Diospa munayninta ruwananchikpaq huñunakuypi yanapawaqninchik qillqapa sapaq yachachikuyninkuna
1-7 MARZO
BIBLIAMANTA ASTAWAN YACHANAPAQ | NUMEROS 7, 8
“¿Imatam yachachiwanchik Israel runakuna campamentopi imayna kawsakusqankuqa?”
it-1-S pag. 523 § 7
Iñiqkuna
Israel nacionpiqa llaqtapa rantinpim kamachikuqkuna imatapas ruwaqku (Esd 10:14). Sapa ayllupa jefenkunam Diosman ofrendankuta aparqaku (Nu 7:1-11). Nehemiaspa tiemponpipas llaqtapi punta apaqkuna, Leviy casta runakuna chaynataq sacerdotekunam llaqtapa rantinpi sellonkuta churarqaku kasukunankupaq (Ne 9:38–10:27). Moisespa hinaspa Aaronpa contranpim huqarikurqaku Corey, Datan, Abiram hinaspa On sutiyuq ancha riqsisqa runakuna. Paykunawan kuskataqmi huqarikurqaku 250 runakunapas, chay umacharachikuq runakunapas karqaku punta apaqkunam chaynataq ancha riqsisqa runakunam (Nu 16:1-3). Moisesmi Diospa nisqanman hina Israel runakunamanta 70 kamachikuqkunata akllarqa, paykunawan kuskam Moisesqa llaqtamanta cuentallikurqaku (Nu 11:16, 17, 24, 25). Levitico 4:15 willawanchik Israel nacionpi punta apaqkunamanta. Chay punta apaqkunaqa llaqtapa rantinpim imatapas tantiaqku chaynataq ruwaqku (Nu 1:4, 16; Jos 23:2; 24:1).
it-2-S pag. 874 § 1
Ruben
Ruben aylluqa Simeonpa hinaspa Gad ayllupa chawpinpim karqaku. Israel runakuna rinanku kaptinmi Ruben, Simeon hinaspa Gad ayllukunaqa Juda, Isacar hinaspa Zabulon ayllukunapa qipanta qatiqku (Nu 2:10-16; 10:14-20). Chayman hinataqmi Diospa carpanta ruwayta tukuruptinkupas ofrendankuta aparqaku (Nu 7:1, 2, 10-47).
w04-S 1/8 pag. 25 § 1
Numeros qillqapa yachachikuyninkunamanta
8:25, 26. Yuyaq Leviy casta runakunaqa manañam Diospa carpanpiqa imam ruwanankutaqa ruwarqakuñachu. Chaywanpas Leviy ayllumasinkutam imachapipas yanapakunmankuraq karqa. Leviy ayllu hayka watankukama yanapakunankupaq Diospa nisqanmantaqa ñuqanchikpas yachachwanmi. Yuyaq iñiqmasinchikkuna ñawpaqpi hina mana ruwayta atispankupas imachapipas yanapakuytam atinmanku.
Ima yachachikuykunatam tariramunchik
it-2-S pag. 717 § 3
Piwi churikunamanta
Israel runakunapa piwi churinkuqa ayllunkupa punta apaqninkum karqa. Jehova Diosqa lliw Israel runakunatam ‘piwi churinta hina qawarqa’, chaynataqa qawarqa Abrahanwan contratota ruwasqanraykum (Ex 4:22). Egipto nacionpi Israel runakunapa piwi churinkunata Jehova Dios mana wañuchisqanraykum payllapaqña sapaqcharqa, payllapaqñataqmi sapaqcharqa animalkunapa punta wawantapas (Ex 13:2). Arí, chaynapimá imapas punta naceqqa Jehova Diospaq sapaqchasqa karqa.
8-14 MARZO
BIBLIAMANTA ASTAWAN YACHANAPAQ | NUMEROS 9, 10
“¿Imaynatam Jehova Diosqa llaqtanta pusachkan?”
