Jesuswan qatiqninkunaqa ñam kimsa tutaña Jerico lawmanta hamuspanku Betania llaqtapi puñurqaku. Hinaspam nisan killapa 10 kaq punchawnin madrugawta Jerusalenman kaqlla rirqaku, chayqa lunes punchawñam karqa. Jesusñataqmi yarqaymanta kaspan higos sachata rikuruspan asuykurqa.

Ichaqa marzo killa tukuy kasqanraykum manaraq higos tiempoqa chayamurqaraqchu, chayqa junio killamantaraqmi qallariq. Chayna kaptinpas Jesuspa rikusqan higospaqa rapinkunam iklliramurqaña. Chaychusmi Jesusqa ruruyuq kasqanpaq hapirqa, ichaqa manam rurunqa karqachu, yanqallam rapisapaqa karqa. Chaymi Jesus nirqa: “Pipas amañayá haykapipas ruruykitaqa mikuchunchu”, nispa (Marcos 11:14). Hinaptinmi sachaqa chakiyta qallaykurqa. Chaypa ima ninan kasqantam Jesusñataq paqarintinta yachachinan karqa.

Chaymantam Jesusqa qatiqninkunawan kuska Jerusalenman chayarurqaku, hinaspam domingo inti waqtaykuyta qawarisqan Diospa wasinman rirqa. Chayaruspanñataqmi kimsa wata ñawpaqta 30 kaq watapi pascua fiestapi ruwasqanman hina ruwarqa (Juan 2:14-16). Jesusqa rantiqkunatawan rantikuqkunatam qarqurqa, tikrarqataqmi qullqi cambiaqkunapa mesankutawan paloma rantikuqkunapa tiyanankutapas (Marcos 11:15). Manam munarqachu Diospa wasinpa patiollantaña chimpaspa imatapas apanankutaqa.

Hinaspam Jesusqa imanasqa qullqi cambiaqkunawan hinaspa animalchakuna rantikuqkunawan chayna ruwasqanmanta nirqa: “¿Manachu qillqasqa kachkan: ‘Llapallan nacionkunapaqmi wasiyqa sutichasqa kanqa Diosta mañakuna wasiwan’, nispa? Qamkunam ichaqa suwakunapa machaynintaña ruwarunkichik”, nispa (Marcos 11:17). Chaynataqa nirqa Diospaq kañapunanku animalkunata llumpay qullqipaq rantikusqankuraykum, chayqa suwakuyñam karqa Jesuspaqqa.

Chayta yacharuspankum riqsisqa sacerdotekunaqa, escribakunaqa hinaspa llaqtapi riqsisqa runakunapas aswanraq Jesusta wañurachiyta munarqaku. Ichaqa manam imayna ruwayta atirqakuchu achka runakuna Jesusman hinalla risqankurayku.

Pascua fiestamanqa manam judio runakunallachu karukunamantaqa rirqaku, aswanqa judio religionman yaykuqkunapas rirqakum. Wakinmi karqaku Diosta yupaychanankupaq riq Grecia nacionniyuq runakuna. Chay runakunam Felipeman asuykurqaku ichapas sutinqa griego rimaymanta kasqanrayku, paykunaqa Jesuswan tupaykuytam munarqaku. Felipeñataqmi hukmanpaq hina hapispan Andresta tapukurqa. Chaymi iskayninku Diospa wasinpiraq Jesus kachkaptin willaq rirqaku.

Jesusqa wañukunanpaqña kasqantam yacharqa, chaymi manaña munarqachu hukkunawanpas riqsichikuytaqa. Hinaspam iskay qatiqninkunata rikchanachiywan nirqa: “Horam chayaramun runapa churin hatunchasqa kananpaq. Chiqaptapunim nikichik: Allpaman wichiq trigopa muhun mana chinkaspanqa manam rurunchu, muhu chinkaruspanmi ichaqa achkallataña rurunqa”, nispa (Juan 12:23, 24).

