Escuela dirigeqpaq consejokuna

LLAPAN congregacionkunapim huk ancianota akllanku Diosmanta Yachachinapaq Escuelapi diriginanpaq. Diriginaykipaq akllasqa kaspaqa allinta diriginaykipaq kallpanchakuy hinaspa escuelapi kaqkunata sapakamata yanapanaykipaqpas, chaynata ruraptikiqa Dios serviyninkupim allinta ñawparinqaku.

Escuelapiqa sapa semanam diriginayki. Chay huñunakuypiqa manam Escuelapi kaqkunallachu kanqaku hukkunapas kanqam. Chaymi consejaspaqa llapanta kallpanchanaykipaq hina rimanayki, chaypaqmi yanapasunki 5-8 paginankunapi kay libropa yachachikuyninkuna.

Estudiantekuna leeptinpas, discursota qoptinpas otaq demostracionta ruraptinkupas llapankupi reparay. Mayqenta ruraptinkupas allinta entiendechiy chay rurasqankuqa Jehova Diosmanta allin yachachiq kanankupaq yanapasqanta. Libropi mayqen yachachikuyninman hina ruranankupaq kallpanchakuspaqa allintam ñawparinqaku rimayninkupi, chaypaqmi sapakamata yanapanayki yachachikuypa nisqanman hina ruranankupaq. Chaymantapas allinta uyariy imayna rimasqankuta chayman hina yanapanaykipaq.

Escuelaqa horallanpim qallarinan chaynataq tukunanpas. Chayta ejemploykiwan qawachiy rimanaykipaq kaqkunata pisillapi rimaspa. Mayqentapas tiempon llalliruptinqa kikikim otaq yanapasuqnikim señaschanan, estudianteñataqmi chaylla rimayta tukuspan tiyananman kutinan. Escuelapi yachachiq qarikuna tiemponwan llallirachikuptinqa imayna rurasqanmanta rimanaykipaq kaqta pisi rimayllapi rimay hinaspa huñunakuy tukuyta paywan sapallanpi rimay.

Escuelapi diriginaykipaq wakin kutipi mana riyta atiptikiqa ancianokunam tiempowan tanteananku rantikipi mayqen ancianopas rurananpaq. Atikuptinqa ancianokunapa tanteasqankuman hinataqmi huk siervo ministerial yanapasunkiman, Escuelapi yachachikuykuna pikunaman tupasqanta ruraypi hinaspa chay ruranankupaq kaqta papelchapi huntachiypi, chaykunata aypuypi otaq escuelapi ima ruranankuta mana atiptinkuqa paykunapa rantinpi hukkunaña rurananpaq maskaypipas.

Escuelapi kanankupaq. Llapallanta kallpanchay Escuelapi kanankupaq. Huñunakuykunaman hamuq manaraq bautizasqa kaspanpas escuelapiqa kanmankum Diospa yachachisqanman hina kawsaspankuqa. Pipas escuelapi kayta munaptinqa alabaykuy. Manaraq predicaq kaptinqa Escuelapi kananpaq imakunataraq rurananpaq otaq imayna kawsananmantaraq allinta entiendechiy, atikuptinqa estudiachiqninpa qayllanpi, warmacha kaptinqa iñiq mamanpa otaq taytanpa qayllanpi. Chaypaq yanapachikuy Organizados para hacer la voluntad de Jehová niq libropa 79-81 paginankunapi yachachikuykunawan. Escuelapi kaqkunapa sutinta listapi churay.

Allinta rimanapaq yachachikuykunapa listan. Escuelapi kaqkunapaqmi libropa 79-81 paginankunapi lista kachkan. Sapakamapaqmi colorninman hina kachkan. Leenankupaq tupaptinmi ruranmanku 1-17 yachachikuykunaman hina. Demostracionta ruraqkunaqa mayqenwanpas yanapachikunmankum ichaqa ama 7, 52 nitaq 53 kaq yachachikuykunawanqa. Discursota qoqkunapas llapanwanmi yanapachikunmanku ichaqa ama 7, 18 nitaq 30 kaq yachachikuykunawanqa.

Mayqen yachachikuyman hina kallpanchakunanpaq Escuelapi kaqman nispaykiqa chay yachachikuypa waqtanpi “Haykapi rurasqanmanta” nisqanpa uraychanpi lapizwan anotay ima punchawpi, ima killapi hinaspa ima watapi rurasqanta. Leeruptinqa, discursota qoruptinqa otaq demostracionta ruraruptinqa sapallanpi tapuy yachachikuypa tukupayninpi rurananchikpaq kaqkuna nisqanta ruramusqanmanta otaq mana ruramusqanmanta willasunaykipaq. Ruramusqanmanta nisuptikiqa tupasqanman hina kinraynin cuadrochapi señalay. Astawan kallpanchakunanpaq tanteaspaykiqa “Haykapi tukunaykimanta” nisqanpiqa amaraq anotaychu. Allinta ruraruptin ichaqa anotay, huk yachachikuyman hinaña kallpanchakunanpaq. Demostracionta ruraruptinqa piwan otaq maypi rimachkanmanpas hina rurasqanta 82 paginapa listanpi ichoq lawninpi anotay ima punchawpi, ima killapi hinaspa ima watapi rurasqanta. Chay listapi iskay rayachakunam escuelapi kaqta yanapan yapapipas chayna kaqllata rurananpaq. Escuelapi kaqkunaqa kay libronkutam sapa semana apananku.