it-1-S pag. 403 § 6
Campamento
Israel runakunaqa manam chaqwanpichu maymanpas astakuqkuqa. Diosman asuykuna carpapa hawanpi hinalla puyu kaptinqa Israel runakunapas hinallapim kaqku, chay puyu huqarikuptinñataqmi paykunapas llusiqku. ‘Tayta Dios kamachiptinmi Israel runakunaqa lluqsiqkupas utaq samaruqkupas’ (Nu 9:15-23). Iskay cornetillatam waqachiqku lluqsinankupaq, chay cornetillapa waqasqanta uyarisqankuqa lluqsinankupaq Jehova Diospa nisqanmi karqa (Nu 10:2, 5, 6). Diospa baulnintam puntata apaqku, chaymantam qatiqku Juda, Isacar hinaspa Zabulon ayllu. Chaymantañataqmi riqku Gersonpa miraynin hinaspa Meraripa miraynin Diospa carpanpa tukuy imachankunatapas apastin. Paykunapa qipantañataqmi riqku Ruben, Simeon hinaspa Gad ayllu. Paykunapa qipantañataqmi Coatpa mirayninkuna Diospaq sapaqchasqa kaqkunata apastin riqku. Paykunapa qipantañataqmi Efrain, Manases hinaspa Benjamin ayllu riqku. Paykunapa qipantañataqmi Dan, Aser hinaspa Neftaliy ayllu riqku. Chaynatam Israelpa llapa mirayninqa sapa kuti lluqsirqaku (Nu 10:11-28).
¿Yachanchikchu imaynatam Dios pusawasqanchikta?
¿Imaynatam agradecekuchwan Dios pusawasqanchikmanta? Pablom niwanchik: “Pusasuqnikichik runakunata kasukuspayá paykunaman sujetakuychik”, nispa (Heb. 13:17). Chay ruwayqa manamá facilchu. Piensariy Moisespa tiemponpi huk kaqnin Israel runa kasqaykita. Achka punchawkunaña sayanpa puyuta qatichkawaq. Qunqaymantañataqmi puyu sayarunman. Hinaspam piensanki: “¿Haykapikamaya kaypi sayanqa?, ¿huk punchawllachu, huk semanachu icha achka killakunachu?”, nispa. Hinaptinqa tapukunkichá, ¿imaykunatapas hurqusaqchu?, nispa. Iskayrayaspaykim necesitasqallaykita hurquyta qallarinki. Ichaqa achka punchawkuna pasaruptinmi imaykikunatapas hurqupayasqaykimanta amiruspa llapan imaykikunata hurquruwaq. Hinaptinmi chaylla sayanpa puyuqa pasakuyta qallaykunman, qamñataq tukuy imaykikunata allichayta qallaykuwaq. ¡Hukmanyanapaq hinamá! Ichaqa mana munaspapas wakinkuna hinam chaylla qatinayki (Num. 9:17-22).
¿Imaynatam Diospa pusawasqanchikta kunan qawanchik? ¿Chayllachu kasukunchik icha ñawpaqpi hinachu imatapas ruwanchik? ¿Kasukunchikchu runamasinchikkunaman imaynata yachachinapaq niwaptinchik, huk law nacionniyuqkunaman willakunapaq niwaptinchik, ayllunchikwan Diosta imayna yupaychanapaq niwaptinchik? ¿Kasukunchiktaqchu hatun huñunakuykunapi imayna kanapaq niwasqanchikta chaynataq Comités de Enlace con los Hospitales nisqata imayna yanapanapaq? Agradecekuchwantaqmi Diospa pusawasqanchikmanta lliw niwasqanchikkunata kasukuspa. Chaymi imatapas tantiaspaqa, manam piensasqanchikman hinachu ruwanchik, aswanqa Diospa hinaspa llaqtanpa yanapakuynintam maskanchik. Manchakuypaq imapas hamuptinqa warmachakunaqa tayta-mamanmanmi kallpanku, chaynam ñuqanchikpas sasachakuykuna kaptin iñiqmasinchikkunapa yanapakuyninta maskananchik.
