1 KAQ YACHACHIKUY
Diospa kuyakuyninqa wiñaypaqmi
“Diosta kuyayqa kamachikuyninkunata kasukuymi, kamachikuyninkunaqa manam llumpay sasachu” (1 JUAN 5:3).
1, 2. ¿Imanasqataq Jehova Diosta kuyanki?
¿KUYANKICHU Diosta? Yaqapaschá kuyasqaykirayku payllapaqña kawsakunaykipaq tantiakurqanki. Utaq payta anchata kuyasqaykitapas nirqanki. Ichaqa Jehova Diosmi kuyasurqankiña manaraq payta kuyachkaptiki. Bibliam nin: “Diostaqa kuyanchik paypuni puntata kuyawasqanchikraykum”, nispa (1 Juan 4:19).
2 Kaypi yuyaymanay: Jehova Diosqa kuyawasqanchikraykum tukuy imata ruwarqa. Kay allpa pachatam suma-sumaqta unancharqa, hinaspam tukuy imata quwarqanchik kusisqa kawsananchikpaq (Mateo 5:43-48; Apocalipsis 4:11). Diosqa munarqataqmi payta riqsispa kuyananchikta. Chaymi bibliata ñawinchaspanchik Jehova Diosta uyarinchik. Payñataqmi mañakuptinchik uyariwanchik (Salmo 65:2). Chaymantapas chuya espiritunwanmi yanapawanchik hinaspa kallpanchawanchik (Lucas 11:13). Hinaspapas Diosqa kuyasqan churintapas kay pachaman hamunanpaqmi kamachimurqa, chaynapi huchamantawan wañuymanta librawananchikpaq (qaway Juan 3:16; Romanos 5:8).
3. ¿Imaynatam Jehova Dioswan hinalla kuyachikuchwan?
3 Yuyaymanay allinpipas utaq mana allinpipas qanwan kuska kaq amistadnikipi. Chayna amistadniyuq kanapaqqa anchatam kallpanchakunanchik. Chaynatam kallpanchakunanchik Jehova Dioswan hinalla kuyachikunapaqpas. Paywanqa wiñaypaq kuyachikuytam atinchikman. Chaymi bibliaqa nin: ‘Dioswan hinalla kuyachikuychik’, nispa (Judas 21). ¿Imaynatam chayta ruwachwan? Bibliam nin: “Diosta kuyayqa kamachikuyninkunata kasukuymi, kamachikuyninkunaqa manam llumpay sasachu”, nispa (1 Juan 5:3).
“DIOSTA KUYAYQA KAMACHIKUYNINKUNATA KASUKUYMI”
4, 5. ¿Imanasqataq Jehova Diosta kuyayta qallaykurqanki?
4 ¿Imatam 1 Juan 5:3 niyta munachkan ‘Diosta kuyaymanta’ rimaspanqa? Chaypi Diosta kuyaymanta rimaspanqa tukuy sunqunchikmanta kuyananchikmantam rimachkan. ¿Yuyachkankichu haykapi Jehova Diosta kuyayta qallaykusqaykimanta?
Jehova Diosllapaq kawsanaykipaq tantiakuspaykim hinaspa bautizakuspaykim, Jehova Dios kuyasqaykita hinaspa wiñaypaq kasukuy munasqaykita qawachinki.
5 Yuyariy kay pachapi wiñaypaq kawsakunaykita Jehova Dios munasqanmanta yacharuspayki kusikusqaykita. Yacharurqankitaqmi tukuy chaykunata ruwananpaq Jehova Dios kay pachaman churinta kachamusqanmanta (Mateo 20:28; Juan 8:29; Romanos 5:12, 18). Jehova Dios kuyasusqaykimanta yachasqaykiqa sunquykimanchá chayarurqa, chaychá qampas kuyayta qallaykurqanki (qaway 1 Juan 4:9, 10).
6. (1) ¿Imaynatam pitapas kuyasqaykita qawachinki? (2) ¿Imatam ruwarqanki Jehova Diosta kuyasqaykirayku?
6 Pitapas kuyaspaykiqa manam “kuyaykim” niyllachu ninki, aswanqa kusikunanpaq kaqkunatam ruwanki. Chaynallataqmi Jehova Diosta kuyaspaykipas, paypa munasqanman hinaña kawsanayki. Diosta kuyayta qallaykuspaykiqa, Jehova Diosllapaqña kawsakunaykipaq hinaspa bautizakunaykipaqmi tantiakurqanki. Chayta ruwaspaykiqa, Jehova Diostam nirqanki wiñaypaq paypa munayninta ruwanaykipaq (qaway Romanos 14:7, 8). ¿Imataq yanapasunki chayna nisqaykita ruwanaykipaq?
