Allinta yanapanapaq: imatam nichwan mana uyariyta munaptinku

Imanasqataq willananchik. Kaypi piensariy: hatun desgracia pasananta yachaspaqa, ¿manachu vecinoykikunaman willawaq librakunankupaq? Willanaykipaq wasinman riptiki manam tiempoy kanchu nispan mana uyarisuptikiqa, ¿chayllachu pasakuwaq? Manachá chaytaqa ruwawaqchu, kallpanchakunkichá willanaykipaq. Salvakunankupaq yanapasqanta mana yachasqankuraykum achka runakuna Diosmanta willakusqanchikta mana uyariyta munankuchu. Wakinpiqa manapaschá uyariyta munankuchu watukusqanchik hora imawanpas afanakusqankurayku (Mat. 24:37-39). Otaq hukkuna contranchikpi rimasqankuwan cheqniwasqanchikrayku (Mat. 11:18, 19). Ichapas piensanku wakin religionkuna hina mana allin ruwaq kasqanchikta (2 Ped. 2:1, 2). Huk kutipi mana uyariwaptinchikqa hinallayá kallpanchakusun yanapanapaq.

Imaynatam yanapachwan:

Manaraq Diosmanta willakuq richkaspa piensay imakunata nispanku mana uyariy munasqankupi, hinaspa chaynata nisuptiki imata ninaykipaq.
Imata nispanpas mana uyariyta munaptinqa sumaqllata hinalla rimapayanaykipaq kallpanchakuy. Ichapas imamantapas alabaykuwaq. Religionniyoqña kasqanmanta nisuptikiqa alabaykunaykipaqmi kaynata niwaq: “Ima sumaqmi Diosman sonqo kasqaykiqa”, nispa. Wakinpiqa ichapas imayna tarikusqanmanta llakipayaykuspa parlariyta atichwan. Ichapas niwachwan mana tiempoyoq kasqanmanta, chaynata niwaptinchikqa nichwanmi: “Hinaptinqa, manaraq pasakuchkaspay kayta saqeykusqayki”, nispa. Manam munanichu niwaptinchikqa ichapas tapuchwan: “¿Bibliamantachu icha religionmantachu mana yachayta munanki?”, nispa.
Tanteoyoqmi kananchik. Jehova Diosqa manam pitapas obliganchu paymanta uyarinankupaqqa (Deut. 30:19). Sapakamam Diosmanqa cuentata qosunchik (Gal. 6:5). Manapuni uyariyta munaptinqa respetowanmi pasakunanchik. Chaynata ruwaptinchikqa ichapas huk kaqnin iñiqmasinchik yapapi watukuptin uyarinman (1 Ped. 3:15).

Kayta ruway huk killapuni:

Mana uyariy munaq runamanta pasakuspaykiqa, predicaqmasikiwan rimariy imaynatam aswan allinta ruwawaq karqa.