Ima yachachikuykunatam tariramunchik
it-1-S pag. 226 § 4
Hatun huñunakuykuna
Huñunakuyninchikkuna imanasqa ancha allin kasqanmanta. Huñunakuyninchikkunaman riy ancha allin kasqantam yachachwan pascua fiesta ruwasqankumanta yachaspanchik. Pascua fiestata ruwananpaq hina kachkaspan utaq mana illaruchkaspan pascua fiestata mana ruwaqqa wañuchisqam kanan karqa. Wañunanqa karqa llullanta mana ruwasqanraykum (Nu 9:9-14). Kamachiq Ezequiaspas Juda runakunata chaynataq Israel runakunatam Jerusalenman qayachirqa pascua fiestata ruwanankupaq, kaynatam nirqa: ‘Israelpa mirayninkuna, qamkunaqa kutirikuychikyá tayta Diosman [...]. Amayá abueloykichikkuna hinaqa sunquykichikta rumiyachiychikchu. Tayta Diospa kamachikuyninkunatayá kasukuychik, hinaspayá hamuychiktaq paypa wiñaypaq sapaqchasqan santuarionmanpas. Yupaychasqanchik tayta Diosta serviptikichikqa paypa piñakuyninmi qamkunamanta asurinqa [...]. Yupaychasqanchik tayta Diosqa llakipayakuqmi hinaspa kuyapayakuqmi, payman kutirikuptikichikqa payqa manam saqisunkichikchu’, nispa (2Cr 30:6-9). Pascua fiestata mana ruwaq Israel runaqa Jehova Diostam qipanchachkarqa. Ñuqanchikqa manañamá pascua fiestataqa ruwanchikchu, ichaqa apostol Pablom kallpanchawarqanchik huñunakuyman riyta mana saqinapaq. Paymi nirqa: ‘Chaynaqa, sunqumanta kuyanakuspayá llapallanchik kallpanchanakusun kuyakuq hinaspa allin ruwaq kananchikpaq. Wakinkunapa costumbrasqanman hinaqa amayá huñunakuyman riytaqa saqisunchu, aswanqa Diospa punchawnin chaylla chayamunanta yachaspayá llapallanchik astawan kallpanchanakusunchik’, nispa (Heb 10:24, 25; qaway CONGREGACIÓN).
15-21 MARZO
BIBLIAMANTA ASTAWAN YACHANAPAQ | NUMEROS 11, 12
“¿Imanasqataq mana rimapakunanchikchu?”
w01-S 15/6 pag. 17 § 20
Ñawpaqpi pasakusqanmanta yachasunchik
20 Jehova Diosta serviqkunaqa wakillankum huchapakuyman wichinku. Chayna kaptinpas llapallanchikmi qawarikunanchik mana rimapakuq kanapaq. Rimapakuq kaptinchikqa Diosmi qipancharuwasun. Apostol Pablom niwanchik: “Amataqyá wakinnin hinaqa Jehova Diostapas pruebaman churasunchu, chaymi culebrapa kachusqan wañurqaku. Amataqyá wakinkuna hinaqa hukkunamanta rimapakuqchu kasunchik, wakinkunam chayna karqaku chayraykum paykunataqa angel wañurachirqa”, nispa (1 Corintios 10:9, 10). Israel runakunam Moisespa, Aaronpa chaynataq Diospa contranpi rimarqaku. Rimarqakuqa “maná” sutiyuq mikuyta manaña mikuyta munasqankuraykum (Numeros 16:41; 21:5). Chay rimapakuq Israel runakunatam Jehova Diosqa culebrawan kachurachispan wañurachirqa. Jehova Diosqa paypa contranpi rimaytaqa huchapakuyta hinam qawan (Numeros 21:6). Chaymanta puntatapas, 14.700 Israel runakunatam Jehova Diosqa wañurachirqa paypa contranpi rimasqankurayku (Numeros 16:49). Chaynaqa, amayá rimapakusunchu Diospa imapas quwasqanchikmantaqa, mana chayqa Diosninchikmi ñuqanchikpaq piñakunman.
w06-S 15/7 pag. 15 § 7
Ama rimapakuspayá imatapas ruwasun
7 Egipto nacionmanta Dios libraruptin hinaspa puka lamar quchata Dios chimparachiptinmi Israel runakunaqa Diospaq takirqaku agradecekusqankurayku (Exodo 15:1-21). Chunniqpi kaspankum ichaqa, agradecekuq kanankumantaqa tukuymanta rimapakurqaku. Rimarqakum Diosqa ñakarinankupaq Egiptomanta hurqusqanta, manamá Jehova Diostaqa agradecekurqakuchu tukuy ima qusqanmantaqa. Chaymi Jehova Dios nirqa: “¿Haykapikamataq uyarisaq Israelpa mirayninkunapa rimayninta? Contraypi mana allinkuna rimasqankutam uyarichkani”, nispa (Numeros 14:27; 21:5).
it-2-S pag. 855 § 2
Piñanakuy
Rimapakuy. Egipto nacionmanta lluqsiramusqanku qipatam Israel runakunaqa Jehova Diospa contranpi rimarqaku. Rimarqakum Moises hinaspa Aaron punta apaqninku kasqankumanta (Ex 16:2, 7). Chayna rimasqankuraykum Moisespas wañukuytaña munarqa (Nu 11:13-15). Pipas rimapakuqllaña kaqqa wañuymanpas chayanmanmi. Moisespa contranpi rimaqkunatam Jehova Diosqa qawarqa paypa contranpipas rimasqankuta hina (Nu 14:26-30). Achkallay-achka Israel runakunam Diospa contranpi rimasqankurayku wañururqaku.
