¿Imaynatam Jehova Diosqa kuyawasqanchikta qawachiwanchik?

1. (1) ¿Imapaqmi apostol Juanqa kallpanchawanchik? (2) ¿Imanasqataq Jehova Diospa mayna kuyawasqanchikpi yuyaymanananchik?

APOSTOL Juanmi nirqa: “Yuyaymanaychik, mayna-maynatam Dios taytaqa kuyawanchik”, nispa (1 Juan 3:1). Kaynata nispanmi Juanqa kallpanchawanchik Jehova Dios mayna kuyawasqanchikpi, hinaspa kuyawasqanchikta imakunata ruwaspa qawachiwasqanchikpipas yuyaymananapaq. Chaykunapi yuyaymanaspaqa, Jehova Diospa amistadnin kaytam astawan atisun hinaspapas astawanraqmi payta kuyasun.

2. ¿Imanasqataq wakin runakunaqa piensanku Dios mana kuyasqanta?

² Wakin runakunam piensanku Jehova Diosqa mana kuyakuq kasqanta. Ninkutaqmi, payqa kamachikuqlla hinaspa mana kasukuqkunata mana kuyapayaspa castigakuqlla kasqantapas. Wakin religionkunapiqa Diosmanta yachachispankum ninku, payqa mana llakipayakuq kasqanta. Chaymi achka runakuna piensanku Dios kuyaytaqa mana atisqanchikta. Wakin runakunañataqmi piensanku Diosqa lliw runakunata imataña ruwaptinkupas hinalla kuyasqanta. Ñuqanchikmi ichaqa bibliata estudiaspa Jehova Diosmantaqa imam kaqta yachanchik. Bibliapim niwanchik Diosqa kuyawasqanchikrayku churinta ñuqanchikrayku wañunanpaq kachamusqanta (Juan 3:16; 1 Juan 4:8). Chayta yachaspapas, wakin testigokunaqa Dios mana kuyawasqanchiktam piensachwan. Yaqapaschá chaynataqa piensachwan pasaq watakunapi ima mana allinkunapas pasawasqanchikrayku.

3. ¿Imanasqataq ninchik Jehova Dios kuyawasqanchikta?

³ ¿Imanasqataq ninchik Jehova Dios kuyawasqanchikta? Pay unanchawasqanchikrayku hinaspa kawsakuyta quwasqanchikraykum (leey Salmo 100:3-5). Chaymi bibliapiqa Adanmanta rimaspan nirqa Diospa churin kasqanta (Luc. 3:38, NM). Jesucristopas mañakuyta yachachiwaspanchikmi niwarqanchik Jehova Diosqa taytanchik kasqanta (Mat. 6:9). Tukuy kaykunam qawachiwanchik Jehova Diosqa allin tayta hina kuyawasqanchikta.

4. (1) ¿Imayna taytataq Jehova Diosqa? (2) ¿Imakunamantam rimasun kaypi hinaspa qatiqnin yachachikuypi?

⁴ Wakin runakunatam taytankuqa warmallaraq kaptinku llumpayta ñakarichiqku. Chaychá paykunaqa sasachakunku Jehova Diosta kuyakuq taytanta hina qawanankupaqqa. Jehova Diosqa manamá haykapipas ñakarichiwanchikmanchu. Manam pipas kanchu pay hina allin taytaqa (Sal. 27:10). Payqa llumpayta kuyawaspanchikmi ima mana allinkunamantapas harkawanchik. Chayna kuyawasqanchikta qawaspanchikmi ñuqanchikpas astawanraq kuyasun (Sant. 4:8). Kay yachachikuypim yachasun kuyawasqanchikta Jehova Dios imayna qawachiwasqanchikmanta, qatiqnin yachachikuypiñataqmi yachasun Jehova Dios kuyasqanchikta imayna qawachinanchikmanta.

IMAPAS NECESITASQANCHIKTAM QUWANCHIK

5. ¿Imatam Jehova Diosqa lliwchanchikman quwanchik?

