¿Imaynañam Jesus kamachiptin kawsakusun?
Jesusmi qatiqninkunata yachachirqa Diospa munaychakuyninta mañakunankupaq. Payqa yacharqam taytan Jehova Diosqa ñakarinanchikta mana munasqanta, yacharqataqmi Diospa munaychakuynillan tukuy imata allichananmantapas. Chaynaqa Jesus kamachiyta qallaykuspanqa ¿imatataq ruwanqa?
¿IMATAM JESUSQA RUWARUNÑA?
Jesusmi nirqa guerrakuna, muchuykuna, terremotokuna kananmanta chaykuna qawasqanchikmi musyachiwanchik Jesus hanaq pachapi kamachisqantaña.
Bibliam niwanchik hanaq pachapi Jesus kamachiyta qallaykuspan satanastawan demonionkunata kay allpa pachaman wischuramusqantaña. Chayraykum 1914 watamanta kay allpa pachapi sasachakuykunawan ñakariykuna astawan kachkan (Apocalipsis 12:7, 9).
Chayna sasachakuykuna kaptinpas Jesusqa achka runakunatam yanapachkan Diosmanta yachanankupaq. Diosmanta yachaspankum runakunaqa bibliapa nisqanman hinaña kawsakunku (Isaias 2:2-4). Arí, paykunaqa manam qullqi maskayllamanchu qukurunku, ayllunkuwanpas hawkallam kawsakunku hinaspapas kapuqllankuwanmi kusisqa kanku. Bibliapa yachachikuyninkunaqa Diospa munasqanman hina kawsakunankupaqmi yanapachkan, chayna runakunallam Diospa munaychakuyninpiqa kawsakunqaku.
¿IMATAM JESUSQA MANAPAS UNAYMANTA RUWANQAÑA?
Hanaq pachapi Jesus kamachiptinpas kay allpa pachapiqa hinallaraqmi runakuna kamachichkanku. Diosqa nirqañam chiqniqninkunapa chawpinpi Jesus kamachichkananpaq (Salmo 110:2). Ichaqa, manapas unaymantam Jesusqa llapallan mana allin ruwaqkunata, chaynataq tukuy ima ñakariykunatapas qalaypaq chinkachinqaña.
Chaymantapas Jesusqa kaykunatawanmi ruwanqa:
Pantay religionkunatam chinkachinqa. Bibliam pantay religionkunata tupachin chuchumika warmiwan. Ninmi chay warmi chinkachisqa kananmanta. Arí, pantay religionkunaqa runakunata ñakarichisqankuraykum chinkachisqa kanqaku. Paykunaqa qunqayllamantam chinkachisqa kanqaku (Apocalipsis 17:15, 16).
Runakunapa kamachisqantam tukuchinqa. Jesusmi runakunapa kamachisqankuta tukuchinqa (Apocalipsis 19:15, 17, 18).
Mana allin runakunatam chinkachinqa. Bibliam nin: “Mana allin ruwaypi kawsaqkunam ichaqa kay pachamanta chinkachisqa kanqaku”, nispa (Proverbios 2:22).
Satanastawan demoniokunatam chinkachinqa. Satanaswan demoniokunaqa manañam runakunataqa ‘pantachinqakuñachu’ (Apocalipsis 20:3, 10).
Chaynaqa, ¿imayna kawsakuytataq atinqaku Jesuspa kamachikuyninpi kawsakuy munaqkunaqa?
¿IMATAM JESUSQA RUNAKUNAPAQ RUWANQA?
Jesus kay allpa pachata kamachispanqa manam runakuna hinachu kamachinqa, payqa kamachiqkunapa mana ruway atisqankutam ruwanqa. Jesusmi 144.000 akllasqa runakunawan kamachimuspa Diospa munaynin ruwakunanpaq tukuy imata ruwanqa (Apocalipsis 5:9, 10; 14:1, 3). Jesusmi kaykunata runakunapaq ruwanqa.
Unquytawan wañuytam chinkachinqa. Bibliam nin: “Manañam mayqannikichikpas ninkichikñachu: ‘Unquchkanim’ nispaqa”. Hinaspapas ninmi: “Manañam kanqachu wañuypas”, nispa (Isaias 33:24; Apocalipsis 21:4).
Hawka hinaspa kusisqam kawsakusun. Bibliam nin: “Hawkayaypim mana tukuyta kawsakunqaku”, nispa. Hinaspapas ninmi: “Sapakamam uvas plantankupa [hinaspa] higos sachankupa llantunpi tiyakunqaku, manañam pipas paykunataqa manchachinqachu”, nispa (Isaias 54:13; Miqueas 4:4).
Llamkasqankuqa manam yanqapaqchu kanqa. Bibliam nin: “Akllakusqaykunaqa llamkasqankupa ruruntam mikunqaku. Llamkasqankupas manam yanqapaqchu kanqa”, nispa (Isaias 65:22, 23).
Allpa pachapas qachachasqa kasqanmantam chuyanchasqa kanqa. Bibliam nin: “Chunniqpi chaki allpapas llumpaytam kusikunqa, kusikuspam rosas hinaraq waytarinqa”, nispa (Isaias 35:1).
Runakunatam yachachinqa imata ruwaspanku wiñaypaq kawsakunanpaq. Bibliam nin: “Wiñay kawsayqa kanqa sapallan chiqap Dios kasqaykita riqsiqkunapaqmi hinaspa kachamusqayki Jesucristotapas riqsiqkunapaqmi”, nispa (Juan 17:3).
Diosqa munanmi llapallanchik kusisqa kawsakunanchikta (Isaias 48:18). Qatiqnin yachachikuypim yachasun Diospa munaychakuyninpi kawsakunapaqqa imata ruwanamanta.