Diosta yupaychana karpamanta

¿YACHANKICHU imataq chay wasi kasqanta? Jehová Diosta yupaychanapaq sapaqchasqa karpam. Diosman asuykuna karpa nispam sutichanku. Egipto nacionmanta lloqsimusqanku qepataqa huk watallapim rurarurqaku. ¿Yachankichu pitaq chayta rurachirqa?

Jehová Diosmi munasqanman hina rurachirqa. Sinai orqoman Moises seqaruptinmi Jehová Diosqa imayna ruranankuta nirqa. Chaylla paskanankupaq hinalla ruranankupaqmi nirqa. Chaynapim karpataqa kaqllamanta hatarichinmanku llapa ima kaqninkunata huklawman apaspankupas. Chaymi chunniqpi huklawman pasakuspanku karpataqa astarqaku.

Karpapi taksa kaq cuartochata qawaspayki cajatam rikunki. Chay cajaqa Diospa contrato baulninmi. Qorimanta rurasqa iskay querubin sutiyoq angelkunam baulpa tapanpa iskay lawnin cantonpi karqa. Chunkantin Kamachikuykunata kaqllamantam Diosqa iskay tabla rumikunapi qellqarqa, punta kaq tablakunata Moises pakiparusqanmanta. Hinaptinmi chay tabla rumikunataqa Diospa baulninpi churarqaku. Chaypipas maná nisqa sutiyoq mikuyta qori mankapi churarqaku. ¿Yuyachkankiraqchu imataq maná nisqa kasqanta?

Moisespa wawqen Aarontam Jehová Diosqa akllarqa sacerdotekunapa jefen kananpaq. Paymi llaqtata yanaparqa Jehová Diosta yupaychanankupaq. Churinkunapas sacerdotekunam karqaku.

Kunanqa qaway karpapa hatunniq cuartota. Taksa cuartochamantaqa huk chaynatawanraqmi karqa. ¿Rikuchkankichu cajacha qosnirisqanta? Chaymi sacerdotekunapa incienso kañananku altarqa, inciensoqa miskillataña asnariqmi. Candelerotapas qaway qanchis mecheroyoqmi. Cuartopi kimsa kaqñataqmi 12 tanta churananku mesapas kachkan.

Karpapa pationpipas mayllakunapaq hunta yakuyoq lavatoriom kachkan. Chaypim sacerdotekunaqa chakinkutawan makinkuta mayllakunku. Chaypitaqmi huk altarpas kachkan. Animalkunata wañuchispam kay altarpi Jehová Diospaq ofrendata kañapurqaku. Campamentopa chawpinpim karpataqa hatarichirqaku, muyuriqninpiñataqmi Israel runakunaqa yachananku karpankuta hatarichirqaku.