⁵ Huk kutipim apostol Pabloqa Atenas llaqtaman watukuq rirqa. Chay llaqtapim rikurqa achkallaña taytacha-mamachakunata. Chaypi runakunam piensaqku chay taytacha-mamachakunapa unanchasqan kasqankuta. Chaymi Pabloqa nirqa: ‘[Jehova] Diosmi unancharqa kay pachatawan tukuy ima kaqkunataqa’, nispa. Nirqataqmi: ‘Payqa lliwchanchikta kawsachiwaspanchikmi samaytapas hinaspa llapa imakunatapas quwanchik’, nispa. Chaykunamanta rimaspanmi nirqaraq: “Paypa yanapakuyninwanmi kawsanchikpas, purinchikpas hinaspa kachkanchikpas”, nispa (Hech. 17:24, 25, 28). Jehova Diosqa tukuy imatam kusisqa kawsakunanchikpaq quwanchik. Qawasunyá kuyawasqanchikrayku imakuna quwasqanchikmanta.

6. ¿Imaynataq Jehova Diospa quwasqanchik allpa pachaqa? (Qaway 21 kaq paginapi dibujota).

⁶ Jehova Diosqa kawsakunanchikpaq sumaq allpatam quwarqanchik (Sal. 115:15, 16). Kay allpa pachanchikmi lliw planetakunamanta aswan sumaqqa. Yachaysapa runakuna achka planetakuna kasqanta yacharuspankupas manam tarinkuraqchu allpa pachanchik hina kawsakunapaq allin planetataqa. Jehova Diosqa kay pachatam unancharqa kawsakunapaq hina tukuy imayuqta, kuyayllapaqta, mana aminapaq hina kaqta hinaspa kusisqa kawsakunapaq (Is. 45:18). Kay allpa pachanchik imayna unanchasqa kasqanpi yuyaymanaspaqa, Jehova Dios kuyawasqanchiktam musyanchik (leey Job 38:4, 7; Salmo 8:3-5).

7. ¿Imaynatawanmi Jehova Diosqa kuyawasqanchikta qawachiwanchik?

⁷ Jehova Diosqa pay hina sumaq kayniyuqkuna kanapaq unanchawaspanchiktaqmi kuyawasqanchiktaqa qawachiwanchik (Gen. 1:27). Chaymi kuyawasqanchikta musyanchik hinaspa pay kuyaytapas atinchik. Lliw warmakunam taytan kuyaptinqa kusikunku, chaynam ñuqanchikpas Jehova Dios kuyawasqanchikta qawaspa kusikunchik. Jesucristopas yachachiwanchikmi Diosta maskaspaqa kusisqa kananchikmanta (Mat. 5:3). Bibliapim niwanchik: ‘Payllam chaninninpiqa llapa imakunatapas kusikunanchikpaq quwanchik’, nispa (1 Tim. 6:17). Kaykunam qawachiwanchik Jehova Diosqa qukuykuq hinaspa kuyakuq kasqanta (Sal. 145:16).

JEHOVA DIOSQA YACHACHIWANCHIKMI

8. ¿Imanasqataq Jehova Dios yachachiwananchikta munanchik?

⁸ Churinkunata kuyaq taytaqa allin kawsakunankupaqmi warmankunata yachachin. Ichaqa, kay tiempopi achka taytakunam mana kaqpaqpas hapinkuchu bibliapa yachachisqantaqa. Chaymi imam allin utaq mana allin kasqanmanta yachachiytapas mana atinkuchu. Chayraykum warmakunaqa iskayrayastin hinaspa hukmanyasqa wiñanku (Prov. 14:12). Jehova Diosmi ichaqa tukuy imata yachasqanrayku churinkunaman allinta yachachin (Sal. 31:5, NM). Kikinmi paymantaqa imam kaqta hinaspa imayna yupaychanapaqpas yachachiwanchik. Yachachiwanchiktaqmi imakunata ruwaspa allinta kawsakunapaqpas (leey Salmo 43:3). Qawasunyá imakunamanta yachachiwasqanchikta.

9, 10. (1) ¿Imanasqam Jehova Diosqa paymanta yachachiwanchik? (2) ¿Imatawanmi niwanchik?

⁹ Puntataqa, Jehova Diosmi riqsinanchikta munaspan paymanta imam kaqta yachachiwanchik (Sant. 4:8). Chaymi sutin Jehova kasqanmanta willawanchik. Chay sutim ima sutimantapas aswan achka kutitaqa bibliapi rikurin. Tukuy unanchasqankunata qawaspataqmi yachaysapa hinaspa tukuy atiyniyuq kasqantapas yachanchik (Rom. 1:20). Bibliata leespañataqmi yachanchik allin ruwaq kasqanta hinaspa kuyawasqanchikta. Chayna kasqanta yachaspanchikmi mana sasachakuspalla astawan asuykusun.

