Allinta kawsakunapaq sumaq consejokuna

DIOSPA kamachikuyninta kasukuyqa, ¿allinninchikpaqchu? Chayta yachanapaqqa, Palabranpi consejonkunatam estudiananchik. ¿Allinpunichu yachachikuyninkuna? ¿Yanapawanchikchu allinta kawsanapaq? Proverbios libropim rey Salomonqa pachaknintin sumaq consejokunata huñurqa. Wakintayá qawasun.

Dioswan amistadninchikmanta. Dioswan allin amistad kanapaqqa paypim confiananchik. Salomonmi nirqa: “Diosllapiyá confiakuy tukuy sonqoykiwanqa. Amayá confiakuychu kikikipa entiendesqallaykipiqa. Tukuy kawsasqaykipiyá yuyariy Tayta Diosta. Paymi munasqanman hina kawsachisunki”, nispa (Proverbios 3:5, 6). ¿Imaynatam confiasqanchikta qawachinchik? Dioswan yanapachikuspa chaynataq kamachikuyninkunata kasukuspam. Chaynatam Diosninchikpa sonqonta kusichisun, qawachisuntaqmi Diablo llulla kasqantapas (Proverbios 27:11).

Familianchikmantawan amistadninchikkunamanta. Familiakunaqa kunanmi astawan necesitanku Diospa yanapakuyninta. Diosmi qosata nin: “Mozo kasparaq casarasqayki warmikiwanyá sonqoykiqa contentakuchun”, nispa. Chaynatam yuyarichin warmillanpaq kananta (Proverbios 5:18-20). Proverbios 31 capitulopim sumaq ejemplokuna tarikun casada warmi imayna kananmanta, chaynapi qosanwan wawankunapas respetananpaq. Warmakunatapas kallpanchanmi tayta-mamankuta kasukunankupaq (Proverbios 6:20). Kay libroqa yachachintaqmi amistadkuna allinpuni kasqanta, nintaqmi hukkunamanta karunchakuspaqa kikillanchikpaq munaq rikurirunamanta (Proverbios 18:1). Amistadniyoq kay allin kaptinpas, allintam akllana mana sasachakuykunapi tarikunapaq (Proverbios 13:20; 17:17).

Imayna kanamanta. Proverbios libropiqa kanmi kusisqa kanapaq sumaq consejokuna, yanapawanchikmi mana allin pensamientokunatawan sinkakuyta saqenapaq, chaynataq allin piensaq kaspa allinta llamkanapaqpas (Proverbios 6:6; 14:30; 20:1). Niwanchikmi Diospa contranpi mana allin piensaykunaqa wañuyman apawasqanchikta (Proverbios 14:12). Sonqonchikpi imayna kasqanchiktapas waqaychanam, chaymantamá kawsakuyninchikqa kanqa (Proverbios 4:23).

Kay consejokunaqa millonnintin runakunatam yanapan, paykunaqa segurom kachkanku Diospa kamachisqanta kasukuyqa imamantapas allinpuni kasqanta.

(Proverbios libromanta.)