Kay libropi yachachikuykunapa listanman hina niy huknin yachachikuyman hinalla kallpanchakunanpaq. Ichaqa allinmi kanman tupasqanman hina qatinasllanpi rurayninqa. Mayqen estudiantepas mana sasachakuspa rimaq kaptinqa, kallpanchawaqmi mayqen yachachikuykunatapas estudiaspa chayman hina rurananpaq. Hinaspa yanapay imakunapi astawan kallpanchakunanpaq consejaspa, chayman hina allinta discursota qonanpaq otaq allinta yachachinanpaq.

Escuelapi unay wataña kaqkunatapas kay libropi yachachikuykunata estudiasqankuqa allintam yanapanqa. Wakinpiqa estudiantepa necesitasqanman hina tanteay mayqen yachachikuyman hina kallpanchakunanpaq, tupasqanman hina qatinasninpi rurananmantaqa.

Estudiantekunata consejanaykipaq. Escuelapi kaqkunata consejay Bibliapa yachachisqanman hina. Musyanankum imayna consejasqaykiqa Diospa yachachisqanman hina kasqanta.

Yuyanaykim iñiqmasikikunata ‘yanapanaykipaq’ kasqaykita (2 Cor. 1:24). Paykuna hinam kikikipas allinta preparakunayki astawan allinta diriginaykipaq. Kay libropi yachachikuykunata estudiaspa consejonkunata kasukuy hinaspa iñiqmasikikunata ejemploykiwan kallpanchay.

Iñiqmasikikunata yanapay allin leeq kanankupaq hinaspa allin yachachiq kanankupaqpas. Imanasqa allinta leenankupaq otaq rimanankupaq kasqanta allinta entiendechiy hinaspa imaynata ruranankupaqpas. Chaypaqmi kay libropi yachachikuykuna yanapasunki, ichaqa manam wakin palabrakunallatachu leepunayki aswanqa explicanaykim yachachikuypa ima nisqanmanta chaynataq chayman hina rurananpaq kasqanmantapas.

Mayqen estudiantepas yachachikuyman hina allinta ruraptinqa alabaykuy. Hinaspa pisi rimayllapi qawachiy imanasqa allin rurasqanmanta otaq ima yanapasqanmanta. Imapipas astawan kallpanchakunanpaq consejaspaqa entiendechiy imanasqa kallpanchakunanmanta chaynataq imaynata rurananpaqpas. Consejaspaqa sumaqllata sapanpi consejay.

Wakinqa hukkunapa qayllanpim rimayta manchapakunku. Chaymi leenanpaq, discurso qonanpaq otaq demostracionta rurananpaq kallpanchakusqanqa yanqapaq kasqanta piensanmanku. Jesucristota qatipakuy, payqa ‘manam pakirqachu qewisqa soqostaqa. Manam wañuchirqachu tumpalla rupaq mecherotaqa’ (Mat. 12:20). Consejanaykipaqqa kaykunapi reparay: imayna tarikusqanpi, escuelapi chayraq otaq unayña kasqanpi. Hinalla kallpanchakunanpaq tukuy sonqoykiwan kallpanchay.

Llapanta respetay, Diosmanta Yachachinapaq Escuelapi dirigeq ancianokunatam Romanos 12:10 yanapan, chaypim nin: “Respetanakuspayá wakinnikichikta imapipas aswan allinpaq hapiychik”, nispa. Escuelapi kaq mayorniki kaptinqa yuyariy 1 Timoteo 5:1, 2 nisqankunata. Hayka watayoq kaptinkupas imapi astawan kallpanchakunankupaq sumaqllata consejaptikiqa kallpanchakunqakum (Prov. 25:11).

Estudianteman allinta entiendechiy imanasqa hinalla kallpanchakunanpaq. Kallpanchakunanqa manam alabanaykiraykullachu otaq huknin yachachikuyman hinaña rimananraykuchu nitaq imayna rimasqanwan hukkunata admirachinanraykuchu (Prov. 25:27). Allin rimaytaqa yachananchik Jehova Diosta hatunchanapaqmi chaynataq hukkunapas payta reqsispa yupaychanankupaqmi. Escuelam yanapawanchik Mateo 24:14 hinaspa 28:19, 20 nisqankunata allinta ruranapaq. Bautizasqa qarikunam kallpanchasqa kachkanku Bibliapa kamachisqanman hina kawsanankupaq chayman hina allinta yachachispanku ‘Diospa ovejankuna michiypi’ yanapakunankupaq (1 Ped. 5:2, 3).