Ima yachachikuykunatam tariramunchik
it-2-S pag. 288
Maná
“Maná” sutiyuq mikuy imayna kasqanmanta. Maná sutiyuq mikuyqa rikchakurqa ‘culantropa mugunmanmi’, colorninñataqmi rikchakurqa belio sutiyuq sachapa wiqinman. Gustonñataqmi karqa “mielniyuq galleta hina” utaq ‘aceitewan ruwasqa tanta hina’. Maná sutiyuq mikuytaqa maraypi utaq muchkapi kutaruspankum yanuqku mankapi utaqmi tortata ruwaqku (Ex 16:23, 31; Nu 11:7, 8).
22-28 MARZO
BIBLIAMANTA ASTAWAN YACHANAPAQ | NUMEROS 13, 14
“Diospi hapipakuspaqa manam manchakusunchu”
w06-S 1/10 pag. 17 § 5, 6
Jehova Diospi hapipakuspaqa manam manchakusunchu.
5 Diospa prometesqan allpata watiqamuq Josueywan Calebqa chay allpamanmi yaykuytaña munarqaku, chaymi nirqaku: ‘Chay allpapi runakunataqa amayá manchakusunchu. Paykunataqa tantata mikuchkaq hinam facillata vencerusunchik. Paykunataqa manam pipas yanapanchu. Ñuqanchikwanmi ichaqa tayta Diospuni kachkan’, nispa (Numeros 14:9). ¿Imanasqataq paykunaqa mana manchakurqakuchu? Paykunaqa qawarqakum Egipto nacionniyuq runakunata chaynataq taytacha-mamachankutapas Jehova Diosqa ñakarichisqanta. Qawarqakutaqmi Jehova Diosqa Egipto nacionta kamachiqta chaynataq soldadonkunatapas puka lamar quchapi wañuchisqanta (Salmo 136:15). Chaytaqa paykunawan kuska allpata watiqamuqkunapas qawarqakum, chaymi mana manchakunankuchu karqa. Chayraykum Jehova Dios nirqa: ‘¿Haykapikamataq kay runakuna piñachiwanqa? ¿Haykapikamataq mana creewanqakuchu paykunapa qayllanpi tukuy señalkunata ruwachkaptiypas?’, nispa (Numeros 14:11).
6 Israel runakunatam Jehova Dios nirqa pisi iñiyniyuq kasqankurayku manchakusqankumanta. Arí, pisi iñiyniyuq kaspaqa imatapas manchakuchwanmi. Chaymi apostol Juanpas nirqa allin iñiyniyuq kaspaqa Diosta mana yupaychaq runakuna hina mana kanamanta (1 Juan 5:4). Kay tiempopipas, Josuey hinaspa Caleb hinam Jehova Diosta serviqkunaqa kanku. Chaymi musu kaspapas, yuyaq kaspapas atinchik hinalla Diosmanta willakuyta. Manamá pipas Diosmanta willakuyninchiktaqa harkakuyta atinchu (Romanos 8:31).
Ima yachachikuykunatam tariramunchik
it-1-S pag. 740
Israel runakunaman Diospa qusqan allpa imayna kasqan
Israel runakunaman Diospa qusqan allpaqa allin allpam karqa. Chay allpaman watiqaqkunata Moises kachaptinmi paykunaqa kutimurqaku higosta, granadasta chaynataq uvasta apamuspa. Chay uvastaqa iskay runakunam kallmantinta kaspipi hombrokuykuspa apamurqaku. Watiqamuqkuna chay allpapi yachaq runakunata manchakuspankupas willakurqakum chay allpaqa ‘tukuy imapapas kanan allpa kasqanta’ (Nu 13:23, 27).
29 MARZO–4 ABRIL
BIBLIAMANTA ASTAWAN YACHANAPAQ | NUMEROS 15, 16
“Amayá hatun tukusunchu nitaq kikillanchikpiqa hapipakusunchu”
¿Riqsiwanchu Jehova Dios?