¹⁰ Jehova Diosqa niwanchiktaqmi churinkuna kasqanchikta. Chaymi willawanchik hawkalla hinaspa huk sunqulla yupaychanapaq ima ruwananchikmantapas. Bibliapim niwanchik, imam allin hinaspa mana allin kasqantaqa kikillanchikmanta mana tanteay atisqanchikta (Jer. 10:23). Jehova Diosmi yachan imam allinninchikpaq kasqantaqa. Chaymi payta kasukuspa chaynataq respetaspaqa kusisqa hinaspa hawka kawsakuyta atisun. Jehova Diosqa kuyawasqanchikraykum tukuy kaykunata yachachiwarqanchik.

11. ¿Imamantam Jehova Diosta agradecekunchik?

¹¹ Allin taytaqa, churinkuna wiñaruspa allin hinaspa kusisqa kawsakunankutam munan. Ichaqa yaqa lliw runakunam mana yachankuchu hamuq tiempopi paykunawan ima pasanantaqa. Tukuy imayuq kayta munaspankum llumpayta llamkanku, ichaqa chinkaruqllam tukuy chaykunaqa (Sal. 90:10). Jehova Diosta yupaychaqkunam ichaqa payta agradecekunchik, kunan hinaspa hamuq tiempopi kusisqa kawsakunapaq yachachiwasqanchikmanta.

JEHOVA DIOSQA CORREGIWANCHIKMI

12. ¿Imaynatam Jehova Diosqa Caintawan Baructa yanapayta munarqa?

¹² Jehova Diosqa, Cainpa mana allin ruway munasqanta qawaspanmi yanapayta munarqa. Chaymi nirqa sunqunta tiyachispan piensasqanta mana ruwananpaq. Chayta ruwaptinqa Jehova Diosmi bendecinan karqa (Gen. 4:6, 7). Cainqa manamá kasukurqachu, chaymi ñakariypi tarikurqa (Gen. 4:11-13). Huk kutipiñataqmi Jehova Diosqa Baruc sutiyuq yupaychaqninta qawarqa pisipasqa hinaspa hukmanyasqa tarikusqanta, chaynaqa tarikurqa hukkuna hina kapuqniyuq kayta munaspanmi. Chaymi Diosqa nirqa ama chaynata piensananpaq. Barucqa Diosta kasukusqanraykum hinalla kawsakurqa (Jer. 45:2-5).

13. ¿Imapim Joseyta, Moisesta hinaspa Davidta yanaparqa sasachakuypi tarikusqankuqa?

¹³ Jehova Diosqa kuyawaspanchikmi yachachiwanchik hinaspam mana allinta ruwaptinchikpas corregiwanchik, chaymantapas allin runa kananchikta munaspanmi yanapawanchik (Heb. 12:6). Ñawpaq tiempopipas Jehova Diosqa yupaychaqninkunatam yanaparqa. Josey, Moises hinaspa Davidqa sasachakuypim tarikurqaku. Chayna sasachakuypi tarikusqankum paykunataqa yanaparqa, hamuq tiempopi Jehova Diospa kamachisqanta allinta ruwanankupaq. Yupaychaqninkunata imayna yanapasqanmanta bibliapi leespanchikmi qawanchik Jehova Dios kuyawasqanchikta (leey Proverbios 3:11, 12).

14. ¿Imaynatam Jehova Diosqa pantaruptinchikpas kuyawasqanchikta qawachiwanchik?

¹⁴ Jehova Diosqa pantaruptinchikpas kuyawasqanchiktam qawachiwanchik. Corregiwasqanchikta kasukuspa wanakuptinchikqa pampachaykuwasunmi (Is. 55:7). Kamachiq Davidmi Jehova Diosmanta kaynata nirqa: ‘Paymi tukuy mana allin ruwasqaymanta pampachaykuwan. Paymi tukuy unquymanta ñuqallayta sanoyachiwan. Wañunaymantaraqmi payqa libraykullawan. Llakipayariwaspanmi payqa kuyapayawan’, nispa (Sal. 103:3, 4, 12). Qawamusqanchikman hinaqa Jehova Diosmi yupaychaqninkunata pampachayta munachkan. Chaypaqqa, corregiwasqanchikta kasukuspam mana allin ruwasqanchikkunata saqinanchik. Jehova Diosqa kuyawaspanchikmá corregiwanchik (Sal. 30:5).