Escuelapi kaqkunata consejay mayqen yachachikuyman hina imapi kallpanchakunankupaq tupaptinqa tiempowan preparakunankupaq hinaspa practicanankupaq. Kallpanchaytaq piwan rimaspapas, huñunakuypi rimarispapas otaq predicaspapas chay yachachikuyman hina rurananpaq.

Escuelapi ruranankupaq. Leenanpaq, discursota qonanpaq otaq demostracionta rurananpaq tupaptinqa yaqa kimsa semana ñawpaqtaraqmi willanayki. Atikuptinqa llapanman qoy qellqasqata.

Yachachinapaq kaptinqa allin yachachiq ancianokunam rurananku, wakinpiqa ruranmanmi siervo ministerialkunapas allinta yachachiq kaspankuqa.

Escuelapi imata ruranankupaq warmimanpas otaq qarimanpas nispaqa reparay “Diosmanta Yachachinapaq Escuelapi Yachachikuykuna” nisqanpi. Escuelapi qarikuna pisilla kaptinqa ama leeyllachu leechunku wakinpiqa discursotapas qonmankum.

Escuelapi imata ruranankupaq ninayki kaptinqa reparay imayna tarikusqankupi. Wakin ancianoqa otaq siervo ministerialqa ichapas sasachakunmanku Escuelapi yachachinanpaq hinaspa Diosta Servinapaq Huñunakuypipas yachachinanpaq hina chay tutalla tupaptinqa otaq hina chay semanallapi lliw runakunapaq discursota qonan kaptinqa. Warmayoq iñiqmasinchikpas sasachakunmanmi demostracionta rurananpaq hina chay tutalla warmachantapas Escuelapi yanapananpaq tupaptinqa. Chaymantapas yachachikuykunata tanteay pipaq kasqanman hina; warmachapaqchu, mozo-sipaspaqchu icha manaraq bautizasqapaqchu chaynataq mayqen yachachikuyman hina rurananpaqpas.

Warmikunaqa akllanmankum demostracionta ruranankupaq 78 hinaspa 82 paginakunapi nisqanman hina. Demostracionta iskaylla ruranankupaq kaptinpas wakinpiqa tanteanmankum kimsapas ruranankupaq. Wakinpiqa ichapas mañakusunkiman piman predicachkaq hina rurananpaq kasqanrayku mayqen iñiqmasinchikwanpas rurananpaq. Chaykunapipas reparanaykim.

Salonpi sapaq cuarto. Escuelapi 50 masnin estudiantekuna kaptinqa ichapas tanteanmanku Salonpa sapaq cuartonpi leenankupaq, discursota qonankupaq otaq demostracionta ruranankupaq. Necesitakusqanman hinam ancianokuna tanteanmanku llapanta ruranankupaq otaq escuela tukunanpaqña iskay yachachikuykunallamanta ruranankupaq.

Chay cuartopi escuelapi kaqkunata consejaqqa allin yachachiq ancianom otaq siervo ministerialmi kanan. Chaypi pikuna consejaq kanankupaqqa ancianokunam tanteananku. Escuelapi consejaq kaspaykiqa estudiantekunata allinta yanapay Salonpi otaq chay cuartopi ruranankupaq kaptinpas.

Leeyta otaq qellqayta yachanankupaq. Congregacionpi kaqkuna qellqayta otaq leeyta wakin mana yachaptinkuqa ancianokunam tanteanmanku escuela kananpaq chaywanmi astawan yanapachikunmanku Diosmanta Yachachinapaq Escuelapi allinta rimanankupaq otaq leenankupaq.

Qellqayta otaq leeyta yachanankupaq kaq chay escuelaqa estudiantekunapa necesitasqankuman hinam kanan, chaytaqa ancianokunam tanteananku haykapi hinaspa hayka hora kananpaq, tanteanankutaqmi llapankuman otaq sapakamaman yachachinankupaqpas.

Chay escuelapi yachachiqtaqa ancianokunam akllananku allin leeqta hinaspa rimasqanku idiomapi allin rimaqta. Congregacionpi chayna qari mana kaptinqa tanteanmankum yachayniyoq allin kawsakuq cristianata akllanankupaq, payñataqmi sukupakuspan otaq umanta tapakuspan yachachinan (1 Cor. 11:3-10; 1 Tim. 2:11, 12).

Leenaykipaqwan qellqanaykipaq niq folletom tukuy rikchaq rimaykunapi tikrasqa kachkan, chay qellqam rurasqa kachkan qellqaytawan leeyta yachachinapaq. Huk yanapakuykunawanpas yachachinmankum, chaytaqa tanteananku estudiantekunapa necesitasqanman hinam. Allintaña yacharuptinkuqa kallpanchanankum Diosmanta Yachachinapaq Escuelapi leenankupaq, demostracionta ruranankupaq otaq yachachinankupaqpas.

Escuelapi allinta dirigispaqa iñiqmasikikunatam allinta yanapanki. Chaypaqqa allintam preparakunayki. Diosmi valekusunki iñiqmasikikunata allinta yanapanaykipaq, chaymi tukuy sonqoykiwan kallpanchakunayki (Rom. 12:6-8).