12 Ichaqa prometesqa allpaman risqankupim, Coreyqa manaña allinpaqñachu qawarqa Diospa llaqtan imayna pusasqa kasqanta. Chaymi 250 riqsisqa Israel runakunawan munarqa tantiasqankuna ruwakunanpaq. Yaqapaschá piensarqaku Diospa chaskisqan kasqankuta, chayraykum Moisespa contranpi huqarikurqaku. Moisestawan wawqin Aarontam nirqaku: “¡Chaynallañayá qamkunapa munaychakuynikichikqa kachun! Llapallan kay runakunapas Diospa sapaqchasqanmi kachkan, chaynataqmi paykunawantaq tayta Diospas kachkan”, nispa (Num. 16:1-3). ¡Hatunchakuq kasqankutamá qawachichkarqaku! Piñakurunanmantaqa Moisesmi nirqa: ‘Diosmi qawachiwasunchik [...] pim paypaq sapaqchasqa kasqanta’, nispa (qaway Numeros 16:5). Paqarinnintintam Coreywan yanapaqninkuna wañuchisqa karqaku (Num. 16:31-35).
¿Riqsiwanchu Jehova Dios?
11 Moisestawan Coreytaqa manam chaynallatachu Jehova Diosqa qawarqa. ¿Imanasqa? Paykunaqa manam chaynallatachu qawarqaku Diospa kamachisqankunataqa. Coreyqa Leviy kastamantam karqa, Coat ayllumanta. Payqa qawarqam puka lamar quchamanta Dios llaqtanta salvasqanta, allinpaqmi qawarqa Sinai urqupi mana kasukuqkunata Dios wañuchisqanta hinaspa yanaparqataqmi Diospa baulnin apasqa kananpaqpas (Ex. 32:26-29; Num. 3:30, 31). Yaqachusmi unay wata Diosman sunqu karqa, chayraykum achka Israel runakuna respetarqaku.
Ima yachachikuykunatam tariramunchik
w98-S 1/9 pag. 20 § 1, 2
Aswan allin kaqkunata puntapi churasun
Samana punchawta mana respetaq runata wañuchinankupaqmi Jehova Dios nirqa. Moisestam nirqa: “Chay runaqa wañunqapunim”, nispa (Numeros 15:35). ¿Imanasqataq wañuchinankupaq nirqa?
Israel runakunapaqqa suqta punchawmi karqa kikinkupaq tukuy imata ruwanankupaq. Chay punchawkunam mikunankupaq llamkakunanku karqa, chaynataq yantatapas huñunanku karqa. Qanchis kaq punchawñataqmi Diosllapaq sapaqchasqa karqa. Chay punchawmi Diosmanta yachananku karqa. Yanta huñuyqa manam huchachu karqa, ichaqa Diosta yupaychananku punchawraq yanta huñuyqa manam allinchu karqa. Ñuqanchikqa manañamá qanchis punchawpi samanapaqqa kamachisqañachu kanchik, chayna kaptinpas kayqa yachachiwanchikmi aswan allin kaqkunata puntapi churanapaq (Filipenses 1:10).
5-11 ABRIL
BIBLIAMANTA ASTAWAN YACHANAPAQ | NUMEROS 17-19
“‘Ñuqam kasaq [...] herenciayki’”
¿Jehova Diosqa herencianchikchu?
9 Kaqmanta rimasun Leviy castakunamanta. Paykunaqa manam ima allpatapas herenciata hinaqa chaskirqakuchu. Chaywanpas Diospa santuarionpi servisqankuraykum Jehova Diosqa kaynata nirqa: ‘Ñuqam kasaq tocanciayki chaynataq herenciaykipas’, nispa (Num. 18:20). Ñuqanchikqa manamá Diospa santuarionpichu servinchik, chayna kaptinpas allinmi kanman Leviy kastakuna hina Jehova Dios imapipas yanapawananchikta suyayqa. Chayna iñiyniyuq kayqa ancha allinmi tukupay punchawkunapi kasqanchikrayku (Apo. 13:17).
