¿Pitaq Diospa munaychakuyninpi kamachiq kanqa?

• Diospa akllasqanmi kanan karqa. Bibliam nin: ‘Ñuqaqa akllakusqay reytam [...] churani. Nacionkunatam herenciaykipaq qusqayki, tukuy kay pacham qampaqña kanqa’, nispa (Salmo 2:6, 8).

• Kamachiq Davidpa mirayninmantam kanan karqa. Bibliam nin: “Wawam nacerapuwanchik, churitam tayta Dios quykuwanchik [...]. Rey Davidpa trononmantam kamachikunqa, munaychakuyninpa atiyninmi tukuy hinastinman chayanqa, munaychakuyninpiqa hawkayaypas manam tukunqachu, munaychakuyninqa wiña-wiñaypaqmi takyanqa”, nispa (Isaias 9:6, 7).

• Belenpim nacenan karqa. Bibliam nin: ‘Belen, [...] qanmantam Israelpi munaychakuq hatarinqa [...]. Tukuy atiyniyuq tayta Dios kay pachapa patankama hatunchasqa kasqanrayku’, nispa (Miqueas 5:2, 4).

• Chiqnispankum wañuchinanku karqa. Bibliam nin: “Runakunapapas mana rikuy munasqankum karqa, paytaqa manam kaqpaqpas hapirqanchikchu. [...] Mana kasukusqanchikmantam tuksipasqa karqa, huchanchikkunaraykum chamchapasqa karqa”, nispa (Isaias 53:3, 5).

• Kawsarimuspam hanaq pachaman ripukunan karqa. Bibliam nin: ‘Cuerpoytapas amam sepulturapiqa saqirunkichu, kuyasqaykitaqa amam sepulturapiqa saqirunkichu [...]. Qayllaykipiqa wiñaypaq hawkayaytam tarini’, nispa (Salmo 16:10, 11).

Jesucristoqa allin kamachiqmi kanqa

Bibliapi willakuykunaqa sutillatam niwanchik Jesus kamachiq kananta. Huk angelpas maman Mariatam nirqa: “Jehova Diosmi qunqa taytan Davidpa kamachinanpaq tiyananta [...] kamachisqanqa mana tukuqmi kanqa”, nispa (Lucas 1:31-33).

Kay allpapi kaspanqa Jesusqa manaraqmi kamachirqachu. Ichaqa Dios akllaykusqanraykum payña kamachimuyta qallaykunqa. Jesusqa allin kamachiqmi kanqa ¿imanasqataq chaynata nichwan? Qatiqninpiyá qawaykusun imakunata kay pachapi kachkaspan ruwasqanmanta:

• Jesusqa runakunatam llakipayarqa. Maymantaña runakuna kaptinkupas, hayka watayuqña kaptinkupas lliwtam Jesusqa yanapaykurqa (Mateo 9:36; Marcos 10:16). Huk kutipim lepra unquyniyuq runa Jesusta nirqa: “¡Señorlláy, munaspaykiqa sanoyaykachillawayá!”, nispa. Chaymi Jesusqa llakipayasqanrayku sanoyaykachirqa (Marcos 1:40-42).

• Jesusqa Dioswan kuyachikunanchikpaqmi yachachiwarqanchik. Paymi nirqa: “Manam serviwaqchikchu Diostawan qullqitaqa”, nispa. Chaymantapas nirqam runamasinchikwan allinlla kawsakunapaq. Yachachiwarqanchiktaqmi Dioswan kuyachikunanchikpaqqa paypa kamachisqanman hina kawsakunamanta (Mateo 5:28; 6:24; 7:12). Jesusqa nirqataqmi Diospa yachachisqanta kasukuqkunaqa kusisqa kanankumanta (Lucas 11:28).

• Jesusqa kuyakuq kanapaqmi yachachiwarqanchik. Tukuy ima ruwasqanqa hinaspa rimasqanqa runakunapa sunqunmanmi chayarqa. Bibliam nin: ‘Runakunaqa imayna yachachisqanwanmi uyarayarqakuraq. Paypa yachachisqanqa Diosmantam karqa’, nispa (Mateo 7:28, 29). Jesusqa runakunatam kamachirqa enemigonkunata kuyanankupaq. Kikinmi wañuchiqnin runakunapaq kaynata mañakurqa: “Taytáy pampachaykuyá, paykunaqa manam yachankuchu imam ruwasqankutaqa”, nispa (Mateo 5:44; Lucas 23:34).

Yachamusqanchikman hinam nichwan, Jesucristoqa allin kamachiq kananmanta. Payqa kuyawasqanchikraykum yanapayta munawanchik. Ichaqa, ¿haykapitaq kamachiyta qallaykunqa?