Jesusmi willakun Diospa Munaychakuyninmanta

¿IMAPAQMI Jesus kay Pachaman hamurqa? Paymi nirqa: ‘Diospa munaychakusqanmanta allin noticiata [. . .] willakunaypaqmi, chaypaqmi ñoqataqa kachamuwarqa’, nispa (Lucas 4:43). Jesusqa astawanmi Diospa munaychakusqanmanta willarqa, chaymanta 4 yachachisqanta qawasun.

1. Jesusmi Rey kanan karqa. Kikin Jesusmi nirqa Mesias kasqanta (Juan 4:25, 26). Nirqataqmi Danielpa mosqoyninpi qawasqan Rey kasqantapas. Chaymi apostolninkunaman nirqa ‘achkirichkaq tiyananpi’ tiyaykunanmanta, hinaspa paywan kuska aslla kamachiq kaqkunawan gobiernamunankumanta (Mateo 19:28). Paykunatam aslla ovejakuna nispa suticharqa. Rimarqataqmi ‘sapaq ovejakunamanta’, paykunaqa manam kamachinankuchu karqa (Lucas 12:32; Juan 10:16).

2. Diospa Munaychakuyninqa allin ruraytam apamunan karqa. Jesusmi nirqa, Diospa sutinta Satanas yanqachasqanta Diospa Munaychakuynin allichananmanta. ¿Imaynatam ruranan karqa? Eden huertamantapacha Diospa contranpi tukuy mana allin rimasqankuta chuyanchaspan (Mateo 6:9, 10). Chaymantapas, imaymana runakunaman yachachispanmi Jesucristoqa qawachirqa Diospa Munaychakuyninpi manaña cheqninakuy kananta. Israelitakunaman predicananpaq kamachisqa kaspanpas, predicarqataqmi Samaria hinaspa wakin nacionkunapi runakunamanpas. Payqa manam chay religionkunapi punta apaqkuna hinachu karqa, paykunaqa cheqnikuq hinaspa sayapakuqmi karqaku.

3. Diospa Munaychakuyninqa manam kay pachamantachu kanan karqa. Jesusqa judiokunapa ancha sasachakusqanku tiempopim yacharqa, paykunatam huklaw nacion munaychakuchkarqa. Chaywanpas payqa manam politicapiqa chaqrukurqachu (Juan 6:14, 15). Huk kamachiqwan rimaspanmi nirqa: “Munaychakuyniyqa manam kay pachamantachu”, nispa (Juan 18:36). Qatiqninkunatapas nirqam: ‘Manam kay pachapaqchu kankichik’, nispa (Juan 15:19). Defiendenanku kaptinpas manam munarqachu espadata servichikunankutapas (Mateo 26:51, 52).

4. Cristom kuyakuywan kamachinan karqa. Jesusmi prometerqa qatiqninkunapa sasachakuyninkupi yanapananpaq (Mateo 11:28-30). Chaypaqmi allin consejokunata qorqa preocupakuymanta, kapuqniyoq kaymanta, hukkunawan imayna kawsanamantawan imayna kusisqa kanamantapas (Mateo 5-7 capitulokuna). Payqa kuyakuq, allin chaskikuq runam karqa, chaymi pi runapas mana hukmanyaspan asuykuq. ¡Mayna allin kamachiqmi Jesusqa kanqa!

Jesusqa achka milagrokunatapas rurarqam, chaywanmi qawachirqa Diospa Munaychakuynin ima rurananta. ¿Ima milagrokunatam rurarqa? Qawasunyá.

(Mateo, Marcos, Lucas, Juan librokunamanta.)