Jehova Diosmi herencianchikqa
4 Qawasqanchikman hinaqa, Leviy kasta runakunaqa manam allpataqa chaskirqakuchu, aswanmi “herenciankupaq” chaskirqaku “Diospaq sacerdoten” kanankupaq (Jos. 18:7). Chaymi paykunata Diosqa nirqa: ‘Ñuqam kasaq tocanciayki’, nispa (Num. 18:20). Hinaptinqa, ¿yaqachu wakchayaypi kananku karqa mana allpayuq kasqankurayku? Manamá (qaway Numeros 18:19, 21, 24). Diospa ‘carpanpi servisqankuraykum’, Israelpi lliw ayllukunaqa cosechasqankumantawan animalninkunamanta diezmota qunanku karqa. Leviy kasta runakunapas chaskisqankumantam sacerdotekunapaq diezmota qunanku karqa (Num. 18:25-29). Sacerdotekunaqa chaskirqakutaqmi Israel runakunapa ‘Diospaq sapaqchasqanku ofrendakunata’. Chaynaqa, sacerdotekunaqa manamá iskayrayanmankuchu karqa ima necesitasqankutapas Dios qunanmanta.
Ima yachachikuykunatam tariramunchik
Diospa kuyakuyninpiyá takyasunchik
Jehova Diosta serviqkunaqa tukuy imapim limpio kananchik. Jehova Diosmi Israel runakunata yachachirqa limpio kayqa ancha allin kasqanta (Lev. 15:31). Moisesman qusqan kamachikuypim nirqa: Imapas mana serviqkunata wischunankupaq, servicionkuta mayllanankupaq, makinkutawan chakinkuta mayllakunankupaq chaynataq pachankuta taqsakunankupaqpas (Ex. 30:17-21; Lev. 11:32; Num. 19:17-20; Deu. 23:13, 14). Diospa kamachikuy qusqanmi Israel runakunata yuyarichirqa Jehova Diosninku limpio hinaspa chuya kasqanta. Chaymi ñuqanchikpas, chuya Diosta serviqkunaqa limpio kananchik (qaway Levitico 11:44, 45).
12-18 ABRIL
BIBLIAMANTA ASTAWAN YACHANAPAQ | NUMEROS 20, 21
“Hukkuna piñachiwaptinchikpas hawkallayá kasun”
Llampu sunqu kaspayá Dioswan kuyachikusun
19 Chayta ruwaspaqa manam anchatachu pantasun. Moisesqa achka watakunam llampu sunqu karqa, hinaspapas ruwasqanwanmi Diosta kusichirqa. Ichaqa chunniqpi yaqa 40 wataña kachkaptinkum, Moisesqa mana llampu sunquyuq kasqanta qawachirqa. Panin Miriamta Cades lawpi pampasqanmanta qipallatam Israel runakunaqa kaqmanta rimapakuyta qallaykurqaku. Bibliaqa ninmi mana yaku kasqanrayku ‘Moisespa contranpi rimasqankuta’. Moisesnintakama Jehova Dios achka milagrokuna ruwasqanta qawachkaspankupas, hinaspa achka wataña Moises paykunata yanapachkaptinpas, hinallam rimapakuchkarqaku. Mana yaku kasqanrayku paypas huchayuq kanman hinam mana allinta rimarqaku (Num. 20:1-5, 9-11).
Llampu sunqu kaspayá Dioswan kuyachikusun
20 Chaykunawan piñarikuspanmi Moisesqa manaña llampu sunquchu karqa. Jehova Diosqa nirqa yaku lluqsinanpaq qaqata rimapayananpaqmi. Moisesñataqmi piñarikuspan Israel runakunata nirqa qaqamanta yakuta hurqunanpaq. Tawnanwan iskay kutikama qaqata waqtaruptinmi qaqamanta yaku pawayta qallaykamurqa. Hatun tukuspa piñarikusqanwanmi mana allin ruwayman chayarurqa (Sal. 106:32, 33). Llampu sunqu kayninta Moises chay kutipi qunqaykurusqanraykum Jehova Diosqa suyasqanku allpaman manaña yaykunanpaq nirqa (Num. 20:12).
21 Moisesta pasasqanmanta, ¿imatam yachachwan? Llampu sunqu kanapaqqa hinallam kallpanchakunanchik. Manachayqa qunqayllamantam hatun tukuqña rikuriruchwan, hinaspa rimayninchikpi utaq ruwayninchikpipas muspaypi hinaña ruwayta qallaykuchwan. Chaymantapas sasachakuyqa hukmanyarachiwachwanmi, chaymi anchata kallpanchakunanchik sasachakuypi tarikuspapas llampu sunqulla kanapaq.
