Kay Pacham kaqlla sumaq huertaman tikrakun

BIBLIAPA tukuyninpi kaq Apocalipsis librom runakunaman sumaq suyakuyta qon. Juanmi qellqarqa, chaypim revelacionkuna tarikun hinaspam Jehová Diospa munaynin cumplikusqanwan tukun.

Punta revelacionpim, Jesusqa achka congregacionkunata kallpanchaspan corrigen. Qatiqninpiñataq qawachiwanchik hanaq pachapi Diospa Tiyanan imayna kasqanmanta, hinaspa Jehová Diosta angelkuna alabasqankuta.

Diospa munaynin cumplikusqanman hinam, Jesucristo 7 selloyoq wankusqa librota chaskin. Qallariq 4 sellokunata kichaptinmi, rikurin 4 caballota sillaqkuna. Punta kaqmi Jesus, Rey kaspanñam yuraq caballopi rin. Wakinñataqmi sapakama colorniyoq caballokunapi sillakunku, kaykunam tupan kay tukupay tiempopi rikukuq guerrawan, yarqaywan hinaspa onqoywan. 7 kaq sello kichakuruptinmi uyarikun 7 angelkunapa cornetilla tocasqanku, kaymi qawachin Diospa sentencian qosqanta. Kaykunam apan 7 castigokunaman otaq Diospa piñakuyninkunaman.

Juanmi huk wawa nacesqanta rikun, kaymi qawachin cielopi Diospa Gobiernon qallarisqanta. Guerra qallariptinmi Satanaswan demonionkuna kay Pachaman wischumusqa kanku. Hinaptinmi qapariy uyarikun: “¡Ay! imaynaraq kanqa kay pachapi kaqkunaqa”, nispa. Diablom pisi tiempoyoqllaña kasqanta yachaspan piñasqallaña kachkan (Apocalipsis 12:12).

Kaqmantam Jesusqa carnero hina hanaq pachapi rikurin, hinaspam 144.000 akllasqa runakuna Jesuswan kuska kachkanku gobiernanankupaq. Apocalipsis libropim willawanchik, 144.000 runakunapas prometesqa miraypa parten kasqankuta (Apocalipsis 14:1; 20:6).

Chaymantam kay Pachapi kamachiqkuna Armagedonpaq otaq ‘Diospa guerranpaq’ huñunakunku, hinaspam yuraq caballo sillakuqwan otaq Jesuswan hinaspa angelninkunawan peleanku. Lliw gobiernokunam puchukachisqa kanku, wichqankum Satanastapas. Jesuswan 144.000 runakunam kay pachata 1.000 wata kamachinku, chay tukuruptinmi Satanaspas puchukan (Apocalipsis 16:14; 20:4).

Waranqa Wata Jesucristo Kamachiptin, ¿imatam allin runakunapaq ruranqa? Juanmi nin: “Diosmi pichanqa paykunapa weqenta, manañam kanqachu wañuypas [. . .], waqaypas nitaq nanaypas. Ñawpaq kaqkunaqa pasarunñam”, nispa (Apocalipsis 21:4). Arí, ¡kaqmantam kay Pachaqa sumaq huerta kanqa!

Kaynatam Apocalipsis libro, Bibliapa ima yachachisqanta willakuspan tukun. Arí, Jesuspa Gobiernonwanmi Jehová Diosqa sutinta chuyanchanqa hinaspa llapallan kamachinanpaq derechoyoq kasqantapas wiñaypaq takyachinqa.

(Apocalipsis libromanta.)