‘KAMACHIKUYNINKUNATA KASUKUY’
7. (1) Jehova Diosta kuyaspanchikqa, ¿imatam ruwasunchik? (2) ¿Imakunata ruwananchiktam Diosqa mana munanchu?
7 Jehova Diosta kuyaspanchikqa ‘kamachikuyninkunatam kasukusunchik’. Bibliapim Jehova Diosqa niwanchik imayna kawsakunanchikta munasqanmanta. Diosqa manam munanchu manaraq casarakuchkaspa piwanpas puñunanchiktaqa, manataqmi munanchu sinkakunanchikta, suwakunanchikta, llullakunanchikta, hinaspa taytacha-mamachata utaq runakunata yupaychananchiktapas (1 Corintios 5:11; 6:18; 10:14; Efesios 4:28; Colosenses 3:9).
8, 9. Imatapas ruwanapaq bibliapi kamachikuy mana kaptinqa, ¿imaynatam yachachwan Jehova Diospa ima munasqanta? Willarimuy.
8 Jehova Diosta kusichinapaqqa manam kamachikuyninkunallatachu kasukunanchik. ¿Imanasqa? Diosqa manam tukuy imapaqchu niwanchik “kaynata utaq waknata ruway” nispaqa. Chaymi bibliapiqa mana tukuy imakunapaqraqchu kamachikuykunaqa kachkan. Hinaptinqa, ¿imaynatam allinta tantianchikman? (Efesios 5:17). Bibliapa yachachikuyninkunawan yanapachikuspam, chaypim niwanchik Jehova Diospa ima piensasqanmanta. Bibliata ñawinchaspam yachanchik Jehova Diospa imayna kasqanmanta. Yachanchiktaqmi imakuna munasqanmanta hinaspa imakuna chiqnisqanmanta chaynataq imayna piensasqanmantapas (qaway Salmo 97:10; Proverbios 6:16-19; qaway 1 kaq willakuyta).
9 ¿Imaynatam tantiachwan televisionpi utaq internetpi imata qawanapaq utaq mana qawanapaqpas? Jehova Diosqa manam niwanchikchu imata qawanapaq utaq mana qawanapaqpas. Ichaqa bibliam yanapawanchik allinta tantiananchikpaq. Yaqa llapallan kusirikuykunapim kunanqa maqanakuyllaña hinaspa huchapakuyllaña qawakun. Bibliapim Jehova Diosqa niwanchik ‘mana allin ruwaq runata chiqnisqanmanta’ hinaspa huchapakuqkunata juzgananmanta (Salmo 11:5; Hebreos 13:4). ¿Imaynatam bibliapa kayna nisqanqa yanapawanchik allinta tantiananchikpaq? Chiqninanchikmi Jehova Diospa tukuy ima chiqnisqantaqa utaq huchapakuytaqa.
10, 11. ¿Imanasqam Jehova Diosta kasukunanchik?
10 ¿Imanasqam Jehova Diostaqa kasukunanchik? Kuyasqanchikraykum, manam castigaruwananchikmanta manchakuspachu utaq mana allinta tantiasqanchikrayku mana allinpi tukurunanchikta manchakuspachu (Galatas 6:7). Imaynam warmachakunapas taytankuta kusichiyta munaspanku kasukunku, chaynam ñuqanchikpas taytanchik Jehova Diosta kusichinapaq kasukunanchik. Arí, Dioswan kuyachikuymi imamantapas aswan allinqa (Salmo 5:12; Proverbios 12:2; qaway 2 kaq willakuyta).
11 Jehova Diostaqa manam atispallachu nitaq munaspallachu kasukunanchik. Manataqmi wakin kamachikuyninkunallatachu kasukunanchikqa (Deuteronomio 12:32). Aswanqa Salmo qillqaq hinam Jehova Diostaqa tukuy imapi kasukunanchik, paymi nirqa: “Kamachikuynikikunatam kuyani, kamachikuynikikunapim kusikuni”, nispa (Salmo 119:47; Romanos 6:17). Chaymantapas Noey hinam kananchik, payqa Jehova Dios kuyasqantam qawachirqa tukuy ima kamachisqanta kasukuspan. Bibliam nin: ‘Noeyqa Diospa kamachisqanman hinam lliwta ruwarqa’, nispa (Genesis 6:22). ¿Munawaqchu qanmantapas Jehova Dios chaynata ninanta?
12. ¿Imaynatam Jehova Diosta kusichichwan?
