchu yachachini? Jehova Dioswan amistadninpi yachachisqay, ¿imayna yanapasqanmanta cuentata qokunankupaqchu yanapani?”, nispa (Prov. 9:10). Chayna tapukuykunapa nisqanman hina allin yachachiq kanaykipaqqa kallpanchakuy hinaspa kasukuy apostol Pablopa kayna nisqanta: ‘Chaynaqa allintayá yachachiy. Chaynata ruraspaykiqa mana allinkunamantam salvakunki, salvankitaqmi uyarisuqnikikunatapas’, nispa (1 Tim. 4:16).