MANA ALLINKUNAMANTAM HARKAWANCHIK

15. ¿Imaynatawanmi Jehova Diosqa kuyawasqanchikta qawachiwanchik?

¹⁵ Allin taytaqa tukuytam ruwan churinkuna sasachakuypi mana tarikunankupaq. Chaytam Jehova Diospas ñuqanchikwan ruwan. Bibliapim nin: ‘Payqa waqaychanmi payman sunquyuqkunata. Payqa libranmi mana allin runakunamanta’, nispa (Sal. 97:10). Ñawinchikman imapas yaykuyta utaq tuqpiyta munaptinqa chayllam imatapas ruwanchik mana imanawananchikpaq. Jehova Diospas chaylla tukuyta ruwan mana allinkunamanta harkawananchikpaq. Chaytaqa ruwan kuyawasqanchikraykum (leey Zacarias 2:8).

16, 17. ¿Imaynatam Jehova Diosqa yupaychaqninkunata yanapan?

¹⁶ Angelninkunatam Jehova Diosqa ñawpaqmantaraq valekurqa yupaychaqninkunata yanapananpaq (Sal. 91:11). Huk kutipim chullalla angel huk tutallapi wañurachirqa 185.000 soldadokunata, chaynapim llaqtanta salvarqa (2 Rey. 19:35). Chaymantapas apostol Pedrotawan wakin iñiqmasinkunatam angelkunaqa carcelmanta hurqururqaku (Hech. 5:18-20; 12:6-11). África lawpitaqmi pasaq watakunallapi huk guerra karurqa, chaypim karqa llumpay suwakuykuna, maqanakuykuna, abusaykuna hinaspa wañuchinakuykunapas. Achka iñiqmasinchikkunapas mana imayuqmi qiparurqaku, chaywanpas manam mayqanninkupas wañurqakuchu. Chaymi paykunaqa llumpay sasachakuypi kaspankupas Jehova Dios yanapasqanta qawaspanku kusisqa tarikurqaku. Estados Unidospi kaq betel wasimanta huk iñiqmasinchikmi África lawpi iñiqmasinchikkunata watukuspan imayna tarikusqankumanta tapurqa, hinaptinmi llapallanku nirqaku Jehova Dios yanapasqanrayku allinlla tarikusqankuta.

¹⁷ Jesucristopa wañukusqan qipatam Estebantawan wakin iñiqmasinkunata wañurachirqaku Diosman sunqu kasqankurayku. Chaymi qawachiwanchik Diosqa sapakamata wañuymanta mana harkawasqanchikta. Ichaqa lliw llaqtantam satanaspa tuqllankunaman mana wichiykunanpaq yanapawanchik (Efes. 6:10-12). Bibliapi hinaspa qillqanchikkunapim tarisun chay tuqllakunamanta willawasqanchiktaqa. Willawanchikmi internetpi ima mana allinkuna kasqanmanta, qullqi munapayaymanta, librokunapi, videokunapi hinaspa pukllanapaq kaqkunapi millakuypaq huchapakuykuna chaynataq maqanakuykuna kasqanmanta. Kaykunamanta willawaspanchikmi Jehova Diosqa yanapawasqanchikta hinaspa kuyawasqanchikta qawachiwanchik.

MANAM IMAPAS DIOSPA KUYAKUYNIN HINAQA KANCHU

18. ¿Imaynataq tarikunchik Jehova Dios kuyawasqanchikmanta yachaspaqa?

¹⁸ Moisesqa unay watakunam Jehova Diosta servirqa, chaypi yuyaymanaspanmi Jehova Dios kuyasqanmantaqa mana iskayrayarqachu. Chaymi nirqa: “Achikyamuptinyá kuyakuynikiwan huntaykuwayku. Kawsanaykukamam kusisqa takisaqku”, nispa (Sal. 90:14). Apostol Juanpas nirqam: ‘Yuyaymanaychik, mayna-maynatam Dios taytaqa kuyawanchik’, nispa (1 Juan 3:1). ¡Mayna kusisqam tarikunchik Jehova Dios kuyawasqanchikmanta yachaspanchikqa!