¿Yacharqankichu?
Jesuspa tiemponpi, ¿chiqaptachu runakunaqa huk runapa chakranpi mana allin qurata tarpuqku?
Kayqa 1468 kaq watapi Roma nacionta kamachiq Justiniano runapa Digesto sutiyuq qillqa ruwachisqanmanta copiasqankum, kay qillqam riman Jesuspa tiemponpi sasachakuykunata imayna allichanankupaq leykunamanta
MATEO 13:24-26 nisqanpim, Jesus nirqa: “Hanaq pacha Diospa munaychakuyninqa rikchakun chakranpi allin muhuta tarpuq runamanmi. Runakuna puñunankamam paypa enemigon hamuruspan trigo tarpusqanpi mana allin qurata tarpuparuspan pasakurqa. Trigo wiñaramuspanmi ruruyta qallaykurqa hinaptinmi mana allin qurapas sutilla rikurirurqa”, nispa. Wakin yachaysapa runakunam iskayrayanku ñawpaq tiempopi chayna kasqanmanta. Ichaqa ñawpaq Roma nacionpi qillqakunapa nisqanman hinaqa chaynam karqa.
Bibliamanta rimaq huk diccionariopa nisqanman hinaqa, Roma nacionpa kamachikuyninman hinam huk runapa chakranpi mana allin qura tarpuqta castigaqku. Chay kamachikuyqa karqa chaykuna pasakuptinmi. Leykunamanta yachaq Alastair Kerr sutiyuq runapa willakusqanman hinaqa, 533 kaq watapim Roma nacionta kamachiq Justiniano runa Digesto sutiyuq qillqata ruwachirqa. Chay qillqapim payqa huñurqa 100 watamanta 250 watakama leykunamanta yachaq runakunapa nisqanta. Chay qillqam riman Ulpiano yachaysapa runamanta, paymi willakun huk runapa chakranpi mana allin qurata huk runa tapurusqanmanta hinaspa cosechanta yanqacharusqanmanta. Willakurqataqmi cosechanta yanqacharuq runa chakrayuq runaman hayka qullqi mañakusqanta qupunanmanta.
Qawasqanchikman hinam, Roma nacionpi kaykuna pasakurqa. Arí, Jesuspa rikchanachiykuna servichikusqanqa chay tiempopi pasasqanmantam karqa.