Diosqa justicianman hinam imatapas ruwan
Diosqa manamá Moisestaqa kamachirqachu Israel runakunata imatapas ninanpaqqa, manam ninanpaschu karqa mana kasukuqkuna nispaqa. Manataqmi Moiseswan Aaronqa Diostaqa hatuncharqakuchu. Chaymi Diosqa castigarurqa (12 versiculo). ‘Yakuta pawarachimuymanku’ nispanqa Moisesqa nichkarqam, paykuna yakuta hurqunankumanta. Chaymantapas, Diospa chayna castigasqanqa tuparqam wakin chayna castigasqanwan. Yuyarisuntaq, ñawpaqpipas Canaan llaqtaman mana yaykunankupaqmi wakinkuta castigarqa (Numeros 14:22, 23). Chaynataq punta apaqkuna kasqankuraykum, Diosqa paykunamanta suyarqa aswan allinta ruwanankuta (Lucas 12:48).
Ima yachachikuykunatam tariramunchik
Hukmanyasqakunata Jehova Dios hina qawasun
12 Chay mana allin ruwasqankunamantam Jehova Diosqa Aaronta chaylla castigarunman karqa. Ichaqa, Jehova Diosqa yacharqam Aaron pantaq runa kaspanpas allin sunquyuq kasqanta. Yaqachusmi Aaronqa hukkunapa intusqan kasqanrayku chay mana allinkunata ruwarurqa. Chayna kaptinpas, Aaronqa chayllam riqsikurqa pantasqankunamanta hinaspam Diospa tukuy tantiasqanta hawka kasukurqa (Ex. 32:26; Num. 12:11; 20:23-27). Jehova Diosqa Aaronpa iñiyninpi hinaspa wanakusqanpim astawan repararqa. Pachaknintin watakuna pasaruptinpas, Aaronwan mirayninkunaqa Diosta kasukuq runakuna kasqankuwanmi yuyarisqa karqaku (Sal. 115:10-12; 135:19, 20).
19-25 ABRIL
BIBLIAMANTA ASTAWAN YACHANAPAQ | NUMEROS 22-24
“Diospa llaqtantam ñakayta munarqaku, ichaqa Jehova Diosmi bendicionman tikrarurqa”
bt-S pag. 53 § 5
‘Jesusmanta sumaq willakuytam willarqa’
5 Kunan tiempopas, ñawpaqpi hinam Diosmanta willakuyninchiktaqa mana harkakuyta atinkuchu. Chiqniwaqninchikkunam carcelkunaman utaq huk law llaqtakunamanpas apawanchik manaña willakunanchikpaq. Ichaqa, chaypipas hinallam Diosmanta willakunchik. Iskay kaq hatun guerra kaptinmi Alemania nacionpi iñiqmasinchikkunata carcelman aparurqaku. Chaypipas paykunaqa mana manchakuspankum hinalla Diosmanta willakurqaku. Chay carcelpi kaspa Jehova Diosninchikta riqsiq huk iñiqmasinchikmi nin: “Ñuqawan kaq testigokunaqa hawkallam kaqku. Chayna hawkallaqa kaqku bibliapa nisqankunamanta mana iskayrayasqankuraykum. Chayta qawaspaymi ñuqapas testigo kanaypaq kallpanchakurqani”, nispa.
it-2-S pag. 250
Locoyay
Jehova Diospa contranpi hatariyqa yanqam. Balaam sutiyuq runam Moab nacionta kamachiq Balacmanta qullqita chaskikuyta munasqanrayku Israel runakunata ñakayta munarqa. Jehova Diosqa manam saqirqachu chayta ruwanantaqa. Balaanmantam apostol Pedro kaynata nirqa: “Huk asnom mana rimaq kachkaspanpas runa hina rimariruspan Balaam runapa loco hina ruwananta harkarurqa”, nispa (2Pe 2:15, 16; Nu 22:26-31).
