Jesuspa yachachisqankuna

¿Imaynatam angelkuna yanapawachwan?

‘Manaraqpas kay pacha kachkaptinmi’, Jesusqa hanaq pachapi Taytanwan kawsarqa (Juan 17:5). Chaymi pay allintapuni yanapawachwan qatiqnin tapukuykunata kutichinapaq.

¿Interesakunkuchu angelkuna ñoqanchikpi?

▪ Jesusmi nirqa angelkuna runakunapi anchata interesakusqanta. Nirqam: ‘Diospa angelninkunapas kusikunmi huchallikuq wanakuptinqa’, nispa (Lucas 15:10).

Nirqataqmi Diospa serviqninkunata yanapanankupaq kamachisqa kasqankuta, chaynapi Dioswan amistadninku mana yanqachakunanpaq. Chaymi Jesusqa qatiqninkunata nirqa iñiqmasinkupa conciencianta mana hukmanyachinankupaq, paykunapam kan ‘angelninkuna tukuy tiempo Taytanpa qayllanpi’ (Mateo 18:10). Kaywanqa manamá nichkanchu sapakama serviqninkunata huk angel cuidasqantachu. Aswanmi qawachichkarqa kay angelkunaqa Dios serviqkunapi interesakusqanta.

¿Imaynatam Diablo sasachawachwan?

▪ Jesusqa nirqam; runakuna Diosta mana reqsinankupaq Satanas harkakusqanta. Nirqam: ‘Diospa munaychakusqanmanta willakuyta uyarichkaspa mana entiendeptinqa [. . .], mana allin hamuruspanmi sonqonpi tarpusqa muhuta qechurunqa’, nispa (Mateo 13:19).

Jesusmi willakurqa trigo tarpuq runamanta rikchanachiyta. Chaywanmi qawachirqa runakunata Satanas imayna engañasqanta. Chay rikchanachiypi runaqa Jesusmi, trigoñataqmi cheqap cristianokuna. Willakusqanman hinaqa; ‘trigo tarpusqanmanmi enemigon chaqchuykurqa cebadillata’. Chay mana allin qoraqa cristiano tukuqkunam, ‘cebadilla tarpuqñataqmi Diablo’ (Mateo 13:25, 39). Imaynam cebadillaqa wiñaspan trigoman rikchakun chaynam cristiano tukuqkunapas cheqap cristianokunaman rikchakunmanku. Chaynapim pantay religionqa mana allin yachachisqankunawan runakunata engañanku hinaspa Diosmanta karunchanku.

¿Imaynatam Satanasmanta cuidakuchwan?

▪ Jesusmi nirqa: “kay pachapi kamachikuq” Satanas kasqanta (Juan 14:30). Chaymi yachachirqa imayna cuidakunamanta. Qatiqninkunapi piensaspanmi, Taytanta mañakurqa: ‘Mañakuykim [. . .] Diablomanta waqaychanaykipaq. Ñoqaqa manam kay pachallapaqchu kani chaynataqmi paykunapas mana kay pachallapaqtaqchu, [. . .] chuyanchayá cheqapwan, palabraykiqariki cheqapmi’, nispa (Juan 17:15-17). Chaymi mana allinkunamanta amparakunapaqqa Bibliamanta allinta yachananchik.

¿Yanapawanchikchu angelkuna kay tiempopipas?

▪ Jesusmi nirqa: ‘[Tukupay] puchukayninpim angelkuna hamuspan mana allin runakunamanta justo runakunata rakinqa’, nispa (Mateo13:49). Kunanmi chay tukupay tiempopi kawsanchik, chaymi millonnintin runakuna Diospa Gobiernonmanta willakuyta kasukuchkanku (Mateo 24:3, 14).

Arí, manam Bibliata estudiay lliw qallariqkunachu Diospa chaskisqanqa kanku. Jehová Diosqa angelninkunatam servichikun serviqkunata diriginanpaq hinaspa payman sonqokunata mana kasukuy munaqkunamanta rakinanpaq. Jesusqa clarotam nirqa, Diospa favornintaqa haypanqaku ‘cheqap sonqowan Diospa palabranta uyarispa mana qonqaq runakunam, paykunaqa allimanta sumaq ruruq planta hinam kanku’, nispa (Lucas 8:15).

Astawan yachayta munaspaqa ¿Imatapunim Bibliaqa yachachin? niq libropa 10 kaq yachachikuyninta qaway. Kayqa Jehová Diospa testigonkunapa rurasqanmi.

[9 kaq paginapi dibujo]

Angelkunapa rurasqanraykum llampu sonqo runakuna Diospa llaqtanpi kachkanku