Chullalla muhu trigoqa yanqapaq hinallam rikchakun, tarpurusqam ichaqa wiñayta qallarispan achkamanña mirarun. Jesuspas chullalla muhu hinam karqa, chaymi wañukunankama Diosman sunqu kaspan wiñay kawsayta tarinankupaq kallpanchakuqkunata yanapanan karqa. Chayraykum nirqa: “Pipas vidallan kuyaqqa vidantam pierderunqa, pipas kay pachapi vidan chiqniqmi ichaqa vidanta waqaychanqa wiñay kawsayniyuq kananpaq”, nispa (Juan 12:25).

Jesusqa lliwpaq imatapas munaspanmi nirqa: “Pipas serviwayta munaspanqa qatiwachunyá, payqa maymi kasqaypipas serviqniymi kanqa. Pipas serviwaqniytaqa taytaymi hatunchanqa”, nispa (Juan 12:26). ¡Ima sumaqmi chayqa! Taytanpa hatunchasqan kaqkunaqa Jesuswan kuskam Diospa munaychakuyninpi kanqaku.

Llumpayta ñakarispan wañuchisqa kananta yachaspanmi Jesusqa nirqa: “Kunanqa llumpay hukmanyasqam kachkani, ¿ima nisaqtaq? Taytalláy, salvaykuway kay ñakariy horamanta”, nispa. Chaywanpas Jesusqa Diospa munayninta ruwayta munaspanmi nirqa: “Ichaqa kay ñakariy horamanmi hamurqani”, nispa (Juan 12:27). Jesusqa mana rimapakuspallanmi taytanpa munayninta ruwarqa runakunapa rantinpi wañukunankama..

Nisan killapa 10 kaq punchawninpiqa hinallaraqmi Jesusqa Diospa wasinpi willakurqa wañukunanmanta, chayqa hina lunes punchawmi karqa. Payqa manam munarqachu taytan pinqaypi kanantaqa, chaymi nirqa: “Taytalláy, sutikita hatunchay”, nispa. Hinaptinmi hanaq pachamanta kallpawan nimurqa: “Hatuncharuniñam, chaywanpas huktawanraqmi hatunchasaq”, nispa (Juan 12:27, 28).

Runakunañataqmi mana imanakuytapas atirqakuchu. Wakinmi rayopa tuqyasqanta hina uyarirqaku, wakinñataqmi nirqaku: “Angelmi paytaqa rimapayaramun”, nispa (Juan 12:29). Ichaqa Jehova Diosmi rimaramurqa. Diospa rimamusqanqa uyarikurqañam Diosmanta willakuyta Jesus qallarisqanmantapacha.

Kimsa wata parten ñawpaqta Jesus bautizakuptinmi bautizaq Juan uyarirqa: “Paymi churiy, paytam kuyani hinaspapas chaskinim”, nispa Diospa nisqanta. Chaymantapas 32 kaq watapi pascua fiesta pasayta Jesuspa rikchaynin tikrakuruptinmi Santiagopas, Juanpas hinaspa Pedropas uyarirqaku: “Paymi kuyasqay churiy, paytam kuyani hinaspapas chaskinim, uyariychikyá”, nispa Diospa nisqanta (Mateo 3:17; 17:5). Ichaqa Jehova Diospa qipa rimamusqantam aswan achka runakuna uyarirqaku.

Chaymi Jesus nirqa: “Chayna rimayqa uyarikurqa manam ñuqaraykuchu, aswanqa qamkunaraykum”, nispa (Juan 12:30). Diospa rimamusqanqa allintapunim qawachirqa Jesusqa kachamunan churin kasqanta.

Jesusqa puntamantaraqmi Diosman sunqu karqa. Chaynatam qawachirqa imaynata lliw runakuna kawsakunanchikmanta hinaspa kay pachapi munaychakuq satanaspas chinkachisqa kananmanta. Chaymi nirqa: “Kunanmi kay pacha juicioman yaykuchkan, kay pacha kamachiqpas kunanmi hawaman wischusqa kanqa”, nispa. Jesuspa wañukusqanqa allinpaqmi kanan karqa. ¿Imanasqa? Nirqam: “Ñuqam ichaqa warkusqa kaspay tukuy rikchaq runakunata ñuqaman pusamusaq”, nispa (Juan 12:31, 32). Arí, qirupi warkusqam wañukunan karqa aswan achka runakuna payman asuykuspa wiñay kawsayta haypanankupaq.