Ima yachachikuykunatam tariramunchik
w04-S 1/8 pag. 27 § 2
Numeros qillqapa yachachikuyninkunamanta
22:20-22. ¿Imanasqataq Jehova Diosqa Balaam sutiyuq runawan piñakururqa? Jehova Diosmi Balaam sutiyuq runata nirqa Israel runakunata ama ñakaq rinanpaq (Numeros 22:12). Ichaqa Balaam sutiyuq runaqa qullqita chaskikuyta munasqanrayku chaynataq Moab nacionta kamachiq runata kusichiyta munasqanraykum Diospa nisqantaqa mana kasukurqachu (2 Pedro 2:15, 16; Judas 11). Mana munastinmi Israel runakunata bendecirqa. Kamachiqpa allin qawasqan kayta munasqanraykum kamachiqta nirqa baal taytacha yupaychaq warmikuna Israel runakunapa kasqanman rispa sumaq rimaykunallawan huchapakuyman wichichinankupaq (Numeros 31:15, 16). Qullqita chaskikuyta munaspan mana kasukusqanraykum Jehova Diosqa Balaanwan piñakururqa.
26 ABRIL–2 MAYO
BIBLIAMANTA ASTAWAN YACHANAPAQ | NUMEROS 25, 26
“Huk runallapapas Diosman sunqu kasqanqa yanapawachwanmi”
¡Amayá huchapakusunchu!
KAYPI yuyaymanay: Pipas challwa hapiqqa yachanmi maypi achka challwakuna kasqanta. Hinaspam anzueloman ima uruchatapas hinaykuspan yakuman wischuykun. Payqa pacienciawanmi suyan anzuelopi uruchata challwa kachuramunanta, kachuruptinmi kallpawan chutaspan challwata yakumanta hurqun.
2 Runakunapas wichiykuchwanmi ima tuqllamanpas. ¿Imaynata? Chaymanta yachanapaqyá yuyarisunchik Israel runakunata ima pasasqanmanta. Manaraq prometesqa allpaman yaykuchkaptinkum Moab law pampakunapi samarqaku. Moab nacionta kamachiq runam Balaam sutiyuq runata nirqa Israel runakunata ñakaykuptin achka qullqita qunanmanta. Hinaptinmi Balaamqa tantiarurqa Israel runakunata huchallichinanpaq, chaynapi Jehova Dios paykunata manaña yanapananpaq. Chaymi achka sipaskunata kamachirqa Israel runakunapa kasqanman rispanku qarikunawan huchapakunankupaq (Numeros 22:1-7; 31:15, 16; Apocalipsis 2:14).
¡Amayá huchapakusunchu!
4 ¿Imanasqam achka Israel runakunaqa huchapakururqaku? Kikillankupaq munaq kasqankuraykum hinaspa aychanku kusichiyta munasqankuraykum. Qunqarurqakutaqmi Jehova Dios paykunapaq tukuy ima ruwasqantapas. Diosqa paykunatam Egipto nacionpi sirviente kasqankumanta hurqumurqa, chunniqpipas mikuchirqam, prometesqa allpapa hichpankamataqmi hawkallata hinaspa sumaqllata pusarqa (Hebreos 3:12). Tukuy chaykunaraykum paykunaqa Diosman sunqu kananku karqa. Ichaqa huchapakururqakum. Chaymi apostol Pablo nirqa: ‘Amayá wakinkunapa huchapakusqankuman hinaqa huchapakusunchu’, nispa (1 Corintios 10:8).
Ima yachachikuykunatam tariramunchik
it-2-S pag. 238 § 1, 2
Lindero
Israel runakunaqa allpataqa rakinakurqaku suerteaspam chaynataq hayka kasqankuman hinam. Suertearqakum maypi tupananta yachanankupaq. Suerteaptinku maypi tupasqanqa Jehova Diosmantam hamuq, chaymi mana piñanakurqakuchu (Pr 16:33). Chaynapimá Diosqa tupachirqa manaraq wañukuchkaspan Jacobpa willakusqanwan. Jacobmi willakurqa churinkuna imayna kanankumanta, chaytam tarinchik Genesis 49:1-33.
Maypi tupasqanta yacharuspankuqa tantiaqkutaqmi allpanku mayna hatun kananmanta, chaypaqqa sapa ayllu hayka kasqankutam qawaqku. Diosmi nirqa: ‘Kastaykichikman hinam sorteaspa herencia allpata chaskinkichik, achka kaqkunamanqa hatun herenciatam qunkichik, aslla kaqkunamanñataqmi qunkichik taksallata. Suerte tupasqanman hinam sapakama may law sitiopipas chaskinkichik’, nispa (Nu 33:54). Arí, allpa tupasqankuqa hatunpas utaq taksapas karqa hayka kasqankuman hinam. Chayraykum Juda ayllupa allpantaqa Simeon aylluman partirqaku Juda ayllupaq ancha hatun kasqanrayku (Jos 19:9).