12 ¿Imaynataq Diosninchikqa tarikun kasukuptinchik? Anchatam kusikun (Proverbios 11:20; 27:11). Mayna allinmi chayqa ¿aw? Chaymi Diosta kusichinanchikpaqqa kamachiwasqanchikta kasukunanchik. Chaypaqqa Diosqa manam hikutawanchikchu. Aswanmi saqiwanchik kikinchik tantiakunanchikta, payqa allinta utaq mana allinta kikinchikmanta tantiakuy atiqtam unanchawarqanchik. Jehova Diosqa munanmi payta kuyasqanchikrayku allin kaqkunata tantiakuspa kusisqa kawsakunanchikta (Deuteronomio 30:15, 16, 19, 20; qaway 3 kaq willakuyta).
“KAMACHIKUYNINKUNAQA MANAM LLUMPAY SASACHU”
13, 14. ¿Imanasqataq Jehova Diospa kamachikuyninkunata kasukuyqa mana llumpay sasachu? Huk tupanachiywan willamuy.
13 ¿Nichwanchu Diospa kamachikuyninkunaqa sasa kasukuy kasqanta utaq mana allinninchikpaq kasqanta? Chaymantam biblia kaynata nin: “Kamachikuyninkunaqa manam llumpay sasachu”, nispa (1 Juan 5:3). Jehova Diospa kamachikuyninkunaqa manam llasaq qipi hinachu utaq manam sasa kasukuychu. Jehova Diosqa ruway atinallanchiktam kamachiwanchik.
14 Yuyaymanariy amistadniki huk wasiman astakuptin yanapasqaykipi. Payqa tukuy imankunatam qipicharunman, wakin qipim llumpayta llasanman, wakinñataq mana. Mana qipiy atisqaykitaqa manam kuyasuqniki amistadnikiqa qipirachisunkimanchu ¿aw? ¿Imaynanpi? Payqa manam munanmanchu llasaqta qipiruspayki unqurunaykitaqa. Jehova Diospas chay kuyakuq amistad hinam ruway atinallanchikta kamachiwanchik (Deuteronomio 30:11-14). ‘Payqa yachanmi imamanta ruwasqa kasqanchikta, riqsinmi allpamanta ruwasqa kasqanchiktapas’ (Salmo 103:14).
15. ¿Imanasqam nichwan Jehova Diospa kamachikuyninkunaqa allinninchikpaq kasqanmanta?
15 Moisesmi Israel runakunata nirqa Jehova Diospa kamachikuyninkunaqa allinninkupaq kasqanmanta hinaspa kasukuspankuqa unayta kawsanankumanta (Deuteronomio 5:28-33; 6:24). Diosqa ñuqanchikmantaqa astawanmi yachan imam allinninchikpaq kasqanta (Romanos 11:33). Chaymi Jehova Diospa kamachikuyninkunaqa allinninchikpaq (qaway Isaias 48:17). Bibliapas ninmi ‘Diosqa kuyakuq’ kasqanta (1 Juan 4:8). Kuyakuq kasqanraykum Diosqa imatapas niwanchik, kuyawasqanchikraykutaqmi imatapas ruwan.
16. ¿Imataq yanapawasun Jehova Diosta kasukunapaq?
16 Diosta mana kasukuq runakunaqa satanaspa makinpim kachkan, satanasmi runakunata kallpanchan mana allinkunata ruwanankupaq (1 Juan 5:19). Chaymantapas pantaq runakuna kasqanchikraykum Diospa mana munasqankunata ruwayta munanchik (Romanos 7:21-25). Ichaqa Jehova Diosta kuyasqanchikmi yanapawasun kallpata hapispa allin kaqta ruwananchikpaq. Payqa kasukunanchikpaq kallpanchakusqanchikta qawamuspanmi chuya espiritunwan yanapawanchik (1 Samuel 15:22, 23; Hechos 5:32). Chayna yanapawasqanchikraykum mana sasachakuspalla Diostaqa kasukunchik (Galatas 5:22, 23).
17, 18. (1) ¿Imamantam kay qillqapi yachasunchik? (2) ¿Imamantam qatiqnin yachachikuypi yachasunchik?
17 Kay qillqapim yachasun Diospa munasqanman hina kawsanamanta. Yachasuntaqmi bibliapa nisqanman hina imaynata kawsakunamantapas. Jehova Diosqa manam haykapipas hikutawanchikchu payta kasukunapaqqa. Ichaqa Diosta kasukunapaq tantiakuspaqa kusisqam kawsakusunchik, hinaspapas wiñay kawsaytam haypasunchik. Chaymantapas astawanraqmi Jehova Dios kuyasqanchikta qawachisun (qaway 4 kaq willakuyta).
18 Jehova Diosqa unanchawarqanchik imam allin utaq mana allin kasqanmanta cuentata qukuqtam. Cuenta qukuq kaspanchikqa chayllam Diosta kasukusunchik. Qatiqninpim yachachkasun imam allin utaq mana allin kasqanmanta chaylla cuenta qukuq kanapaq imata ruwananchikmanta.