Runakunañataqmi “warkusqa” kananmanta uyarispa nirqaku: “Ñuqaykuqa Moisespa leyninman hinam yachaniku Cristoqa wiñaypaq kananmanta. Hinaptinqa, ¿imaynamá qamqa ninki ‘runapa churinqa warkusqam kanqa’ nispaqa? ¿Pitaq chay runapa churinqa?”, nispa (Juan 12:34). Chay runakunaqa yaqa lliwmi Jesuspa ruwasqankunata qawaspankupas chaynataq Diospa rimamusqanta uyarispankupas Jesustaqa mana Diospa kachamusqan chiqap churinpaqchu hapiqku.

Jesusñataqmi ñawpaqta hina runakunapaq “achkiynin” hina kasqanmanta willakurqa (Juan 8:12; 9:5). Nirqam: “Qamkunawanraq achki kachkaptinyá puriychik tutayay mana hapirusunaykichikpaq. Pipas tutayaypi puriqqa manam yachanchu mayman risqanta. Achki qamkunawan kachkaptinqa chay achkipiyá iñiychik, achkipa churinkuna kanaykichikpaq”, nispa (Juan 12:35, 36). Chaynata niruspanmi Jesusqa pasakurqa, chay nisan killapa 10 kaq punchawninqa manaraqmi wañukunan punchawchu karqa. Payqa nisan killapa 14 kaq punchawninpim qirupi “warkusqa” wañukunan karqa (Galatas 3:13).

Diosmanta willakuqkunam willakurqakuña judio runakunaqa Jesusta qipanchanankumanta. Isaiasmi willakurqa ñawsa hina kanankumanta hinaspa rumi sunqu kanankumanta, chaynataq allinyachisqa kayta mana munanankumanta (Isaias 6:10; Juan 12:40). Yaqa lliwmi Jesustaqa mana Diospa kachamusqan kasqanpaq hinachu hapiqku, aswanqa paqwaypaqmi qipancharqaku imataña ruwachkaptinpas.

Nicodemopas, Arimatea llaqtayuq Joseypas chaynataq achka kamachiqkunapas riqsikurqakum pim Jesus kasqantaqa. Ichaqa, ¿libretachu qawachirqaku? Icha, ¿yupaychana wasimanta qarquchikuyta manchakuspachu utaq runakunapa alabasqan kayta munaspachu upallalla karqaku? (Juan 12:42, 43).

Chaymantam paypi iñiymanta rimaspan nirqa: “Pipas ñuqapi iñiqqa manam ñuqallapichu iñin aswanqa kachamuwaqniypipas iñinmi. Pipas rikuwaqniyqa rikuntaqmi kachamuwaqniytapas”, nispa. Diospa yachachikuyninmanta Jesuspa willakusqanqa manam yanqapaqchu karqa. Chaymi nirqa: “Mana uyariwaspan nisqaykunata mana kasukuqpaqqa kachkanmi juzgaqnin. Rimasqaykunam tukupay punchawpi paytaqa juzganqa”, nispa (Juan 12:44, 45, 48).

Tukunanpaqñataqmi Jesus nirqa: “Ñuqaqa manam kikillaymantachu rimarqani, aswanqa kachamuwaqniy taytaymi kamachiwarqa imam ninayta chaynataq imam rimanaytapas. Yachanitaqmi kamachikuyninqa wiñay kawsay qukuq kasqanta”, nispa (Juan 12:49, 50). Jesusqa sumaqtam yacharqa pim pay kasqanmanta riqsikuqkuna salvakunankupaq wañukunanmanta (Romanos 5:8, 9).